ព័ត៌មានជាតិ

រដ្ឋបាលខណ្ឌបឹងកេងកង ផ្លាស់ប្ដូរការ៉ូឡាថ្មី នៅចំណុចមហាវិថី ព្រះសីហនុ ដើម្បីងាយស្រួលដល់ប្រជាពលរដ្ឋ

បានផុស

៤ សប្តាហ៍ មុន

នៅ

ថ្ងៃចន្ទ ២ កញ្ញា ២០២៤

ដោយ

រដ្ឋបាលខណ្ឌបឹងកេងកង បានយកចិត្តទុកដាក់ពីគម្រោងផ្លាស់ប្ដូរការ៉ូឡាថ្មី ដើម្បីលើកសោភ័ណភាពតាមដងផ្លូវ និងសម្រាប់ប្រជាពលរដ្ឋងាយស្រួលធ្វើដំណើរថ្មើរជើងផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងចិញ្ចើមផ្លូវមហាវិថី ព្រះសីហនុ ចាប់ពីចំណុចស្តុបអូឡាំពិក ទៅដល់ស្តុប អាងទឹក ស្ថិតក្នុងសង្កាត់អូឡាំពិក ខណ្ឌបឹងកេងកង ត្រូវបានរដ្ឋបាលខណ្ឌធ្វើការផ្លាស់ប្ដូរការ៉ូឡាថ្មី ដោយការ៉ូឡាចាស់ បាក់បែកខូចខាតអស់ ធ្វើឲ្យប្រជាពលរដ្ឋពិបាកក្នុងការធ្វើដំណើរ និងបាត់បង់សោភ័ណភាព។

លោក សុខ សម្បត្តិ អភិបាលខណ្ឌបឹងកេងកង បានឲ្យដឹងថា ការចុះត្រួតពិនិត្យមើលការដ្ឋាននេះ ដើម្បីមើលថា តើក្រុមហ៊ុនដេញថ្លៃវិនិយោគនៅក្នុងខណ្ឌអនុវត្តតាមលក្ខណៈបច្ចេកទេសដែរឬទេ នឹងបន្តណែនាំឲ្យម្ចាស់ក្រុមហ៊ុន ត្រូវមានលក្ខណៈបច្ចេកទេសត្រឹមត្រូវ ធ្វើយ៉ាងណាមិនឲ្យប៉ះពាល់ដល់ផលប្រយោជន៍ពលរដ្ឋ។

ក្នុងនោះដែរ មន្ត្រីជំនាញ នៃរដ្ឋបាលខណ្ឌបឹងកេងកង បានឲ្យដឹងថា ការផ្លាស់ប្ដូរការ៉ូឡាថ្មីនេះ ជាគម្រោងរបស់រដ្ឋបាលខណ្ឌ ដោយសង្កេតឃើញថា ការ៉ូឡានៅចិញ្ចើមមហាវិថី ព្រះសីហនុ មានសភាពចាស់ទ្រុឌទ្រោម ខូចខាតស្ទើរទាំងស្រុងទៅហើយ។ ដូច្នេះដើម្បីលើកកម្ពស់សោភ័ណភាពតាមដងមហាវិថី ព្រះសីហនុ ផង ងាយស្រួលដល់ពលរដ្ឋក្នុងការធ្វើដំណើរដោយថ្មើរជើងជៀសវាង បង្កគ្រោះថ្នាក់ណាមួយជាយថាហេតុ រដ្ឋបាលខណ្ឌបានផ្លាស់ប្ដូរការ៉ូឡាថ្មីដោយលើកឲ្យខ្ពស់ជាងមុន និងធានាគុណភាពល្អជាងមុនផងដែរ។

ជាចុងក្រោយ លោកអភិបាល បានណែនាំដល់មន្ត្រីជំនាញពាក់ព័ន្ធនៅក្នុងខណ្ឌ ត្រូវចុះត្រួតពិនិត្យតាមការដ្ឋានទាំងអស់ក្នុងមូលដ្ឋានខណ្ឌឲ្យបានញឹកញាប់ ដើម្បីពិនិត្យមើលឲ្យមានលក្ខណៈបច្ចេកទេសត្រឹមត្រូវក្នុងការដ្ឋាន៕

អត្ថបទ ៖ រដ្ឋា