ព័ត៌មានជាតិ

ភាគីនិយោជក គ្រោងនឹងដាក់សំណើ ៥ ចំណុច ជូនរាជរដ្ឋាភិបាលជួយដោះស្រាយ ដើម្បីសម្រួលដល់ការដំឡើងប្រាក់ឈ្នួលកម្មករ

បានផុស

៥ ខែ មុន

នៅ

ថ្ងៃចន្ទ ២ កញ្ញា ២០២៤

ដោយ

ភាគីនិយោជក គ្រោងនឹងដាក់សំណើចំនួន ៥ ចំណុច ជូនរាជរដ្ឋាភិបាលជួយដោះស្រាយ ដើម្បីសម្រួលដល់ភាគីនិយោជកក្នុងការដំឡើងប្រាក់ឈ្នួលអប្បបរមារបស់កម្មករ-និយោជិត សម្រាប់ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧកញ៉ា ណាង សុធី តំណាងភាគីនិយោជក បានមានប្រសាសន៍នៅព្រឹកថ្ងៃទី ០២ កញ្ញា នេះថា ដើម្បីជួយសម្រួលដល់ភាគីនិយោជកក្នុងការដំឡើងប្រាក់ឈ្នួលអប្បបរមារបស់កម្មករ-និយោជិតសម្រាប់ឆ្នាំ ២០២៥ ខាងមុខនេះ ភាគីនិយោជក គ្រោងសំណូមពរមួយចំនួនជូនដល់រាជរដ្ឋាភិបាលដើម្បីជួយដោះស្រាយរួមមាន ៖ ១-ទទូចឱ្យរាជរដ្ឋាភិបាលបន្ទាបតម្លៃ ៣៥០ ដុល្លារ ក្នុង ១ កុងតឺន័រ នាំចេញ និងចូល។ ២-ស្នើសិក្សាឡើងវិញពីលទ្ធភាពធានា កម្លាំងពលកម្មបម្រើការងារផលិតកម្មគ្រប់រោងចក្រសហគ្រាសកុំឱ្យខ្វះខាតនាពេលអនាគត។ ៣-សុំពិចារណាលើគោលការណ៍ អនុវត្ត របស់ ប.ស.ស ក្នុងការបង់វិភាគទានរបស់ភាគីនិយោជក ពិសេសលើផ្នែកថែទាំសុខភាព។ ៤-សំណើសុំពិចារណាលើការស្នើសុំថ្ងៃឈប់ប្រចាំឆ្នាំមកត្រឹម ១៨ ថ្ងៃ ដូចប្រទេសអាស៊ានដែលមានការរីកចម្រើនរួចហើយ។ ៥-នៅមានបញ្ហា ១ ចំនួនដទៃទៀតកំពុងពិចារណា។

ឧកញ៉ា ណាង សុធី បានបញ្ជាក់ថា សំណើខាងលើនេះភាគីនិយោជកត្រូវសុំគោលការណ៍ឯកភាព ពីថ្នាក់ដឹកនាំ ពិសេស លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជាមុនសិន មុននឹងលើកដាក់សំណើសុំជាផ្លូវការជូនទៅរាជរដ្ឋាភិបាល។

ក្រុមប្រឹក្សាជាតិប្រាក់ឈ្នួលអប្បបរមាអាណត្តិទី ៣ ឆ្នាំទី ២ បានបើកកិច្ចប្រជុំលើកទី ១ កាលពីថ្ងៃទី ១៤ ខែសីហា ឆ្នាំ ២០២៤ លើកទី ២ ថ្ងៃទី ២៩ សីហា និងបន្តរៀបចំប្រជុំជាបន្តបន្ទាប់ទៀតនៅថ្ងៃទី ៦, ទី ១២, ទី ១៩ និងទី ២៦ ខែកញ្ញា ឆ្នាំ ២០២៤ ជាកិច្ចប្រជុំចុងក្រោយ។

នៅក្នុងកិច្ចប្រជុំលើកទី ២ ជាជំហរបឋមខាងភាគីសហជីពស្នើសុំដំឡើង ១៤ ដុល្លារ ស្មើនឹង ២០១៨ ដុល្លារ និងភាគីនិយោជកស្នើសុំដំឡើង ១ ដុល្លារ ស្មើនឹង ២០៥ ដុល្លារ សម្រាប់ឆ្នាំ ២០២៥។ ប៉ុន្តែនៅពេលមានកិច្ចប្រជុំជាបន្តបន្ទាប់ទៀតជំហរនេះអាចមានការប្រែប្រួលដោយភាគីខ្លះអាចដំឡើងបន្ថែម និងខ្លះទៀតអាចបន្ថយតួលេខមកវិញខ្លះ។

ឧកញ៉ា ណាង សុធី បានពន្យល់ថា ការដាក់តួលេខ ១ ដុល្លារ នេះ ផ្នែកទៅលើស្ថានភាពជាក់ស្ដែងដូចជាអត្រាការប្រាក់សម្រាប់វិស័យពាណិជ្ជកម្ម និងឧស្សាហកម្មកើនឡើងខ្ពស់ ប៉ុន្តែសម្រាប់ប្រជាពលរដ្ឋមានអត្រាទាប និងមួយទៀតបើទោះបីជាអត្រានាំចេញមានកំណើនខ្ពស់ ក៏ប៉ុន្តែនិយោជកយើងគិតថាវាគ្រាន់តែជាពពុះទឹកដោយសារវិបត្តិនៅភូមា និងវិបត្តិនយោបាយនៅបង់ក្លាដេសដោយអ្នកបញ្ជាទិញបង្វែរពីភូមាមកកម្ពុជា។

ឧកញ៉ាបានបន្តថា «គោលជំហររបស់យើងដំឡើងៗហើយ ព្រោះវាជាគោលនយោបាយរបស់រាជរដ្ឋាភិបាល ប៉ុន្តែខាងយើងការដំឡើង ១ ដុល្លារ នៃកិច្ចពិភាក្សាជាចំណូលដ៏ល្អមួយ។ អីចឹងសូមកុំយកតួលេខនេះជាលេខចុងក្រោយសម្រាប់កិច្ចពិភាក្សារបស់និយោជកវាគ្រាន់តែជាតួលេខមួយដាក់ពិភាក្សាជាមួយគ្នាទេ»។

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ភាគីរដ្ឋាភិបាល នឹងខិតខំសម្របសម្រួលឱ្យអស់លទ្ធភាពដើម្បីឱ្យភាគីនីមួយៗ ខិតទៅរកប្រសប់គ្នាហើយបើអាចរកបាននូវកុងសង់ស៊ីគ្នាកាន់តែប្រសើរតែបើមិនមានការការឯកភាពគ្នាទេ យើងនឹងអនុវត្តតាមច្បាប់គឺការបោះឆ្នោតក្នុងកិច្ចប្រជុំចុងក្រោយនៅថ្ងៃទី ២៦ កញ្ញា ខាងមុខ។

គួរបញ្ជាក់ថា ឆ្នាំ ២០២៤ នេះ ប្រាក់ឈ្នួលអប្បបរមារបស់កម្មករ-និយោជិតមានចំនួន ២០៤ ដុល្លារអាមេរិក ក្នុង ១ ខែ ជាមួយការផ្តល់ប្រាក់អត្ថប្រយោជន៍ជាកាតព្វកិច្ចផ្សេងៗ ចំនួន ១៧ ដុល្លារអាមេរិក ទៅ ២៨ ដុល្លារអាមេរិក ដែលធ្វើឱ្យកម្មករ-និយោជិតអាចទទួលបានជាប្រាក់ឈ្នួលចន្លោះពី ២២១ ទៅ ២៣២ ដុល្លារអាមេរិក យ៉ាងតិច ក្នុងមួយខែ ដោយមិនទាន់គិតពីអត្ថប្រយោជន៍ពី ប.ស.ស៕

អត្ថបទ ៖ សំអឿន