ព័ត៌មានជាតិ

គណៈប្រតិភូ ប.ស.ស ចូលរួមសិក្ខាសាលាស្ដីពីរបបសន្តិសុខសង្គមសម្រាប់បុគ្គលស្វ័យនិយោជន៍ និងកម្មករ-និយោជិត តាមថ្នាលឌីជីថល

បានផុស

៥ ខែ មុន

នៅ

ថ្ងៃសុក្រ ៣០ សីហា ២០២៤

ដោយ

គណៈប្រតិភូ ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ ដឹកនាំដោយ លោក សោម សុខធី អនុប្រធាននាយកដ្ឋានសេវាអតិថិជន និងទំនាក់ទំនងសាធារណៈ តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម បានចូលរួមសិក្ខាសាលាបច្ចេកទេសស្ដីពីរបបសន្តិសុខសង្គមសម្រាប់បុគ្គលស្វ័យនិយោជន៍ និងកម្មករ-និយោជិតតាមថ្នាលឌីជីថល នៅមជ្ឈមណ្ឌលពាណិជ្ជកម្មពិភពលោក នៅក្នុងទីក្រុងកូឡាឡាំពួរ នៃប្រទេសម៉ាឡេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សិក្ខាសាលាបច្ចេកទេសខាងលើនេះ រៀបចំឡើងដោយអង្គភាពសន្តិសុខសង្គម ម៉ាឡេស៊ី (SOCSO) សហការជាមួយសមាគមសន្តិសុខសង្គមអន្តរជាតិ ដែលមានសមាសភាពចូលរួមដោយផ្ទាល់ និងតាមរយៈប្រព័ន្ធអនឡាញសរុបប្រមាណជាង ១ ០០០ នាក់ មកពីស្ថាប័នសន្តិសុខសង្គម ដែលជាសមាជិកសមាគមសន្តិសុខសង្គមអន្តរជាតិ (ISSA)។

លោក សោម សុខធី អនុប្រធាននាយកដ្ឋានសេវាអតិថិជន និងទំនាក់ទំនងសាធារណៈ នៃប.ស.ស. បានឱ្យដឹងថា សិក្ខាសាលានេះធ្វើឡើងក្នុងគោលបំណងដើម្បីធ្វើឱ្យកាន់តែប្រសើរឡើងនាពេលថ្មីៗ នេះ ក្នុងការជំរុញការគ្របដណ្ដប់របបសន្តិសុខសង្គមទៅដល់កម្មករ-និយោជិតតាមថ្នាលឌីជីថល និងបុគ្គលស្វ័យនិយោជន៍។ ការពង្រីកវិសាលភាពក្នុងក្របខ័ណ្ឌ នៃបទដ្ឋានគតិយុត្តិ ការកំណត់នូវប្រភេទការងារ និង ការសម្របខ្លួនទៅនឹងប្រព័ន្ធសន្តិសុខសង្គម និង និងការធ្វើនវានុវត្តន៍របស់ស្ថាប័នលើការចុះបញ្ជី ការទូទាត់ ការចែករំលែកទិន្នន័យ និងចំណេះដឹង។

សូមបញ្ជាក់ថា សិក្ខាសាលាបច្ចេកទេសខាងលើនេះ ប្រព្រឹត្តទៅចាប់ពីថ្ងៃទី ២៧-២៨ ខែសីហា ឆ្នាំ ២០២៤ ដោយមានការធ្វើបទបង្ហាញពីសំណាក់វាគ្មិនអន្តរជាតិចំនួន ១៧ រូប និងមានការផ្តល់កិត្តិយសជាអធិបតីបើកសិក្ខាសាលាដោយលោក YAB Dato’ Seri Dr. Ahmad Zahid Hamidi ឧបនាយករដ្ឋមន្ត្រី នៃប្រទេសម៉ាឡេស៊ី៕

អត្ថបទ ៖ សំអឿន