នាយករដ្ឋមន្ត្រី៖ ត្បិតប្រទេសកម្ពុជាក្រីក្រ តែរដ្ឋមិនឱបដៃមើលពលរដ្ឋរងគ្រោះឡើយ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ត្បិតប្រទេសកម្ពុជាក្រីក្រ តែរដ្ឋាភិបាលមិនឱបដៃមើលពលរដ្ឋរងគ្រោះឡើយ។ សម្ដេចធិបតី ហ៊ុន ម៉ាណែត ថ្លែងយ៉ាងដូច្នេះ ក្នុងពេលអញ្ជើញជាអធិបតីដ៏ខ្ពង់ខ្ពស់បិទវេទិកាស្រូវអង្ករកម្ពុជាលើកទី៧ ឆ្នាំ២០២៤ នាថ្ងៃទី១០ ខែកញ្ញា នេះ។

សម្ដេចធិបតី សង្កត់ធ្ងន់យ៉ាងដូច្នេះ៖«ប្រទេសកម្ពុជាមិនមែនប្រទេសអ្នកមានទេ ប៉ុន្តែយើងក៏មិនអង្គុយឱបដៃឱ្យប្រជាជនដែលកុនការលំបាកនោះទេ។​»។

គួរឱ្យដឹងថា​ ក្រោយរដ្ឋាភិបាលកម្ពុជាបានបង្វែរថវិកាដែលបានមកពីការប្រមូលពន្ធជាច្រើនយកទៅជួយសម្រួលដល់ជីវភាពពលរដ្ឋរងគ្រោះវិញ តាមរយៈកម្មវិធីឧបត្ថម្ភសាច់ប្រាក់ក្នុងវិស័យសង្គមកិច្ចក្នុងពេលដូចជា កម្មវិធីឧបត្ថម្ភសាច់ប្រាក់ជូនពលរដ្ឋរងគ្រោះ ក្រីក្រ  រងសម្ពាធព្រោះវិបត្តិកូវីដ១៩ ដែលចំណាយអស់ថវិកាជាង១៤រយលានដុល្លារ កម្មវិធីជាតិជំនួយសង្គមក្នុងកញ្ចប់គ្រួសារ កម្មវិធីមូលនិធិឧបត្ថម្ភសាច់ប្រាក់ជូនស្ត្រីមានផ្ទៃពោះ និងកម្មវិធីផ្សេងៗទៀត។

ជាមួយគ្នានេះ រដ្ឋាភិបាលក៏បានដាក់ចេញនូវគោលការណ៍បន្ធូបន្ថយពន្ធ អនុគ្រោះពន្ធ មិនយកពន្ធ​ និងគោលការណ៍មួយចំនួនទៀតពាក់ព័ន្ធនឹងពន្ធ។

សម្ដេចធិប​តី ហ៊ុន ម៉ាណែត ពន្យល់ថា ការដាក់ចេញនូវគោលការណ៍នេះ គឺក្នុងគោលដៅ ដើម្បីជួយដល់ពលរដ្ឋ និងអ្នករកស៊ី ក្នុងស្ថានភាពសេដ្ឋកិច្ចមិនទាន់អំណោយផលល្អទាំងស្រុង ដោយរដ្ឋាភិបាលសុខចិត្តប្រមូលពន្ធបានតិច ប៉ុន្តែបានជួយប្រជ​ាពលរដ្ឋ។ តាមសម្ដេចនាយករដ្ឋមន្ត្រី គោលការណ៍បន្ធូបន្ថយពន្ធ លើកលែងពន្ធនេះ រដ្ឋាភិ​បាលនឹងបន្តពិនិត្យ វាយតម្លៃជាប្រចាំ ដើម្បីជួយដល់ប្រជាពលរដ្ឋ និងវិស័យឯកជនបន្តទៀត។

ក្រៅពីនេះ សម្ដេចប្រមុខរដ្ឋាភិបាល បានអះអាងថា នៅក្នុងអាណត្តិទី៧នេះ ក្នុងវិស័យកសិកម្ម រដ្ឋាភិបាលបានកំណត់ចេញនូវអាទិភាពចំនួន៣ដូចជា ទី១ការលើកស្ទួយផលិតកម្ម កសិកម្មរកទីផ្សារលំនឹងថ្លៃផលិតផល និងតាមរយៈកម្មវិធីហិរញ្ញប្បទាន។ ទី២ ការដាក់ពង្រាយមន្ត្រីកសិកម្មនៅតាមឃុំសង្កាត់ និងទី៣ការអនុវត្តសហគមន៍កសិកម្មទំនើប៕

ដោយ៖ ង៉ិល ណារ៉ាត់