មន្ត្រីយោធាមីយ៉ាន់ម៉ា អរគុណកម្ពុជាដែលបានរួមចំណែកជួយដោះស្រាយវិបត្តិនៅមីយ៉ាន់ម៉ា

មន្ត្រីយោធាមីយ៉ាន់ម៉ា អរគុណរាជរដ្ឋាភិបាលកម្ពុជាដែលបានរួមចំណែកជួយស្វះស្វែងរកដំណោះស្រាយសម្រាប់វិបត្តិនៅមីយ៉ាន់ម៉ា កន្លងមក ក៏ដូចជាបច្ចុប្បន្ន។ ការលើកឡើងរបស់មន្ត្រីយោធាមីយ៉ាន់ម៉ា ធ្វើឡើងនៅក្នុងពិភាក្សាការងារទ្វេភាគីជាមួយនាយឧត្ដមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ។

ឆ្លៀតក្នុងឱកាសចូលរួមកិច្ចប្រជុំអគ្គមេបញ្ជាការកងទ័ពអាស៊ាន លើកទី២១ នៅប្រទេសឡាវ លោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានជួបពិភាក្សាជាមួយប្រធានគណៈប្រតិភូកងទ័ពមីយ៉ាន់ម៉ា ដឹកនាំដោយឧត្តមសេនីយ៍ឯក ស៊ូ មីនអូ អគ្គសេនាធិការរងនៃកងទ័ពមីយ៉ាន់ម៉ា នារសៀលថ្ងៃទី៥ ខែកញ្ញា ឆ្នាំ២០២៤ នៅរដ្ឋធានីវៀងច័ន្ទ។  

នៅក្នុងជំនួបនេះ ឧត្តមសេនីយ៍ឯក ស៊ូ មីនអូ បានរម្លឹកអំពីទំនាក់ទំនងការទូត និងកិច្ចសហប្រតិបត្តិការដ៏យូរអង្វែងរវាងកម្ពុជា និងមីយ៉ាន់ម៉ា និងបានថ្លែងអរគុណដល់រាជរដ្ឋាភិបាលកម្ពុជាដែលបានរួមចំណែកដ៏មានតម្លៃដល់មីយ៉ាន់ម៉ា ព្រមទាំងបានបង្ហាញពីការបេ្តជ្ញាចិត្តជំរុញទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ និងជិតស្និទ្ធបន្ថែមទៀត ទាំងក្នុងក្របខណ្ឌទ្វេភាគី ពហុភាគី ក៏ដូចជាក្នុងក្របខណ្ឌអាស៊ាន។

នាយឧត្ដមសេនីយ៍ វង្ស ពិសេន បានអរគុណដល់កងទ័ពមីយ៉ាន់ម៉ា ដែលបានទៅចូលរួមក្នុងកិច្ចប្រជុំអគ្គមេបញ្ជាការកងទ័ពអាស៊ាន លើកទី១៩ នៅទីក្រុងភ្នំពេញ កាលពីឆ្នាំ២០២២ ដោយចាត់ទុកវត្តមានរបស់មីយ៉ាន់ម៉ានាពេលនោះ ថា បានរួមចំណែកយ៉ាងធំធេងធ្វើឱ្យកិច្ចប្រជុំប្រព្រឹត្តទៅប្រកបដោយជោគជ័យ និងបានចុះហត្ថលេខាលើសេចក្តីថ្លែងការណ៍រួមក្នុងបរិយាកាសស្និទ្ធស្នាល និងរីករាយ។

លើការទំនាក់ទំនងពង្រឹងកិច្ចសហប្រតិបត្តិការវិស័យការពារជាតិ នាយឧត្ដមសេនីយ៍ វង្ស ពិសេន ចង់ឱ្យកងទ័ពប្រទេសទាំងពីរបន្តការផ្លាស់ប្តូរទស្សនកិច្ច ការបណ្តុះបណ្តាលធនធានមនុស្ស ការផ្លាស់ប្តូរព័ត៌មានចារកិច្ច សំដៅប្រឆាំងភេរវកម្ម ទប់ស្កាត់បទល្មើសឧក្រិដ្ឋកម្មឆ្លងដែន និងបង្កើនកិច្ចសហប្រតិបត្តិការរវាងប្រភេទទ័ព សកម្មភាពផ្សេងៗ ដែលបម្រើផលប្រយោជន៍រួមរវាងប្រទេស ប្រជាជន និងកងទ័ពទាំងពីរ។

លោកអគ្គមេបញ្ជាការ បន្តថា ក្នុងនាមជាបងប្អូនរួមតំបន់ កម្ពុជានៅតែបន្តប្តេជ្ញាធ្វើការរក្សាសាមគ្គីភាពអាស៊ាន១០ ហើយអាចក្លាយទៅជាអាស៊ាន១១ នាពេលខាងមុខ រួមចំណែកក្នុងការកសាងសន្តិភាព ស្ថិរភាព វិបុលភាព និងការអភិវឌ្ឍនៃប្រជាជាតិអាស៊ីអាគ្នេយ៍ជានិរន្ត៕