រដ្ឋមន្រ្តីការពារជាតិកម្ពុជា នឹងចូលរួមវេទិកាពាក់ព័ន្ធសណ្តាប់ធ្នាប់អន្តរជាតិនៅប្រទេសចិន

ឧបនាយករដ្ឋមន្ត្រី ទៀ សីហា​ រដ្ឋមន្ត្រីក្រសួងការពារជាតិ នឹងដឹកនាំគណៈប្រតិភូយោធាជាន់ខ្ពស់ ចូលរួមវេទិកាប៉េកាំងសៀងសាន លើកទី១១ ដែលគ្រោងនឹងប្រព្រឹត្តទៅចាប់ពីថ្ងៃទី១២-១៤ ខែកញ្ញា ឆ្នាំ២០២៤ នៅទីក្រុងប៉េកាំង សាធារណរដ្ឋប្រជាមានិតចិន។ ការអញ្ជើញចូលរួមនេះ តបតាមការអញ្ជើញរបស់ លោក ដុង ជុន (Dong Jun) រដ្ឋមន្ត្រីការពារជាតិ នៃសាធារណរដ្ឋប្រជាមានិតចិន ។

សេចក្តីប្រកាសព័ត៌មានក្រសួងការពារជាតិ ចុះថ្ងៃទី ០៩ ខែកញ្ញា ឆ្នាំ ២០២៤ បានឱ្យដឹងថា នាឱកាសនោះ លោក ទៀ សីហា នឹងឡើងថ្លែងសុន្ទរកថាក្នុងសម័យប្រជុំពេញអង្គទី២ ស្តីពី «ពហុប៉ូល និងការវិវត្តសណ្តាប់ធ្នាប់អន្តរជាតិ»។
ក្នុងអំឡុងពេលនៃការចូលរួមវេទិកានេះដែរ លោករដ្ឋមន្ត្រីការពារជាតិ នឹងចូលជួបសម្តែងការគួរសម និងពិភាក្សាការងារទ្វេភាគីជាមួយ លោក ចាំង យូសៀរ អនុប្រធានទី១ គណៈកម្មការយោធាមជ្ឈិមចិន ដើម្បីជំរុញចំណងទំនាក់ទំនង មិត្តភាពដែកថែប និងកិច្ចសហប្រតិបត្តិការការពារជាតិ រវាងប្រទេសទាំងពីរឱ្យកាន់តែស៊ីជម្រៅថែមទៀត។
ជាមួយគ្នានោះ លោក ទៀ សីហា ក៏នឹងមានជំនួបទ្វេភាគីជាមួយរដ្ឋមន្ត្រីការពារប្រទេស នៃសាធារណរដ្ឋសង្គមនិយមវៀតណាម និងរដ្ឋមន្ត្រីការពារប្រទេសនៃសាធារណរដ្ឋប្រជាធិបតេយ្យប្រជាមានិត ឡាវ និងមានជំនួបទ្វេភាគី ជាមួយដៃគូសន្ទនាមួយចំនួនទៀត ដើម្បីពង្រឹងទំនាក់ទំនងកិច្ចសហប្រតិបត្តិការការពារជាតិ និងសន្តិសុខជាមួយគ្នាផងដែរ។

គណៈប្រតិភូអមដំណើរលោក ទៀ សីហា រួមមានមន្រ្តីជាន់ខ្ពស់ លោក ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស លោក ហ៊ុន ម៉ានិត អគ្គនាយក អគ្គនាយកដ្ឋានស្រាវជ្រាវ-ចារកិច្ច និងជាមេបញ្ជាការរងកងទ័ពជើងគោក លោក ចៅ ភិរិទ្ធ អគ្គនាយក អគ្គនាយកដ្ឋានសម្ភារៈបច្ចេកទេស ព្រមទាំងនាយទាហានជាន់ខ្ពស់ នៃកងយោធពលខេមរភូមិន្ទ មួយចំនួនទៀត។

គួររំឭកថា លោក ទៀ សីហា ធ្លាប់បំពេញទស្សនកិច្ចទៅកាន់ប្រទេសចិនរយៈពេលបួនថ្ងៃ ពោលគឺចាប់ពីថ្ងៃទី២៩ ខែ
តុលា រហូតដល់ថ្ងៃទី១ ខែ វិច្ឆិកា ឆ្នាំ២០២៣ ដើម្បីពិភាក្សាការងារជាមួយថ្នាក់ដឹកនាំជាន់ខ្ពស់របស់ក្រសួងការពារជាតិសាធារណរដ្ឋប្រជាមានិតចិន ក្នុងន័យបន្តពង្រឹង និងពង្រីកកិច្ចសហប្រតិបត្តិការការពារជាតិដ៏ល្អរវាងប្រទេសទាំងពីរ ស្របតាមដៃគូយុទ្ធសាស្ត្រគ្រប់ជ្រុងជ្រោយ ជាពិសេសតាមរយៈការជំរុញការអនុវត្តកិច្ចសហប្រតិបត្តិការ “ត្បូងពេជ្រ” របស់រដ្ឋាភិបាលទាំងពីរ៕