សម្ដេចធិបតីជំរុញឱ្យវិស័យឯកជនកែច្នៃកសិផលសម្រាប់នាំចេញ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅក្នុងឱកាសបិទវេទិកា​ស្រូវអង្ករ​កម្ពុជា​លើក​ទី ៧ នៅថ្ងៃ​ទី ១០ ខែកញ្ញា ឆ្នាំ ២០២៤ ​បានជំរុញឱ្យវិស័យឯកជនកែច្នៃផលិតផល​កសិកម្ម សម្រាប់ការនាំចេញ។

សម្ដេចធិបតី ហ៊ុន ម៉ាណែតថ្លែងថា៖ «យើងមាទិន្នផលច្រើន ប៉ុន្តែយើងមិនអាចគិតតែទៅលើការដាំដុះ និងលក់តែវត្ថុធាតុ​ដើមតែមួយមុខនោះទេ យើងត្រូខិតខំជំរុញឱ្យមានការកែច្នៃវត្ថុធាតុដើមទាំងនេះ ឱ្យទៅជាផលិតផលឧស្សាហកម្មដែលមានគុណវុឌ្ឍ និងអាចឆ្លើយតបទៅនឹងតម្រូវការទីផ្សារផ្សេងផង»។

សម្ដេចធិបតីបន្តថា ការជំរុញការអភិវឌ្ឍន៍វិស័យកសិកម្ម គឺជាការងារដែលមានភាពប្រទាក់ក្រឡា ទាមទារឱ្យមានកិច្ចសហការពីភាគីពាក់ព័ន្ធជាច្រើន ហើយមានភាពចាំបាច់ ដែលត្រូវជំរុញ​យន្ត​ការ​​​ការ​ងារតាមរយៈអភិក្រមជវៈភាពនៃប្រព័ន្ធតួអង្គតែមួយ។

សម្ដេចធិបតីមានប្រសាសន៍បន្តថា រាជរដ្ឋាភិបាលតែងតែយកចិត្តទុកដាក់លើវិស័យស្រូវអង្ករ ដូច​ជាការលើកទឹកចិត្តផ្នែកពន្ធដារ រោងម៉ាស៊ីនកិនស្រូវ និងការនាំចេញអង្ករ ព្រមទាំងការ​លើក​លែង​​ពន្ធសម្រាប់ការនាំចូលគ្រឿងចក្រកសិកម្មជាដើម។

សម្ដេចនាយករដ្ឋមន្ត្រី បានបន្ថែមថា រដ្ឋនៅតែបន្តយកចិត្តទុកដាក់លើការ​កាត់បន្ថយថ្លៃ​ដើម​ផ្សេងៗ​​​ទៀត គោលនយោ​បាយទាំងនេះ បានជំរុញឱ្យវិស័យឯកជន ជាពិសេសរោងម៉ាស៊ីន​កិន​ស្រូវ ដែលមានលទ្ធភាពធ្វើទំនើបកម្ម ដោយ​បំពាក់នូវបច្ចេកវិទ្យាកិនស្រូវទំនើបចុងក្រោយ ដូច​​បណ្ដាប្រទេសជឿនលឿននានានៅលើពិភពលោក។

បច្ចុប្បន្នកម្ពុជាមានរោងម៉ាស៊ីនកិនស្រូវខ្នាតធំ និងមធ្យមចំនួន ៨០ ដែលមានស្ដង់ដារ ហើយអាចឆ្លើយ​តប​ទៅនឹងបទដ្ឋាន​អន្តរជាតិលើផ្នែកសុវត្ថិភាពចំណីអាហារ និងមានលទ្ធភាពសម្ងួតស្រូវ ៥០ ពាន់​​តោន ក្នុងមួយថ្ងៃ ព្រមទាំងមានលទ្ធភាពកិនស្រូវ និងផ្គត់ផ្គង់អង្ករនាំចេញបានជាង ៣ លាន​តោន​ក្នុងមួយឆ្នាំ៕

អត្ថបទ៖ ឡេង ដេត