ព័ត៌មានជាតិ

កម្ពុជា មានសហគ្រាសជាង ៤ ម៉ឺន ៤ ពាន់ និង កម្មករជាង ១ លាន ៧ សែននាក់ មានប្រាក់ឈ្នួលប្រចាំឆ្នាំជាង ៥ ពាន់លានដុល្លារ

បានផុស

៦ ខែ មុន

នៅ

ថ្ងៃសុក្រ ៣០ សីហា ២០២៤

ដោយ

កម្ពុជា មានសហគ្រាសគ្រឹះស្ថាន ប្រមាណជាង ៤ ម៉ឺន ៤ ពាន់កន្លែង ដោយមានកម្មករ-និយោជិតជាង ១ លាន ៧ សែននាក់ នៅទូទាំងប្រទេស និងមានប្រាក់ឈ្នួលប្រចាំឆ្នាំជាង ៥ ពាន់លានដុល្លារ បានជួយលើកស្ទួយជីវភាពរស់នៅកាន់តែប្រសើរ រួមចំណែកអភិវឌ្ឍន៍សេដ្ឋកិច្ចជាតិកាន់តែរីកចម្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ៣០ សីហ នេះថា ក្រសួងបានធ្វើបច្ចុប្បន្នភាពសហគ្រាស គ្រឹះស្ថាន តាមប្រព័ន្ធផ្ទាល់ ផ្លាស់ប្ដូរទិន្នន័យកម្ពុជា CamDX និង ផ្ទាលទិន្នន័យ LACMS មានសហគ្រាសសរុបចំនួន ៤៤ ៤១៧ សហគ្រាស និងមានកម្មករ-និយោជិតសរុប ចំនួន ១ ៧៩២ ៧៩១ នាក់ (ស្រី ១ ០៧៤ ៩៧៩ នាក់) គិតត្រឹមឆមាសទី ១ ឆ្នាំ ២០២៤ ក្នុងនោះ វិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូបមានចំនួន ១ ៥៣៨ សហគ្រាស គ្រឹះស្ថាន និងមានកម្មករ-និយោជិតសរុបចំនួន ៩១៣ ០១៧ នាក់ ដោយបានប្រាក់ឈ្នួលប្រចាំឆ្នាំប្រមាណ ២,៨៨ ពាន់លានដុល្លារអាមេរិក និងវិស័យក្រៅពីកាត់ដេរមានចំនួន ៤២ ៨៧៩ សហគ្រាស គ្រឹះស្ថាន និង មានកម្មករ-និយោជិតសរុបចំនួន ៨៧៩ ៧៧៤ នាក់ ដោយបានប្រាក់ឈ្នួលប្រចាំឆ្នាំប្រមាណ ២,៦៤ ពាន់លានដុល្លារអាមេរិក ដែលមានការកើនឡើង បើធៀបនឹងឆមាសទី ១ ឆ្នាំ ២០២៣ កន្លងទៅ។

លោក កត្តា អ៊ន បានបន្តថា ការកើនឡើង នៃចំនួនសហគ្រាសគ្រឹះស្ថាននេះ បានរួមចំណែកយ៉ាងសំខាន់ក្នុងការផ្តល់ឱកាសការងារធ្វើជូនដល់ប្រជាពលរដ្ឋបង្កើនប្រាក់ចំណូលលើកស្ទួយជីវភាពក្រុមគ្រួសារកាន់តែល្អប្រសើរ ក៏ដូចជាចូលរួមលើកស្ទួយសេដ្ឋកិច្ចជាតិកាន់តែរីកចម្រើនផងដែរតាមរយៈការបោះទុនវិនិយោគនានា៕

អត្ថបទ ៖ សំអឿន