ព័ត៌មានជាតិ

ផ្លូវក្រវាត់ព្រំដែននៅសល់ប្រវែងជាង ១ ៣០០ គីឡូម៉ែត្រ រដ្ឋាភិបាលដាក់ផែនការបញ្ចប់ប្រើពេល ១០ ឆ្នាំ

បានផុស

៧ ខែ មុន

នៅ

ថ្ងៃសុក្រ ៦ កញ្ញា ២០២៤

ដោយ

សម្តេចធិបតី ហ៊ុន ម៉ាណែត បានគូសបញ្ជាក់ថា រដ្ឋាភិបាលបានដាក់ឲ្យអនុវត្តផែនការស្ថាបនាផ្លូវក្រវាត់ព្រំដែន ដែលនៅសល់ប្រវែងជាង ១ ៣០០ គីឡូម៉ែត្រ ឲ្យបញ្ចប់រួចរាល់ក្នុងរយៈពេល ១០ ឆ្នាំទៀត។

នៅក្នុងពិធីប្រគល់វិញ្ញាបនបត្រសម្បទាខាងវិជ្ជាជីវៈមេធាវីដល់សិស្សមេធាវី និងប្រគល់វិញ្ញាបនបត្រសុក្រឹតការវិជ្ជាជីវៈមេធាវីប្រមាណ ១ ៦៦០ នាក់ កាលពីម្សិលមិញ នាយករដ្ឋមន្ត្រីកម្ពុជាបានបញ្ជាក់ថា មកដល់ពេលនេះរាជរដ្ឋាភិបាលសម្រេចស្ថាបនាផ្លូវក្រវាត់ព្រំដែនបានប្រវែងជាង ១ ៣០០ គីឡូម៉ែត្រ នៅក្នុងប្រវែងសរុបជាង ២ ៦៦០ គីឡូម៉ែត្រ ហើយនៅសល់ ១,៣០០ គីឡូម៉ែត្រទៀត នឹងបញ្ចប់នៅក្នុងរយៈពេល ១០ ឆ្នាំ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«ផ្លូវក្រវាត់ព្រំដែនដែលមានប្រវែងជាង ២ ៦៦០ គីឡូម៉ែត្រ ឥលូវយើងធ្វើបាន ១ ៣០០ គីឡូម៉ែត្រ បានប្រមាណ ៥០ ភាគរយ នៅសល់ ១ ៣០០ គីឡូម៉ែត្រទៀត។ ១ ៣០០ គីឡូម៉ែត្រទៀត ខ្ញុំបានស៊ីញ៉េនៅចុងខែ ៧ នេះ នូវផែនការបញ្ចប់ក្នុងរយៈពេល ១០ ឆ្នាំ ក្នុងថវិកាជាង ២០០ លានដុល្លារ»។

ទាក់ទងការអភិវឌ្ឋហេដ្ឋារចនាសម្ព័ន្ធតាមបណ្តោយព្រំដែន សម្តេចនាយករដ្ឋមន្រ្តីក៏បានលើកឡើងពីមូលហេតុនៃការកៀរគរថវិកាពីពលរដ្ឋចូលរួមសាងសង់ផ្លូវក្រវាត់ព្រំដែន ដើម្បីឱ្យប្រជាពលរដ្ឋមានឱកាសចូលរួមដោយផ្ទាល់ក្នុងការការពារនិងអភិវឌ្ឍន៍នៅតំបន់ព្រំដែន។

សម្តេចបានអះអាងថា មកដល់ពេលនេះមានពលរដ្ឋជាង ៤០ ម៉ឺននាក់ បានចូលរួមថវិកាក្នុងមូលនិធិកសាងហេដ្ឋារចនាសម្ព័ន្ធផ្ដោតលើការកសាងផ្លូវក្រវាត់ព្រំដែន ហើយក្នុងមួយថ្ងៃមានពលរដ្ឋជាង ១ ម៉ឺននាក់ បានចូលរួមបរិច្ចាគថវិកា និងមានពលរដ្ឋនៅបន្តចូលរួមជាបន្តបន្ទាប់៕