លោក ប៉ែន បូណា៖ ការដុតបញ្ឆេះកំហឹងឱ្យពលរដ្ឋឈ្លោះគ្នា មិនហៅថាស្នេហាជាតិនោះទេ

លោក ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានលើកឡើងថា ការដុតបញ្ឆេះកំហឹងឱ្យពលរដ្ឋឈ្លោះគ្នា មិនហៅថាស្នេហាជាតិនោះទេ។

លោកបានលើកឡើងបែបនេះ ក្នុងឱកាសអញ្ជើញជាអធិបតី និងជាវាគ្មិនកិត្តិយសផ្តល់បាឋកថាស្តីពី «ការចូលរួមរបស់យុវជនដើម្បីឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០»  នៅសាកលវិទ្យាល័យជាតិគ្រប់គ្រង (NUM) កាលពីព្រឹកថ្ងៃទី៤ ខែកញ្ញា ឆ្នាំ២០២៤។

មន្ត្រីជាន់ខ្ពស់រូបនេះ បានបញ្ជាក់ថា «ប្រសិនបើយើងជាមនុស្ស ដែលទៅដល់ទីណានិយាយតែបង្កាច់បង្ខូច បន្ទាបបន្ថោកប្រទេសខ្លួនឯង ហើយធ្វើគ្រប់បែបយ៉ាងកុំឱ្យអ្នកទេសចរ ឬអ្នកវិនិយោគមកលេងប្រទេសរបស់ខ្លួនឯងនោះ មិនមែនជាមនុស្សដែលមានប្រយោជន៍សម្រាប់ជាតិនោះទេ»។ លើសពីនេះ ការដុតបញ្ឆេះកំហឹង ធ្វើឱ្យប្រជាពលរដ្ឋផ្ទុះកំហឹងខឹងរាជរដ្ឋាភិបាល ធ្វើឱ្យទេសចរមិនមកលេងស្រុក ធ្វើឱ្យអ្នកវិនិយោគមិនមកវិនិយោគប្រទេសខ្លួនឯង ក៏មិនហៅថាជាការស្នេហាជាតិនោះដែរ។

លោកថា យុវជនត្រូវធ្វើខ្លួនឱ្យក្លាយជាមូលធនមនុស្ស ដូចដែលរាជរដ្ឋាភិបាលចង់បាន ដើម្បីផលប្រយោជន៍ជាតិ និងជាមនុស្សមានតម្លៃសម្រាប់ជាតិ។ មនុស្សដែលមានប្រយោជន៍សម្រាប់ជាតិ ជាមនុស្សដែលមានសមត្ថភាព មានឆន្ទៈខ្លាំងក្លា ធ្វើការងារបានលឿរហ័ស ចេះសម្របខ្លួនជាមួយអ្នកជិតខាង ជាមួយសង្គម ក្រុមគ្រួសារ ធ្វើការចុះសម្រុងជាមួយអ្នកដ៏ទៃ ហើយធ្វើការប្រកបដោយប្រសិទ្ធភាព និងផលិតភាពខ្ពស់។

ចំណែក មនុស្សដែលមានតម្លៃសម្រាប់ប្រទេសជាតិ គឺជាមនុស្សដែលទៅដល់ទីណាតែងតែលើកមុខមាត់ប្រទេសជាតិ លើកកិត្តិយស សេចក្តីថ្លៃថ្នូ ការអភិវឌ្ឍរីកចម្រើនក្នុងប្រទេស រួមទាំងអ្វីដែលល្អៗដែលកើតមានក្នុងប្រទេសរបស់ខ្លួន លើកស្ទួយកិត្យានុភាពជាតិមោទនភាពជាតិ។ មិនថាទៅដល់ទីណាពួកគេតែងលើកទង់ជាតិរបស់ប្រទេសនៅទីនោះ ដើម្បីបង្ហាញឱ្យបរទេសឃើញថា ប្រទេសកម្ពុជាមានអ្វីដែលល្អ គួរជាទីទាក់ទាញ ដែលអ្នកទេសចរគួរទៅលេង និងបោះទុនវិនិយោគ។

លោកបានបន្ថែមថា «សង្គមណាក៏ដោយក៏មានបញ្ហាដែរ តែសំខាន់យើងខ្លួនឯងដែលជាមូលធនមនុស្ស ជាយុវជនត្រូវចូលរួមបំពេញបន្ថែមដើម្បីកែលម្អចំណុចខ្វះខាត និងជួយបំពេញបន្ថែមឱ្យសង្គមមានការវិវត្តន៍កាន់តែល្អប្រសើរ» ហើយនេះគឺជាការចូលរួមចំណែកដ៏សំខាន់មួយ៕

អត្ថបទ៖ គេន ម៉ាលិះ