អ៊ីរ៉ង់ ចង់ប្តូររដ្ឋធានីចេញពី តេហេរ៉ង់

រដ្ឋធានីសេដ្ឋកិច្ចនិងនយោបាយរបស់ប្រទេសអ៊ីរ៉ង់ គួរតែប្តូរទៅតំបន់ឆ្នេរជិតឈូងសមុទ្រពែក្សវិញ ព្រោះវាស្ថិតនៅជិតផ្លូវពាណិជ្ជកម្មសំខាន់ៗ។ នេះបើតាមការលើកឡើងរបស់ប្រធានាធិបតីថ្មីលោក Masoud Pezeshkian និងត្រូវបានចុះផ្សាយដោយសារព័ត៌មាន RT កាលពីថ្ងៃអាទិត្យទី៨ខែកញ្ញាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pezeshkian និយាយថា «ទីក្រុងតេហេរ៉ង់ កំពុងប្រឈមនឹងបញ្ហាដែលយើងមិនអាចដោះស្រាយបាន ហើយជម្រើសមានតែមួយគត់ នោះគឺត្រូវប្តូររដ្ឋធានីតែម្តង។ ទីតាំងរបស់តេហេរ៉ង់ ស្ថិតនៅភាគខាងជើងប្រទេស ជាហេតុធ្វើឲ្យទីក្រុងនេះ មិនអាចបន្តក្តាប់តំណែងជារដ្ឋធានីនិងការអភិវឌ្ឍលើវិស័យជាច្រើន ជាពិសេសសេដ្ឋកិច្ច ទៀតបាន។

លោកបន្តថា «ប្រទេស​មិន​អាច​រីក​ចម្រើន​បាន​ទេ បើនៅតែ​ប្រើ​វិធីសាស្ត្រ​បច្ចុប្បន្ន​។ អ៊ីរ៉ង់នឹងបាត់បង់សមត្ថភាពប្រកួតប្រជែង ប្រសិនបើខ្លួននៅតែបន្តនាំយកវត្ថុធាតុដើមពីកំពង់ផែនិងតំបន់ភាគខាងត្បូង ដឹកជញ្ជូនទៅទីក្រុងតេហេរ៉ង់ ហើយកែច្នៃវាទៅជាផលិតផល រួចបញ្ជូនត្រឡប់ទៅភាគខាងត្បូងវិញ ដើម្បីនាំចេញ។

មិនត្រឹមប៉ុណ្ណឹង លោក Pezeshkian សង្កត់ធ្ងន់ថា ស្ថាប័នរដ្ឋទាំងអស់ ក៏នឹងត្រូវប្តូរទីតាំងទៅកាន់រដ្ឋធានីថ្មីដែរ ប៉ុន្តែអ្នកក្រុងមានជម្រើស ចង់ដូរទៅក៏បាន មិនទៅក៏បាន។

យ៉ាងណាក្តី គេមិនច្បាស់ឡើយថាតើ គំនិតនេះអាចទៅរួចឬអត់។

សូមបញ្ជាក់ថា តេហេរ៉ង់ គឺជារដ្ឋធានីរបស់ប្រទេសអ៊ីរ៉ង់តាំងពីឆ្នាំ១៧៨៦មកម្ល៉េះ។ វាមានទីតាំងនៅភាគខាងជើងប្រទេស ចម្ងាយប្រហែល១០០គីឡូម៉ែត្រ ពីសមុទ្រ Caspian ហើយនេះមិនមែនទើបលើកដំបូងទេ ដែលអាជ្ញាធរអ៊ីរ៉ង់ ស្នើរើរដ្ឋធានីចេញពីទីក្រុងតេហេរ៉ង់។

ជាក់ស្តែង សំណើស្រដៀងគ្នានេះ ក៏ត្រូវបានលើកឡើងក្នុងអាណត្តិប្រធានាធិបតី Mahmoud Ahmadinejad ចន្លោះឆ្នាំ២០០៥ដល់២០១៣ផងដែរ ដោយពេលនោះ សភាបានបោះឆ្នោតបង្កើតក្រុមប្រឹក្សាពិសេសមួយដើម្បីស្វែងរកទីតាំងជំនួស ប៉ុន្តែចុងក្រោយការប្តូរត្រូវបរាជ័យ៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់ បដិសេធការ​ជ្រៀតជ្រែកក្នុង​​ការបោះឆ្នោត​អាមេរិក