កីឡា

សួន ចាន់ណារ៉ូ សម្លឹងឃើញយុវជន កែវ ស្រេងលីហួរ អាចជំនួសខ្លួនបាន

បានផុស

៣ សប្តាហ៍ មុន

នៅ

ថ្ងៃចន្ទ ២ កញ្ញា ២០២៤

ដោយ

ប្រធានក្រុមបាល់ទះជម្រើសជាតិកម្ពុជា សួន ចាន់ណារ៉ូ បានសម្លឹងឃើញយុវជនអាយុ១៩ឆ្នាំ កែវ ស្រេងលីហួរ អាចជំនួសតំណែងរបស់ខ្លួនបានពេលអនាគត។

សួន ចាន់ណារ៉ូ ដែលធ្លាប់បានប្រកាសចូលនិវត្តន៍ក្រោយចប់ស៊ីហ្គេម ឆ្នាំ២០២៣ បានលើកឡើងថា យុវជន កែវ ស្រេងលីហួរ ដែលមានអាយុ១៩ឆ្នាំ កម្ពស់១.៩១ម៉ែត្រ មានបច្ចេកទេសលេងប្រហែលខ្លួនដែរ។ ឆ្លើយតបទៅនឹងសំណួរថាតើសម្លឹងឃើញកីឡាកររូបណាអាចជំនួសខ្លួនបាននាពេលអនាគត រូបគេបាននិយាយថា ៖«សម្រាប់ខ្ញុំមើលឃើញហើយគឺកីឡាករ កែវ ស្រេងលីហួរ។ គាត់ល្អ និយាយរួមស្ទីលលេងគឺគាត់លេងតាមខ្ញុំ ប៉ុន្តែគ្រាន់តែចិត្តរបស់គាត់នៅស្រាល»។

សួន ចាន់ណារ៉ូ ប្រាប់ថា ៖«ចិត្តអត់សូវធ្ងន់ទេ លក្ខណៈថា ចិត្តគាត់ឆាប់ឆេវឆាវ។ ពេលក្រុមមានបាល់អាតាក់ ឬចាញ់គេពីរបីពិន្ទុ គាត់គ្រប់គ្រងអារម្មណ៍ក្នុងការប្រកួតអត់បានទេ។ ខ្ញុំមើលការប្រកួតរបស់គាត់នៅថៃ ឬនៅវៀតណាម។ បទពិសោធរបស់គាត់ច្រើនដែរ តែចិត្តយើងជាប្រធានក្រុមគឺយើងត្រូវធ្ងន់ជាងគេ ហើយមិនអាចឆាប់ឆេវឆាវបានទេ។ ប្រសិនបើយើងឆាវឆាយគឺកូនក្រុមយើងនឹងទៅតាមយើងទាំងអស់»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សួន ចាន់ណារ៉ូ ដែលជាប្រធានក្រុមបាល់ទះជម្រើសជាតិកម្ពុជាអាចត្រូវបានចាត់ទុកជាអ្នកប៉ះសេដ៏ឆ្នើមបំផុតនៅប្រទេសកម្ពុជាដែលមិនទាន់កីឡាកររូបណាជំនួសរូបគេបានឡើយនាពេលបច្ចុប្បន្ន ហេតុដូច្នេះហើយទើបបានជារូបគេត្រូវបានកោះហៅចូលជម្រើសជាតិវិញ។

កែវ ស្រេងលីហួរ ធ្លាប់បានផ្តល់បទសម្ភាសដល់«កម្ពុជាថ្មី»កាលពីខែមេសា ឆ្នាំ២០២៤ ថា រូបគេតែងតែតាមដាន និងរៀនសូត្រពីរៀមច្បងឆ្នើមគឺ សួន ចាន់ណារ៉ូ។

កែវ ស្រេងលីហួរ បានចាប់ផ្ដើមលេងបាល់ទះតាំងពីឆ្នាំ២០១៩ រហូតដល់ឆ្នាំ២០២១ ទើបបានចូលរួមជាមួយក្រុមយុវជនបាល់ទះក្រសួងមហាផ្ទៃ ក្នុងព្រឹត្តិការណ៍ពានរង្វាន់អាយអេសអាយផាប។ បន្ទាប់មករូបគេបានចូលរួមប្រកួតពានរង្វាន់ World Police & Fire Games 2023, ពានរង្វាន់សម្តេចក្រឡាហោម ស ខេង លីគបាល់ទះកំពូលកម្ពុជា និងពានរង្វាន់ Special Volleyball Cup។

ឆ្នាំ២០២៤ ស្រេង កែវលីហួរ ត្រូវបានកោះហៅចូលជម្រើសជាតិកម្ពុជាអាយុ២០ឆ្នាំទៅប្រកួតជម្រុះ ជើងឯកអាស៊ី ASIAN MEN’S U20 នៅប្រទេសថៃ និងប្រកួតពានរង្វាន់ប៉ូលិស នៅប្រទេសវៀតណាមកាលពីពីរខែមុន ប៉ុន្តែរូបគេត្រូវបានកោះចូលរួមជម្រើសជាតិក្រុមធំដែលប្រកួតបានរង្វាន់ SEA V. League Challenge ឆ្នាំ២០២៤ទេ៕