ព័ត៌មានជាតិ

ផ្លូវបេតុងឆ្អឹងដែក ប្រវែងជាង ១ ពាន់ម៉ែត្រ នៅភូមិព្រៃទា ១ បានស្ថាបនារួចរាល់

បានផុស

៥ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

ដោយឃើញថា ផ្លូវលំមួយខ្សែ នៅភូមិព្រៃទា ១ សង្កាត់ចោមចៅទី ៣ ខណ្ឌពោធិ៍សែនជ័យ មានការទ្រុឌទ្រោម ពិបាកធ្វើដំណើរដល់ប្រជាពលរដ្ឋ ពិសេសសិស្សានុសិស្សផងនោះ រដ្ឋបាលសង្កាត់ចោមចៅទី ៣ ដាក់គ្រឿងចក្រឈូសឆាយស្ថាបនាជាផ្លូវបេតុងឆ្អឹងដែក ពេលនេះរួចរាល់បាន ១០០ ភាគរយហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វ៉ា សាវឿន ចៅសង្កាត់ចោមចៅទី ៣ បានឱ្យដឹងថា ផ្លូវខាងលើមានការទ្រុឌទ្រោមពិបាកដល់ប្រជាពលរដ្ឋប្រកបរបរផ្សេងៗ ជាពិសេសសិស្សានុសិស្សដែលធ្វើដំណើរទៅសាលារៀន ទើបនៅថ្ងៃទី ២០ ខែសីហា ឆ្នាំ ២០២៤ កន្លងទៅ លោកបានដឹកនាំក្រុមការងារចុះពិនិត្យជាក់ស្ដែង និងបានដាក់គ្រឿងចក្រឈូសឆាយស្ថាបនាផ្លូវលំមួយខ្សែនោះឱ្យប្រែក្លាយជាផ្លូវបេតុងឆ្អឹងដែក ដើម្បីពលរដ្ឋប្រើប្រាស់រហូតពេលនេះគឺស្ថាបនារួចរាល់ ១០០ ភាគរយហើយ។

លោក វ៉ា សាវឿន ចៅសង្កាត់ចោមចៅទី ៣ បន្តថា ការស្ថាបនាចាក់ផ្លូវបេតុងខាងលើនេះ ស្ថិតនៅក្នុងភូមិព្រៃទា ១ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។ ផ្លូវនេះមានប្រវែងបណ្ដោយ ១ ៣០០ ម៉ែត្រ ទទឹង ៤ ម៉ែត្រកន្លះ ដោយចាក់បេតុងឆ្អឹងដែកកម្រាស់ ១ តឹកកន្លះ ប្រើប្រាស់ថវិកាមូលនិធិអភិវឌ្ឍន៍សង្កាត់ក្នុងឆ្នាំ ២០២៤។

ជាមួយគ្នានេះ លោកចៅសង្កាត់ក៏បានសំណូមពរដល់ប្រជាពលរដ្ឋទាំងអស់ ជួយថែរក្សាវេចខ្ចប់ទុកដាក់សំរាមក្នុងធុងឱ្យបានត្រឹមត្រូវ ជៀសវាងធ្លាក់ចូលលូ បង្កការស្ទះចរន្តទឹកហៀរចេញ និងដក់លើដងផ្លូវងាយរងការខូចខាត៕

អត្ថបទ ៖ សុខា