ប្រជាពលរដ្ឋជាង ២០០ នាក់ ធ្វើដំណើរទស្សនកិច្ចព្រំដែន ខេត្តត្បូងឃ្មុំ ក្រចេះ មណ្ឌលគិរី

ប្រជាពលរដ្ឋជាង ២០០ នាក់ ដំណើរទស្សនកិច្ចសិក្សា មកកាន់តំបន់ឦសាន ដើម្បីបានឃើញការអភិវឌ្ឍនៅតាមព្រំដែន ក្នុងភូមិសាស្ត្រខេត្តត្បូងឃ្មុំ ក្រចេះ និងមណ្ឌលគិរី។ ដំណើរទស្សនកិច្ចសិក្សានេះ ដឹកនាំដោយ លោក នេត្រ ភក្ត្រា រដ្ឋមន្ត្រីក្រសួងព័ត៌មាន។

ដំណើរទស្សនកិច្ចនេះ មានរយៈពេលមួយថ្ងៃពេញ ដោយប្រជាពលរដ្ឋ ព្រះសង្ឃ សិស្ស និស្សិត បានមកដល់ទីតាំងបង្គោលព្រំដែនលេខ១៣០ ក្នុងភូមិសាស្ត្រស្រុកពញាក្រែក ខេត្តត្បូងឃ្មុំ នាព្រឹកថ្ងៃ០៧ ខែកញ្ញា ឆ្នាំ២០២៤ នេះ។

ដំណើរទស្សនកិច្ចសិក្សានេះ ផ្តល់ឱកាសដល់ប្រជាពលរដ្ឋបានឃើញដោយផ្ទាល់នូវការអភិវឌ្ឍជាក់ស្តែងនៅតាមតំបន់ព្រំដែន ការកសាងហេដ្ឋារចនាសម្ព័ន្ធផ្លូវក្រវ៉ាត់ព្រំដែន និងការអភិវឌ្ឍជារួមរបស់ប្រជាពលរដ្ឋក្នុងភូមិភាគឦសាន។

គួរបញ្ជាក់ថា រាល់ការចំណាយលើការធ្វើដំណើរ អាហារ ភេសជ្ជៈ ជាដើម គឺផ្តល់ជូនដោយឥតគិតថ្លៃ ដែលឧបត្ថម្ភដោយ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី និងការចូលរួមចំណែកឧបត្ថម្ភពីសប្បុរសជន ដោយមិនប៉ះពាល់ដល់កញ្ចប់ថវិការដ្ឋ ឬកញ្ចប់ថវិកាមូលនិធិកសាងហេដ្ឋារចនាសម្ព័ន្ធតាមព្រំដែននោះឡើយ៕

អត្ថបទ៖ សាន វិឡែម