សមត្ថកិច្ច៖ DJ Hero បើកបរទាំងស្រវឹងមានកម្រិតជាតិអាល់កុលខ្ពស់ ០,៧៩ mg/L

តាមរយៈទំព័រហ្វេស​ប៊ុក ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានឱ្យទម្លាយដឹងថា ឈ្មោះ មុំ សាម៉េត ហៅ DJ HERO កាលពីម៉ោង១ រំលងអាធ្រាត បានបើកបរក្នុងស្ថានភាពស្រវឹង មានកម្រិតជាតិអាល់កុលខ្ពស់ ០,៧៩ mg/L។

ការចេញមកបំភ្លឺបែបនេះ បន្ទាប់ពី ឈ្មោះ មុំ សាម៉េត ហៅ DJ HERO  បានបង្ហោះសារលើគណនីហ្វេសប៊ុកផ្ទាល់ក្នុង ដោយប្រើប្រាស់ពាក្យសម្ដីអសុរសទៅលើសមត្ថកិច្ចខណ្ឌសែន សុខ រាជធានីភ្នំពេញ។

ក្រុមការងារព័ត៌មាន និងប្រតិកម្ម បានបង្ហោះសារដូច្នេះ៖«នៅថ្ងៃទី១០ ខែកញ្ញា ឆ្នាំ២០២៤ វេលាម៉ោង០១:៣០នាទី នៅចំណុចខាងមុខកន្លែងឈៀករថយន្ត បឹងបៃតង លើផ្លូវសម្តេច ជា ស៊ីម ស្ថិតនៅភូមិច្រេស សង្កាត់គោកឃ្លាង ខណ្ឌសែនសុខ មានរថយន្ត០១គ្រឿង ម៉ាក FORD Raptor ពាក់ផ្លាកលេខ ភ្នំពេញ 2BW-5679 បើកបរដោយឈ្មោះ មុំ សាម៉េត ហៅ DJ HERO ភេទប្រុស អាយុ៤៣ឆ្នាំ បើកបរទិសដៅពីកើតទៅលិច ឆ្លងកាត់គោលដៅអនុវត្ថរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិស្រវឹង ទើបសមត្ថកិច្ចនៅគោលដៅនោះឃាត់ហៅត្រួតពិនិត្យ ជាលទ្ធផលអ្នកបើកបរមានកម្រិតជាតិអាល់កុលខ្ពស់ ០,៧៩ mg/L ទើបសមត្ថកិច្ចធ្វើការផាកពិន័យតាមច្បាប់»។

សូមរម្លឹកថា កាលពីវេលាម៉ោង១២និង២០នាទីរំលងអាធ្រាត្រ ឈានចូលថ្ងៃទី៥ ខែកញ្ញា ឆ្នាំ២០២៤ លោក ម៉ៃ សុគន្ធ ដែលគេស្គាល់ថា ជាអតីតតារាចម្រៀង​ និងសម្ដែង បានព្យាយាមបើករថយន្ដបំបុកប៉ារ៉ាស់របស់កម្លាំងសមត្ថកិច្ចដែលកំពុងដាក់គោលដៅត្រួតពិនិត្យអាវុធជាតិផ្ទុះ និងគ្រឿងស្រវឹងនៅចំណុចមុខផ្សារបឹងបៃតង ក្នុងមូលដ្ឋានខណ្ឌសែនសុខ រហូតបង្កគ្រោះថ្នាក់ចរាចរណ៍បុកម៉ូតូកង់បីចំនួន២គ្រឿង បណ្ដាលឲ្យរងរបួសមនុស្សចំនួន២នាក់ និងបុករបាំងថ្មពុះចែកទ្រូងផ្លូវបណ្ដាលឲ្យខូចខាតថែមទៀត។ កាលណោះ សមត្ថកិច្ច រកឃើញថា លោក ម៉ៃ សុគន្ធ បានបើកបរក្នុងស្ថានភាពស្រវឹង មានកម្រិតជាតិអាល់កុលខ្ពស់០.៦០មីលីលីត្រខ្យល់។

ប្រមុខរាជរដ្ឋាភិបាលកម្ពុជាសម្ដេចធិបតី ហ៊ុន ម៉ាណែត បានបញ្ជាឱ្យសមត្ថកិច្ច ចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិស្រវឹង សំដៅឲ្យប្រជាពលរដ្ឋចូលរួមគោរពច្បាប់ចរាចរណ៍ផ្លូវគោក ដើម្បីកាត់បន្ថយអត្រាគ្រោះថ្នាក់ចរាចរណ៍ និងការពារអាយុជីវិត ទ្រព្យសម្បត្តិរបស់ប្រជាពលរដ្ឋ៕