ព័ត៌មានជាតិ

មួយឆ្នាំនេះ រដ្ឋមន្ត្រីក្រសួងបរិស្ថានដាក់ចេញយុទ្ធនាការធំៗទាក់ទាញមនុស្សរាប់លាននាក់ ចូលរួមថែរក្សាបរិស្ថាន

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ២៩ សីហា ២០២៤

ដោយ

ក្រសួងបរិស្ថានក្រោមការដឹកនាំដោយលោក អ៊ាង សុផល្លែត បានបង្ហាញសមិទ្ធផលសម្រេចបានក្នុងរយៈពេលមួយឆ្នាំលើកិច្ចការពារបរិស្ថាន និងធនធានធម្មជាតិ។

ជារដ្ឋមន្ត្រីបន្តវេនដែលឡើងជំនួសតំណែងលោក សាយ សំអាល់ ក្នុងនីតីកាលទី ៧ នៃរាជរដ្ឋាភិបាល លោក អ៊ាង សុផល្លែត បានដាក់ចេញយុទ្ធសាស្ត្រចក្រាដែលផ្ដោតលើមុំធំៗចំនួន ៣ គឺ «ស្អាត បៃតង និងចិរភាព»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្រ្តីបានផ្តួចផ្តើមយុទ្ធនាការ «ថ្ងៃនេះ ខ្ញុំមិនប្រើប្រាស់ថង់ប្លាស្ទិក» ដែលមានការចូលរួមពីពលរដ្ឋរាប់លាននាក់។ យុទ្ធនាការដាំដុះកូនឈើឲ្យបាន ១ លានដើមក្នុងមួយឆ្នាំ ដើម្បីឈានសម្រេចជាប្រទេសអព្យាក្រឹត្យកាបូន និងបង្កើនគម្របព្រៃឈើឲ្យបាន ៦០% ក្នុងឆ្នាំ ២០៥០។

លោករដ្ឋមន្រ្តី ក៏បានដាក់ចេញយុទ្ធនាការសម្អាតផ្ទៃទឹក ដោយជំរុញឲ្យសហគ្រាសបំពាក់ប្រព័ន្ធតាមដានគុណភាពទឹកកខ្វក់ដើម្បីការពារសុខភាព និងអាយុជីវិតរបស់ពលរដ្ឋ។

បន្ថែមពីនេះ លោករដ្ឋមន្រ្តីបានរៀបចំបង្កើតថ្នាលបណ្តុះកូនឈើកម្រិតតំបន់តាមបណ្តាខេត្តធំៗចំនួន ៥ មានខេត្តត្បូងឃ្មុំ កំពង់ស្ពឺ កោះកុង សៀមរាប និងមណ្ឌលគិរី រួមទាំងប្រកាសបង្កើតកម្មវិធីប្រកួតប្រជែងគ្នា «កម្ពុជាស្អាត គ្មានសំរាមប្លាស្ទិកតាមដងផ្លូវ» និងការដាក់ចេញនូវយុទ្ធនាការ «កម្ពុជាស្អាត ខ្មែរធ្វើបាន» រួមគ្នារើសសំរាម ប្លាស្ទិក សម្អាតតាមដងវីថិ តាមទីសាធារណៈ ជុំវិញបរិវេណផ្ទះ រោងចក្រសហគ្រាស សាលារៀន និងតាមទីអារាមជាដើម។

សមិទ្ធផលដ៏ធំមួយទៀត គឺការរៀបចំពិព័រណ៍ដើមឈើដ៏ធំបំផុតមិនធ្លាប់មាន «ពន្លកបៃតង» ដែលមានការចែកកូនឈើរាប់ម៉ឺនដើមដោយឥតគិតថ្លៃ ក្នុងចលនាបំផុសពលរដ្ឋនិងយុវជនចាប់ផ្ដើមស្រលាញ់ដើមឈើ និងចូលរួមដាំដើមឈើតាមគេហដ្ឋាន វត្តអារាម សាលារៀន និងទីសាធារណៈនានា៕