សម្ដេចតេជោ អញ្ជើញដល់កូរ៉េខាងត្បូងដោយសុវត្ថិភាព ដើម្បីថ្លែងចែករំលែកបទពិសោធន៍រំដោះប្រទេសចេញពីភ្លើងសង្គ្រាម

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់របស់កម្ពុជា បានអញ្ជើញទៅដល់រដ្ឋធានីសេអ៊ូល ប្រទេសកូរ៉េ ប្រកបដោយសុវត្តិភាព នៅវេលាម៉ោង១៖២០នាទី ម៉ោងនៅរាជធានីភ្នំពេញ។ ដើម្បីចូលរួមវេទិកាចំណេះដឹងពិភពលោក (World Knowledge Forum) លើកទី២៥ ក្រោមមូលបទ មាគ៌ាឆ្ពោះទៅរកសហត្ថិភាព (Jounney Towards Coexistence) ពីថ្ងៃទី៩ ដល់ថ្ងៃទី១៣ ខែកញ្ញា ឆ្នាំ២០២៤ និងថ្លែងចែករំលែកបទពិសោធន៍ស្ដីពីការរំដោះប្រទេសជាតិចេញពីភ្នក់ភ្លើងសង្គ្រាម ដល់សាកលវិទ្យាល័យដុងហ្គុកវ៉ាយស៍។

បើតាមសេចក្ដីប្រកាសព័ត៌មានយន្តហោះពិសេសរបស់ព្រះរាជាណាចក្រកម្ពុជា ជើងហោះហើរលេខ០០១ បានធ្វើការចុះចតអាកាសយានដ្ឋានទ័ពអាកាសសេអ៊ូល ក្រោមវត្តមាននៃការទទួលបដិសណ្ឋារកិច្ចស្វាគមន៍យ៉ាងកក់ក្តៅបំផុត ពីថ្នាក់ដឹកនាំរដ្ឋសភាកូរ៉េ ថ្នាក់ដឹកនាំនៃវេទិកាចំណេះដឹងពិភពលោក និងឥស្សរជនការទូតរបស់ព្រះរាជាណាចក្រកម្ពុជា ប្រចាំប្រទេសកូរ៉េខាងត្បូងជាច្រើនរូប។

ដំណើរនៃការអញ្ជើញទៅកាន់ប្រទេសកូរ៉េ របស់សម្តេចតេជោប្រធានព្រឹទ្ធសភាកម្ពុជា គឺឆ្លើយតបតាមការអញ្ជើញរបស់ស្ថាបនិក នៃវេទិកាចំណេះដឹងពិភពលោក។ ក្នុងពេលនោះសម្តេចតេជោ និងថ្លែងសុន្ទរកថាគន្លឹៈពិសេសទៅកាន់វេទិកាចំណេះដឹងពិភពលោកលើកទី២៥ ក្រោមមូលបទ មាគ៌ាឆ្ពោះទៅរកសហត្ថិភាព និងវិបុលភាពក្នុងអាស៊ាន ។

 ក្នុងអំឡុងនៃការស្នាក់នៅទីក្រុងអ៊ីនធន់ សម្តេចតេជោ ប្រធានព្រឹទ្ធសភា និងមានជំនួបការងារជាមួយថ្នាក់ដឹកនាំសាធារណរដ្ឋកូរ៉េ រួមមានប្រធានាធិបតី ប្រធានសភា និងទទួលជួបតំណាងក្រុមហ៊ុនធំៗរបស់សាធារណរដ្ឋកូរ៉េ។ ជាមួយគ្នានេះ សម្តេចតេជោនិងបន្តដំណើរបំពេញទស្សនកិច្ចទៅកាន់ខេត្តឃ្យុងសាងបុកដូ ដើម្បីទទួលសញ្ញាបត្របណ្ឌិតកិត្តិ​យស ភាពជាអ្នកដឹកនាំ និងការកសាងសន្តិភាព ដែលរៀបចំដោយសាកលវិទ្យាល័យដុងហ្គុកវ៉ាយស៍។

 នៅក្នុងឱកាសនៃការទទួលសញ្ញាបត្របណ្ឌិតកិត្តិយសនោះ សម្តេចតេជោនិងធ្វើបាឋកថាស្តីពី បទពិសោធន៍របស់ប្រទេសកម្ពុជា ក្នុងការរំដោះជាតិ ការកសាងសន្តិភាព ការផ្សះផ្សា និងការកសាងជាតិឡើងវិញ ពីប្រទេសដែលហែកហួរដោយសង្រ្គាម និងវាលពិឃាដ មកជាប្រទេសជាតិដែលពោរពេញដោយសន្តិភាព ការរួមរស់ជាមួយគ្នា (សហត្ថិភាព) និងការអត់ឱន។ ជាមួយគ្នានេះសម្តេចតេជោ និងគណៈប្រតិភូ នឹងអញ្ជើញទស្សនាតំបន់ទេសចរណ៍បូមុន និងមជ្ឈមណ្ឌលពិព័រណ៍វប្បធម៌ពិភពលោក ឃ្យុងយូ នៅក្នុងខេត្តឃ្យុងសាងបុកដូ។

 សូមបញ្ជាក់ដែរថា គណៈប្រតិភូសភាពាណិជ្ជកម្មកម្ពុជា ដឹកនាំដោយអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ក៏បានអញ្ជើញអមដំណើរសម្តេចតេជោប្រធានព្រឹទ្ធសភា អញ្ជើញទៅកាន់សាធារណរដ្ឋកូរ៉េផងដែរ៕