ក្រោយ ACU ប្រកាសរើសអ្នកសង្គតការណ៍ប្រឡងបាក់ឌុប ភ្លាមៗមានអ្នកចុះឈ្មោះរហូតដល់ជាង ២ពាន់នាក់

កាលពីល្ងាចថ្ងៃទី០៤ ខែកញ្ញា ម្សិលមិញនេះ អង្គភាពប្រឆាំងអំពើពុករលួយ(ACU) បានប្រកាសជ្រើសរើសអ្នកសង្គេតការណ៍ស្ម័គ្រចិត្តចំនួន ៣ ៣១៨នាក់ សម្រាប់សង្គេតការណ៍ប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) សម័យប្រឡង ០៨ តុលា ២០២៤។ ក្រោយការប្រកាសមិនបានប៉ុន្មានផង តួលេខអ្នកបានចុះឈ្មោះជាអ្នកសង្កេតការណ៍ស្ម័គ្រចិត្តសរុបមានចំនួន ២ ៥៥៤ នាក់ នេះបើគិតត្រឹមម៉ោង ៩៖៣០នាទីយប់ នាថ្ងៃដដែលនោះ។

ការជ្រើសរើសអ្នកសង្គេតការណ៍ស្ម័គ្រចិត្តនេះ នឹងឈប់ទទួលពាក្យ នៅថ្ងៃសុក្រទី១៣ ខែកញ្ញា ឆ្នា២០២៤ វេលាម៉ោង ២៤៖០០នាទី។ ចំណែក ការប្រកាសឈ្មោះអ្នកជាប់ គឺនៅថ្ងៃពុធ ទី១៨ ខែកញ្ញា ឆ្នាំ២០២៤។ ដោយឡែក នៅថ្ងៃអាទិត្យ ទី០៦ ខែតុលា នឹងមានការប្រជុំលើកដំបូងជាមួយក្រុមការងារមន្ត្រី ACU ដឹកនាំសង្គេតការណ៍ថ្នាក់មន្ត្រីរាជធានី-ខេត្ត ដើម្បីទទួលការណែនាំអំពីបទប្បញ្ញត្តិ តួនាទី ភារកិច្ចអ្នកសង្គេតការណ៍ស្ម័គ្រចិត្ត ព្រមទាំងប្រគល់បណ្ណ ជូនអ្នកសង្គេតការណ៍ស្ម័គ្រចិត្ត និងធ្វើការបែងចែកភារកិច្ច។

នៅពេលបំពេញភារកិច្ចជាអ្នកសង្គេតការណ៍រហូតដល់ថ្ងៃចប់ប្រឡង មន្ត្រី ACU នឹងផ្តល់ជូនវិញ្ញាបនបត្របញ្ជាក់ការចូលរួមសង្គេតការណ៍ប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៨ តុលា ២០២៤។ ព្រមទាំងថវិកា ចំនួន ១០០ ០០០រៀល សម្រាប់អ្នកសង្គេតការណ៍ម្នាក់ៗ៕