កម្មករនិយោជិត បន្តចូលរួមយ៉ាងផុសផុល ក្នុងមូលនិធិអភិវឌ្ឍតំបន់ព្រំដែន

កម្មករនិយោជិតដែលកំពុងបម្រើការងារនៅតាមរោងចក្រ សហគ្រាស គ្រឹះស្ថាននៅក្នុងខេត្តតាកែវ នៅថ្ងៃទី០៨ ខែកញ្ញា ឆ្នាំ២០២៤ បានចូលរួមបរិច្ចាគថវិកាដោយស្ម័គ្រចិត្តជូន «មូលនិធិកសាងហេដ្ឋារចនាសម្ព័ន្ធតាមព្រំដែន»យ៉ាងផុសផុល ដើម្បីគាំទ្រដល់ការអភិវឌ្ឍតំបន់ព្រំដែន។

កម្មករនិយោជិតដែលកំពុងបម្រើការងារនៅរោងចក្រ សហគ្រាស គ្រឹះស្ថាននៅក្នុងខេត្តតាកែវសរុបចំនួន ២៩៤ មានកម្មករនិយោជិតសរុបចំនួន ៨៥,៣៧០នាក់ (ស្រី ៦០,៨៣៩នាក់) បានលើកឡើងស្រដៀងគ្នាថា ការស្ម័គ្រចិត្តបរិច្ចាគថវិកានេះ ដើម្បីរួមចំណែកជាមួយរាជរដ្ឋាភិបាលក្នុងការការអធិបតេយ្យភាពកម្ពុជា។

អ្នកស្រី ស្រុង ស្រីឡាត់ កម្មការិនីរោងចក្រជីងម៉ៅហ្គូជី (ខេមបូឌា)ហ្គាម៉ិន នៅខេត្តតាកែវ បានសម្តែងការគាំទ្រចំពោះគម្រោងនេះ។ អ្នកស្រីបន្ថែមថា៖ «​ក្នុង​នាម​ជា​ពលរដ្ឋ​ខ្មែរ​ម្នាក់ ខ្ញុំ​ចង់​ចូល​រួម​ចំណែក​ក្នុង​ការ​អភិវឌ្ឍ​ប្រទេស​របស់​យើង​ដោយ​បរិច្ចាគ​ថវិកា​ផ្ទាល់​ខ្លួន​ដើម្បី​កសាង​ហេដ្ឋារចនាសម្ព័ន្ធ​ព្រំដែន»។

អ្នកស្រី សុទ្ធ សោភ័ណ្ឌ កម្មការិនីរោងចក្រ មេកូហ្វើនីឈ័រ ឯ.ក ក៏បានថ្លែងគាំទ្រគម្រោងនេះដោយនិយាយថា៖«ខ្ញុំចង់ចូលរួមមូលនិធិហ្នឹង គឺខ្ញុំចង់ឱ្យមានការអភិវឌ្ឍព្រំដែន ឱ្យមានភ្ញៀវទេសចរទៅកម្សាន្តនៅព្រំដែនហ្នឹងឱ្យបានច្រើន មានការវិនិយោគដែលធ្វើឱ្យប្រជាជនមានការងារធ្វើ មានតែការអភិវឌ្ឍព្រំដែនទេ ដែលធ្វើឱ្យព្រំដែនយើងរឹងមាំ»។

គួររំឭកថា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានសម្រេចបង្កើត«មូលនិធិកសាងហេដ្ឋារចនាសម្ព័ន្ធតាមព្រំដែន»កាលពីថ្ងៃទី២២ ខែសីហា ឆ្នាំ២០២៤ ក្នុងគោលបំណងដើម្បីកៀរគរថវិកាបន្ថែមសម្រាប់កសាងហេដ្ឋារចនាសម្ព័ន្ធតាមបណ្ដោយព្រំដែន ដោយផ្ដោតលើការកសាងផ្លូវក្រវាត់ព្រំដែន។

ជាមួយគ្នានោះ សម្តេចធិបតី ក៏បានផ្តល់ឱកាសឱ្យប្រជាពលរដ្ឋខ្មែរគ្រប់មជ្ឈដ្ឋាន ទាំងក្នុងនិងក្រៅប្រទេស បានចូលរួមចំណែកដោយផ្ទាល់ជាមួយរាជរដ្ឋាភិបាលនៅក្នុងបុព្វហេតុការពារ និងអភិវឌ្ឍជាតិ ក្នុងស្មារតីមហាសាមគ្គីជាតិខ្មែរ ដើម្បីថែរក្សា សុខសន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍនៅតាមតំបន់ព្រំដែនឱ្យបានកាន់តែរឹងមាំ និងប្រកបដោយចីរភាព។

គួរជម្រាបថា គិតត្រឹមថ្ងៃទី ០៥ ខែកញ្ញា មូលនិធិកសាងហេដ្ឋារចនាសម្ព័ន្ធតាមព្រំដែន មានពលរដ្ឋចូលរួមបរិច្ចាគជាង ៤០ ម៉ឺននាក់ ទទួលបានថវិកាសរុបជាង ១៩ លានដុល្លារ៕