ព័ត៌មានជាតិ

កម្ពុជា នឹងទទួលបានឥណទានសម្បទានប្រមាណ៥៥ លានដុល្លារ ពីជប៉ុន

បានផុស

៥ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

កម្ពុជា-ជប៉ុន នឹងចុះហត្ថលេខាលើលិខិតប្តូរសារ និងឯកសារពាក់ព័ន្ធស្តីពីការផ្តល់ឥណទានសម្បទានប្រាក់យ៉េន ដែលមានទឹកប្រាក់សរុប ៧.៩៨៨ លានយ៉េន (គិតជាដុល្លារប្រមាណ ៥៥ លានដុល្លារអាមេរិក) នៅថ្ងៃទី០៦ ខែកញ្ញា ឆ្នាំ២០២៤។ នេះបើតាមសេចក្ដីជូនដំណឹងរបស់ក្រសួងការបរទេស និងសហប្រតិបត្តិការអន្តរជាតិ ចេញនៅថ្ងៃទី០៤ ខែកញ្ញា ឆ្នាំ២០២៤។

(រូបថតឯកសារ៖ លោក សុខ ចិន្តាសោភា ប្រមុខការបរទេស ចុះហត្ថលេខាជាមួយលោកឯកអគ្គរដ្ឋទូតជប៉ុន UENO Atsushi លើលិខិតប្តូរសារ និងឯកសារពាក់ព័ន្ធ ស្ដីពីការផ្ដល់ហិរញ្ញប្បទានឥតសំណងរបស់រដ្ឋាភិបាលជប៉ុន ប្រមាណ ៩,៧ លានដុល្លារអាមេរិក កាលពីថ្ងៃទី២៦ ខែតុលា ឆ្នាំ២០២៣។ រូបថត ក្រសួងការបរទេស។)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីចុះហត្ថលេខានេះ ធ្វើឡើងនៅទីស្តីការក្រសួងការបរទេស ក្រោមវត្តមានរបស់លោកឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស និងលោក UENO Atsushi ឯកអគ្គរាជទូតជប៉ុនប្រចាំកម្ពុជា។

ឥណទានសម្បទាននេះ កម្ពុជា នឹងយកមកអនុវត្តន៍លើ “គម្រោងពង្រីកប្រព័ន្ធខ្សែបញ្ជូន និងចែកចាយក្នុងរាជធានីភ្នំពេញ” ដំណាក់កាលទី២។

(រូបថតឯកសារ៖ លោក សុខ ចិន្តាសោភា ប្រមុខការបរទេស ក្នុងពិធីចុះហត្ថលេខាជាមួយលោកឯកអគ្គរដ្ឋទូតជប៉ុន UENO Atsushi លើលិខិតប្តូរសារ និងឯកសារពាក់ព័ន្ធ ស្ដីពីការផ្ដល់ហិរញ្ញប្បទានឥតសំណងរបស់រដ្ឋាភិបាលជប៉ុន ប្រមាណ ៩,៧ លានដុល្លារអាមេរិក កាលពីថ្ងៃទី២៦ ខែតុលា ឆ្នាំ២០២៣។ រូបថត ក្រសួងការបរទេស។)

ជាការកត់សម្គាល់ ការផ្ដល់ឥណទានសម្បទាននេះ បានកើតឡើងក្រោយ វត្តមាននៃការអញ្ជើញមកបំពេញទស្សនកិច្ច របស់រដ្ឋមន្ត្រីការបរទេសជប៉ុន លោកស្រី ខាមីខាវ៉ា យ៉ូកុ នៅប្រទេសកម្ពុជា កាលពីខែកក្កដា ឆ្នាំ២០២៤ កន្លងទៅថ្មីៗនេះ។

(រូបថតឯកសារ៖ លោកស្រី ខាមីខាវ៉ា យ៉ូកុ រដ្ឋមន្ត្រីការបរទេសជប៉ុន ចាប់ដៃជាមួយលោក សុខ ចិន្តាសោភា រដ្ឋមន្ត្រីការបរទេសកម្ពុជា ក្នុងដំណើរបំពេញទស្សនកិច្ចនៅកម្ពុជា កាលពីថ្ងៃទី០៦ ខែកក្កដា ឆ្នាំ២០២៤ ថ្មីៗនេះ។**រូបថត KPT/ ISHIKAWA.)**

សូមរម្លឹកបន្ថិចថា កាលពីខែតុលា ឆ្នាំ២០២៣ កន្លងទៅ ជប៉ុន បានផ្ដល់ហិរញ្ញប្បទានឥតសំណងរបស់រដ្ឋាភិបាលជប៉ុន ដែលមានទឹកប្រាក់ចំនួន ១.៣៣៨ លានយ៉េន ប្រមាណ ៩,៧ លានដុល្លារអាមេរិក ដើម្បីអនុវត្តគម្រោងសម្រាប់ការកសាងបណ្តាញស្ថានីយវាស់វែងអចិន្ត្រៃយ៍ដោយផ្កាយរណបទូទាំងប្រទេស (ដើម្បីពន្លឿនការអង្កេតវាស់វែងសុរិយោដី និងពង្រឹងសេវារដ្ឋបាលពាក់ព័ន្ធនឹងការចុះបញ្ជីដីធ្លី)។ បន្ទាប់មក នៅថ្ងៃទី១៣ ខែមិនា ឆ្នាំ២០២៤ ជប៉ុន បានផ្ដល់ឥណទានសម្បទានប្រមាណ ១៥៤លានដុល្លារ សម្រាប់អនុវត្តគម្រោងអភិវឌ្ឍន៍មន្ទីរពេទ្យក្នុងតំបន់។

(រូបថតឯកសារ៖ លោក សុខ ចិន្ដាសោភា និងលោក កុមឺរ៉ា ម៉ាសាហ៊ីរ៉ូ អនុរដ្ឋមន្ត្រីក្រសួងការបរទេសជប៉ុន ចុះហត្ថលេខាលើលិខិតប្តូរសារនិងឯកសារពាក់ព័ន្ធស្តីពីការផ្តល់ឥណទានសម្បទានប្រមាណ១៥៤លានដុល្លារ សម្រាប់អនុវត្តគម្រោងអភិវឌ្ឍន៍មន្ទីរពេទ្យក្នុងតំបន់នៅក្រសួងការបរទេស កាលពីខែមិនា ឆ្នាំ២០២៤។)

គួរជម្រាបថា ថ្នាក់ដឹកនាំកម្ពុជា និងជប៉ុន បានព្រមព្រៀងគ្នាដំឡើងភាពជាដៃគូទៅជា«ដៃគូយុទ្ធសាស្ត្រគ្រប់ជ្រុងជ្រោយ» ។ ក្នុងឱកាសនៃកិច្ចប្រជុំកំពូលរំឭកខួប អនុស្សាវរីយ៍អាស៊ាន-ជប៉ុន ដើម្បីអបអរខួប៥០ឆ្នាំ នៃមិត្តភាព និងកិច្ចសហប្រតិបត្តិការអាស៊ាន- ជប៉ុន កាលពីខែធ្នូ ឆ្នាំ២០២៣ នៅទីក្រុងតូក្យូ រដ្ឋមន្រ្តីការបរទេសកម្ពុជា-ជប៉ុន បានបញ្ជាក់នូវការប្តេជ្ញាចិត្ត បន្តពង្រឹង និងពង្រីកបន្ថែមនូវទំនាក់ទំនងទ្វេភាគីនិងកិច្ចសហប្រតិបត្តិការរពហុវិស័យដែលកំពុងរីកចម្រើនរវាងប្រទេសទាំងពីរ រួមមានវិស័យនយោបាយ សេដ្ឋកិច្ច ហេដ្ឋារចនាសម្ព័ន្ធ ការពារជាតិ និងសន្តិសុខ ការបោសសម្អាតមីន ប្រតិបត្តិការក្សាសន្តិភាព ការផ្លាស់ប្តូររវាងប្រជាជន និងប្រជាជន ការអភិវឌ្ឍធនធាមនុស្ស ការអភិវឌ្ឍឌីជីថល និងសន្តិសុខអ៊ិនធឺណិត។

(រូបថតឯកសារ៖ សម្ដេចធិបតី ហ៊ុន ម៉ាណែត ចាប់ដៃជាមួយនាយករដ្ឋមន្ត្រីជប៉ុន លោក គីស៊ីដា ហ្វីមីអូ កាលពីថ្ងៃទី១៨ ខែធ្នូ ឆ្នាំ២០២៣។ ***រូបថត STPM.)***

តាមរយៈសេចក្ដីជូនដំណឹង នៅថ្ងៃទី០៤ ខែកញ្ញា នេះ ក្រសួងការបរទេស ចាត់ទុកថា ការផ្តល់ឥណទានសម្បទានរបស់រដ្ឋាភិបាលជប៉ុន គឺបង្ហាញពីការប្តេជ្ញាចិត្តឥតងាករេរបស់ប្រទេសជប៉ុន ដើម្បីជួយដល់កិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលកម្ពុជា ក្នុងការលើកកម្ពស់ការ អភិវឌ្ឍសេដ្ឋកិច្ចសង្គម។ ការផ្តល់ឥណទានសម្បទាននេះក៏នឹងជួយពង្រឹង និងធ្វើឱ្យកាន់តែស៊ីជម្រៅ បន្ថែមទៀតនូវ “ភាពជាដៃគូយុទ្ធសាស្ត្រគ្រប់ជ្រុងជ្រោយ“ រវាងប្រទេសទាំងពីរផងដែរ។ ក្រសួងការបរទេសបន្ថែមដូច្នេះ៕

ដោយ៖ ង៉ិល ណារ៉ាត់