សម្ដេច ឃួន សុដារី៖ រដ្ឋសភាកម្ពុជាបេ្តជ្ញារក្សាភាពជាអ្នកជិតខាងល្អជាមួយវៀតណាម

នៅរាត្រីថ្ងៃទី៣០ ខែសីហា ឆ្នាំ២០២៤ សម្តេចរដ្ឋសភាធិបតី ឃួន សុដារី បានអញ្ជើញចូលរួមពិធីអបអរសាទរថ្ងៃបុណ្យឯករាជ្យជាតិលើកទី៧៩ របស់វៀតណាម ដែលរៀបចំដោយស្ថានទូតវៀតណាមនៅភ្នំពេញ។ តាមរយៈសារលិខិតផ្ញើជូនប្រធានរដ្ឋសភាវៀតណាម សម្ដេច ឃួន សុដារី បានបង្ហាញការប្ដេជ្ញាចិត្តរបស់កម្ពុជាក្នុងការរក្សាភាពជាអ្នកជិតខាងល្អជាមួយគ្នា។

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃកម្ពុជា បានអញ្ជើញចូលរួមជាភ្ញៀវឥស្សរជនជាន់ខ្ពស់ក្នុងពិធីអបអរសាទរថ្ងៃបុណ្យឯករាជ្យជាតិលើកទី៧៩ របស់វៀតណាម នៅសណ្ឋាគារសូហ្វីតែលភ្នំពេញ ដែលរៀបចំឡើងដោយស្ថានទូតវៀតណាមប្រចាំនៅកម្ពុជា នៅរាត្រីថ្ងៃទី៣០ ខែសីហាឆ្នាំ២០២៤។

ពិធីនេះមានការអញ្ជើញចូលរួមពីសំណាក់ឥស្សរជនជាន់ខ្ពស់សំខាន់ៗនៃកម្ពុជា ព្រមទាំងវត្តមានឯកអគ្គរាជទូត ឯកអគ្គរដ្ឋទូត ភ្ញៀវជាតិ-អន្តរជាតិ ជាមិត្តរបស់វៀតណាមជាច្រើនកុះករ។

ថ្ងៃទី២ ខែកញ្ញា ឆ្នាំ១៩៤៥ – ថ្ងៃទី២ ខែកញ្ញា ឆ្នាំ២០២៤ គឺជាខួបលើកទី៧៩ ថ្ងៃបុណ្យឯករាជ្យជាតិវៀតណាម។ នៅក្នុងសារលិខិតអបអរសាទរ ដែលបានផ្ញើជូនលោក ជិន ថាញ់មិន ប្រធានរដ្ឋសភាវៀតណាម សម្តេចប្រធានរដ្ឋសភាបានលើកឡើងពីទំនាក់ទំនងជិតស្និទ្ធ​ និងជាប្រពៃណីរវាងប្រទេសកម្ពុជា​ និងវៀតណាម ដែលបាននាំមកនូវផលប្រយោជន៍ដល់ប្រទេសទាំងសងខាង។

សម្តេច ឃួន សុដារី បានគូសបញ្ជាក់ថា រដ្ឋសភាកម្ពុជាបេ្តជ្ញាថែរក្សាចំណងមិត្តភាព ភាពជាអ្នកជិតខាងល្អ និងកិច្ចសហប្រតិបត្តិការគ្រប់ជ្រុងជ្រោយដ៏យូរអង្វែងនៃប្រទេសទំាងពីរ។ រដ្ឋសភាកម្ពុជា សង្ឃឹមថា ចំណងមិត្តភាពនេះ នឹងបន្តពង្រីក​ និងពង្រឹងបន្ថែមទៀត ដើម្បីជាផលប្រយោជន៍ទៅវិញទៅមកដល់ប្រជាជននៃប្រទេសទំាងពីរ​៕