ព័ត៌មានជាតិ

មូលនិធិជនពិការ ចេញសេចក្ដីប្រកាសព័ត៌មានជុំវិញសកម្មភាពដើររៃអង្គាសថវិកាតាមស្តុប ផ្សារ និងទីកន្លែងសាធារណៈ

បានផុស

៣ សប្តាហ៍ មុន

នៅ

ថ្ងៃពុធ ៤ កញ្ញា ២០២៤

ដោយ

ក្រុមការងារអ្នកនាំពាក្យរបស់មូលនិធិជនពិការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានចេញសេចក្ដីប្រកាសព័ត៌មាន ដើម្បីកុំឲ្យមានការភាន់ច្រឡំពីសំណាក់សាធារណជនលើសកម្មភាពបុគ្គលឯកជនមួយចំនួនដើររៃអង្គាសថវិកាតាមស្តុប ផ្សារ តំបន់ទេសចរណ៍ និងទីកន្លែងសាធារណៈនានា ដោយប្រើប្រាស់ឈ្មោះ«មូលនិធិជនពិការ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសេចក្ដីប្រកាសព័ត៌មាន ចុះថ្ងៃទី ០២ ខែកញ្ញា ឆ្នាំ ២០២៤ ថ្មីៗ នេះ បានឲ្យដឹងថា ក្រុមការងារអ្នកនាំពាក្យរបស់មូលនិធិជនពិការ មានកិត្តិយសសូមជម្រាបជូនសាធារណជនទាំងអស់មេត្តាជ្រាបថា កន្លងមកនេះ មានការភាន់ច្រឡំពីសំណាក់សាធារណជនលើសកម្មភាពរបស់បុគ្គលឯកជនមួយចំនួនដើររៃអង្គាសថវិកានៅតាមស្តុប ផ្សារ តំបន់ទេសចរណ៍ និងទីកន្លែងសាធារណៈនានា ដោយបានប្រើប្រាស់ឈ្មោះ «មូលនិធិជនពិការ» ដាក់នៅលើហិបរៃអង្គាសថវិការបស់ខ្លួន។

សេចក្ដីប្រកាសព័ត៌មាន ដដែលបន្តថា មូលនិធិជនពិការ គឺជាគ្រឹះស្ថានសាធារណៈរដ្ឋបាលរបស់រដ្ឋ គឺមិនមានកម្មវិធីដើរចល័តរៃអង្គាសថវិកានៅតាមទីតាំងខាងលើទេ ដែលនេះវាធ្វើឲ្យប៉ះពាល់ដល់សណ្ដាប់ធ្នាប់សាធារណៈ។

សេចក្ដីប្រកាសព័ត៌មាន ដដែលបន្ថែមថា មូលនិធិជនពិការ មានភារកិច្ចក្នុងការកៀរគរថវិកាសម្រាប់យកមកជួយដល់ជនមានពិការភាពក្រីក្រតាមរយៈការដាក់ហិបប្រាក់វិភាគទានសប្បុរសធម៌មូលនិធិជនពិការដែលមាន ឈ្មោះ និងរូបសញ្ញារបស់មូលនិធិជនពិការនៅលើហិបទាំងនោះ ស្របតាមបែបបទ និងនីតិវិធីដែលមានចែង។ ការដាក់ហិបប្រាក់វិភាគទានសប្បុរសធម៌នេះ គឺមូលនិធិជនពិការបានដាក់នៅតាមវត្តអារាម ទីសក្ការបូជា ផ្សារ រមណីយដ្ឋាន ភោជនីយដ្ឋាន ធនាគារ សណ្ឋាគារ កាស៊ីណូ និងរោងចក្រ។

ទន្ទឹមនេះ មូលនិធិជនពិការ បានអំពាវនាវដល់បុគ្គលឯកជនដែលដើររៃអង្គាសថវិកានៅតាមស្តុប និងទីកន្លែងសាធារណៈផ្សេងៗ ត្រូវបញ្ឈប់ការប្រើប្រាស់ឈ្មោះ «មូលនិធិជនពិការ» នៅលើហិប ឬផ្ទាំងបដាផ្សេងៗ របស់ខ្លួន។

ជាមួយគ្នានេះ មូលនិធិជនពិការ ក៏បានស្នើដល់អាជ្ញាធរមានសមត្ថកិច្ច សូមមេត្តាជួយអន្តរាគមន៍ និងចាត់វិធានការតាមផ្លូវច្បាប់ ក្នុងករណីឃើញមានក្រុមណាមួយប្រើប្រាស់ឈ្មោះ «មូលនិធិជនពិការ» ដើររៃអង្គាសថវិកានៅតាមស្តុប ឬ ផ្លូវចរាចរណ៍សាធារណៈនានា ដើម្បីជៀសវាងការភាន់ច្រឡំ និងធ្វើឲ្យប៉ះពាល់ដល់កិត្តិយសរបស់មូលនិធិជនពិការ៕

អត្ថបទ ៖ សុភា