ស្ថានទូត៖ រដ្ឋាភិបាលចិនបន្តផ្តល់អាហារូបករណ៍ដែលមានគុណភាពខ្ពស់ជូនដល់និស្សិតកម្ពុជា

លោក វ៉ាង វិនពីន ឯកអគ្គរដ្ឋទូតថ្មី នៃសាធារណរដ្ឋប្រជាមានិតចិន ប្រចាំកម្ពុជា បានលើកឡើងថា រដ្ឋាភិបាលចិនបន្តផ្តល់អាហារូបករណ៍គុណភាពខ្ពស់ដល់និស្សិតកម្ពុជា ក្នុងនាមជាប្រទេសដែលបានបង្កើតទំនាក់ទំនងកាទូតជាមួយគ្នា ៦៦ឆ្នាំមកនេះ។ នេះ បើតាមការលើកឡើងរបស់លោកក្នុងឱកាសជួបជាមួយឧបនាយករដ្ឋមន្ត្រី រដ្ឋមន្ត្រីក្រសួងអប់រំ បណ្ឌិតសភាចារ្យ ហង់ជួន ណារ៉ុន ថ្មីៗនេះ។

ក្នុងជំនួបនោះ លោក វ៉ាង វិនពីន លើកឡើងថា ឆ្នាំនេះគឺជាឆ្នាំនៃខួបអនុស្សាវរីយ៍លើកទី៦៦នៃការបង្កើតទំនាក់ទំនងការទូតរវាងកម្ពុជា និងចិន ដូច្នេះ យុវជន ក៏ជាផ្នែកមួយដ៏សំខាន់ នៃទំនាក់ទំនងរវាងប្រទេសទាំង២ដែរ។ ឯកអគ្គរដ្ឋទូត បន្តថា រាជរដ្ឋាភិបាលនៃសាធារណរដ្ឋប្រជាមានិតចិនបានយកចិត្តទុកដាក់លើវិស័យអប់រំ យុវជន និងកីឡា ដោយបន្ដការផ្ដល់អាហារូបករណ៍ដែលមានគុណភាពខ្ពស់ជូនដល់និស្សិតកម្ពុជា ព្រោះយុវជនគឺតំណាងអនាគតរបស់ប្រទេសជាតិ យុវជនក៏ជាតំណាងអនាគតនៃចំណងមិត្តភាពរវាងកម្ពុជា និងចិនផងដែរ។ បន្ថែមពីនេះ ជួយហ្វឹកហ្វឺនដល់កីឡាករ កីឡាការិនីកម្ពុជា ដោយអនុញ្ញាតឱ្យកីឡាករ កីឡាការិនី មានឱកាសទៅហ្វឹកហាត់បន្ថែមនៅឯប្រទេសចិន ឬបញ្ជូនគ្រូបង្វឹកពីប្រទេសចិនមកបង្រៀននៅប្រទេសកម្ពុជា។

ជាការឆ្លើយតប បណ្ឌិតសភាចារ្យ ហង់ជួន ណារ៉ុន បានសម្តែងនូវការកោតសរសើរ និងថ្លែងអំណរគុណចំពោះរដ្ឋាភិបាលសាធារណរដ្ឋប្រជាមានិតចិន និងប្រជាជនចិន ដែលតែងតែគាំទ្រ ផ្តល់កិច្ចសហប្រតិបត្តិការ និងផ្តល់គម្រោងជំនួយជាច្រើនដល់ការអភិវឌ្ឍធនធានមនុស្សនៅកម្ពុជា ដោយក្នុងនោះរួមមាន ការផ្តល់អាហារូបករណ៍ដល់និស្សិតកម្ពុជា ការកសាងហេដ្ឋារចនាសម្ព័ន្ធសាលារៀន ការផ្គត់ផ្គង់សម្ភារបរិក្ខារអប់រំ និងការអភិវឌ្ឍបច្ចេកវិទ្យាព័ត៌មាននិងសារគមនាគមន៍សម្រាប់ការអប់រំនៅកម្ពុជាជាច្រើនបន្តបន្ទាប់។

ឆ្លៀតក្នុងឱកាសនេះ បណ្ឌិតសភាចារ្យ ជឿជាក់ថា ក្នុងនាមលោក វ៉ាង វិនពីន ជាឯកអគ្គរដ្ឋទូតថ្មី នៃសាធារណរដ្ឋប្រជាមានិតចិន ប្រចាំកម្ពុជា ដែលមានការដឹកនាំប្រកបដោយបទពិសោធ និងភាពឈ្លាសវៃរបស់លោក នោះក្នុងកិច្ចសហប្រតិបត្តិការ និងទំនាក់ទំនងរវាងប្រទេសទាំងពីរនឹងកាន់តែរឹងមាំ ស៊ីជម្រៅ និងសម្បូរបែបលើគ្រប់វិស័យ៕