ព័ត៌មានជាតិ

លោក ស៊ុន ចាន់ថុល ចុចឈ្មោះក្រុមហ៊ុនអាមេរិកធំៗចំនួន ២ ទទួលជោគជ័យវិនិយោគនៅកម្ពុជា

បានផុស

៤ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

នៅក្នុងជំនួបពិភាក្សាការងារជាមួយភារធារីស្ថានទូតអាមេរិកប្រចាំនៅព្រះរាជាណាចក្រកម្ពុជា លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានបង្ហាញឈ្មោះក្រុមហ៊ុនអាមេរិកធំៗមួយចំនួន ដែលទទួលបានជោគជ័យក្នុងការបណ្តាក់ទុនវិនិយោគនៅកម្ពុជា។

នៅចំពោះមុខលោកស្រី Bridgette L. Walker ភារធារីស្ថានទូតអាមេរិកប្រចាំនៅព្រះរាជាណាចក្រកម្ពុជា លោក ស៊ុន ចាន់ថុល ក្រៅពីបង្ហាញការស្វាគមន៍ដល់គណៈប្រតិភូនៃស្ថានទូតអាម៉េរិក ក៏បានលើកបង្ហាញពីការបណ្តាក់ទុនរកស៊ីរបស់ក្រុមហ៊ុនអាមេរិកមួយចំនួននៅកម្ពុជានាពេលកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន ចាន់ថុល បានលើកឈ្មោះក្រុមហ៊ុនធំៗរបស់អាមេរិកចំនួនពីរ ដែលទទួលបានជោគជ័យលើការវិនិយោគនៅកម្ពុជាដូចជា ក្រុមហ៊ុនផលិតភេសជ្ជៈ Coca Cola ក្នុងតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ និងក្រុមហ៊ុន RMA Automotive (Cambodia) Co., Ltd ដែលដំឡើងរថយន្តម៉ាក FORD ក្នុងខេត្តពោធិ៍សាត់ជាដើម។

ក្នុងឱកាសនោះ លោកឧបនាយករដ្ឋមន្រ្តីក៏បានជម្រាបដល់ភារធារីស្ថានទូតអាមេរិក អំពីគម្រោងបេសកកម្មគោះទ្វារវិនិយោគិននៅសហរដ្ឋអាម៉េរិករបស់ក្រុមប្រឹក្សាអភិវឌ្ឍន៍កម្ពុជានៅក្នុងខែកញ្ញា ឆ្នាំ២០២៤នេះ សំដៅផ្សព្វផ្សាយពីបរិយាកាសវិនិយោគនៅកម្ពុជា និងស្វែងរកការបណ្ដាក់ទុនពីក្រុមហ៊ុនអាម៉េរិកមកកម្ពុជាបន្ថែមទៀត។

ជាមួយគ្នានោះ ឆ្លើយតបទៅកាន់លោកស្រី Bridgette L. Walker ដែលបានសាកសួរអំពីវិស័យជាគោលដៅដែលរាជរដ្ឋាភិបាលព្យាយាមទាក់ទាញការវិនិយោគបន្ថែម លោក ស៊ុន ចាន់ថុល ក៏បានបង្ហាញអំពីវិស័យគន្លឹះរួមមានជាអាទិ៍ វិស័យយានយន្ត គ្រឿងបង្គុំអេឡិចត្រូនិក និងវិស័យកសិឧស្សាហកម្មជាដើម ដែលសុទ្ធសឹងជាវិស័យនឹងបង្កើនតម្លៃបន្ថែមដល់សេដ្ឋកិច្ចកម្ពុជា។

តាមស្ថិតិជញ្ជីងពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា ក្នុងរយៈពេល ៦ ខែឆ្នាំ ២០២៤ ទំហំពាណិជ្ជកម្មរវាងកម្ពុជានិងអាមេរិកសម្រេចបានជាង ៤ ៥០០ លានដុល្លារអាមេរិក ពោលគឺកើនចំនួន ៤%។ អ្វីគួរឱ្យកត់សម្គាល់ ការនាំចេញទំនិញពីកម្ពុជាទៅកាន់ទីផ្សារសហរដ្ឋអាមេរិកគឺមានទំហំទឹកប្រាក់សរុប ៤ ៤០០ លានដុល្លារ ខណៈការនាំចូលទំនិញពីអាមេរិកមកកម្ពុជាមានប្រមាណតែជាង ១០០ លានដុល្លារប៉ុណ្ណោះ៕