សម្ដេច ហ៊ុន សែន ចង់ឃើញកម្ពុជា និងថៃ ស្នើចុះបញ្ជីរួមគ្នាលើបេតិកភណ្ឌមួយចំនួន

សម្ដេចតេជោ ហ៊ុន សែន បានបង្ហាញបំណងចង់ឃើញកម្ពុជា និងថៃ ស្នើទៅកាន់អង្គការយូនីស្កូ ដើម្បីចុះបញ្ជីរួមគ្នាលើ សម្បត្តិបេតិកភណ្ឌមួយចំនួន ជាជាងការដណ្ដើមគ្នាធ្វើម្ចាស់កម្មសិទ្ធិផ្ដាច់មុខ ខណៈប្រជាជាតិទាំងពីរ មានវប្បធម៌ និងទំនៀមទម្លាប់ស្រដៀងគ្នា។

បំណងរបស់សម្ដេចតេជោដូច្នេះ ស្របពេលដែលគេក្រោយសង្កេតឃើញថា ជារឿយៗតែងមានការវែកញែក​គ្នារវាងប្រជាជាតិទាំងពីរ កម្ពុជា និងថៃ ក្នុងការខ្វែងគំនិត ឬដណ្ដើមគ្នាទៅវិញទៅមក ថា ជារបស់ប្រទេសនេះ ជារបស់ប្រទេសនោះ ជាដើម។

ជំនួសឱ្យការដណ្ដើមកម្មសិទ្ធិគ្នានេះ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានស្នើឱ្យភាគីកម្ពុជា និងភាគីថៃ ពិចារណាលើការចុះបញ្ជីរួមគ្នាលើបេតិកភណ្ឌមួយចំនួន ក៏ដូចជាជាមួយប្រទេសមីយ៉ាន់ម៉ា និងឡាវ ដែលជាប្រទេសប្រកាន់ព្រះពុទ្ធសាសនា​ដូចគ្នា ចៀសវាងការដណ្ដើមកម្មសិទ្ធិគ្នាទៅវិញទៅមក។ សម្ដេចតេជោ បានលើកជាឧទាហរណ៍ដូចជា ពិធីបុណ្យសង្ក្រាន្ត ជាដើម។ ជាការកត់សម្គាល់ កន្លងទៅ ក៏មានការខ្វែងគំនិតខ្លាំង ក្រោយមានការស្នើរបស់ភាគីថៃ ដាក់ «សង្ក្រាន្តថៃ» ទៅក្នុងបញ្ជីអង្គការយូនីស្កូ ផងដែរ។

សម្ដេចតេជោ ហ៊ុន សែន បានបញ្ជាក់ថា​ «ប្រសិនបើយើងអាចចុះបញ្ជីរួមគ្នាបានមែននោះ វាជាការបង្ហាញពីការសាមគ្គីភាព និងជាគំរូដ៏ល្អដល់អ្នកជំនាន់ក្រោយ ដើម្បីកុំឱ្យមានការដណ្ដើមគ្នា ថា ជារបស់ជារបស់ប្រទេសនេះ របស់ប្រទេសនោះ»។ ការលើកឡើងរបស់សម្ដេចតេជោបែបនេះ នៅក្នុងឱកាសទទួលជួប និងជម្រាបលាពីសំណាក់លោក ឆឺតគៀត អាត់ថាកន (Cherdkiat ATTHAKOR) ឯកអគ្គរាជទូតថៃប្រចាំកម្ពុជា​ ដែលនឹងត្រូវចប់អាណត្តិការទូត នាព្រឹកថ្ងៃទី០៣ ខែកញ្ញា ឆ្នាំ២០២៤ នៅវិមានព្រឹទ្ធសភា។

សម្ដេចតេជោ បានបន្តថា កម្ពុជា និងថៃ ជាប្រទេសជិតខាងនឹងគ្នាដែលមានវប្បធម៌ និងទំនៀមទម្លាប់ស្រដៀងគ្នា ហើយការទៅមករកគ្នារវាងប្រទេសទាំងពីរ ក៏ត្រូវបានបើកទូលាយបន្ថែមទៀត ដើម្បីឱ្យប្រជាជនប្រទេសទាំងពីរមានឱកាសទៅធ្វើទស្សនកិច្ចស្វែងយល់ផ្សេងៗ រួមទាំងការទៅពិនិត្យព្យាបាលជំងឺ ជាដើម។

លោក ឆឺតគៀត អាត់ថាកន ឯកអគ្គរាជទូតថៃបានជម្រាបជូនសម្ដេចតេជោ ថា ក្នុងរយៈពេលជិត២ឆ្នាំនៃអាណត្តិការទូតរបស់លោក បានចូលរួមពង្រឹងទំនាក់ទំនង ដោយផ្អែកលើការយោគយល់គ្នា និងជំនឿទុកចិត្តទៅវិញទៅមក ដើម្បីផលប្រយោជន៍ប្រទេស និងប្រជាជននៃប្រទេសទាំងពីរដែលបានក្លាយជាដៃគូយុទ្ធសាស្ត្រកាលពីខែកុម្ភៈឆ្នាំ២០២៤ កន្លងទៅនេះ ក្នុងឱកាសដំណើរទស្សនកិច្ចរបស់សម្ដេចធិបតី នាយករដ្ឋមន្ត្រី ទៅកាន់ប្រទេសថៃ។

លោកឯកអគ្គរាជទូត បានបញ្ជាក់ថា ប្រទេសទាំងពីរមានទំនាក់ទំនងយ៉ាងជិតស្និទ្ធ ហើយលោកសង្ឃឹមថា ពេលអនាគត ទំនាក់ទំនងលើគ្រប់វិស័យរវាងប្រទេសទាំងពីរ នឹងកាន់តែរីកចម្រើនលូតលាស់ជាងនេះទៅទៀត៕