ព័ត៌មានជាតិ

ពលរដ្ឋស្រុកគាស់ក្រឡ ៨៥% ធ្វើកសិកម្ម ខណៈឃុំធិបតីឈានមុខគេក្នុងចំណោមឃុំទាំង ០៦

បានផុស

៧ ខែ មុន

នៅ

ថ្ងៃពុធ ១១ កញ្ញា ២០២៤

ដោយ

បើតាមមន្រ្តីកសិកម្មឃុំគាស់ក្រឡ ខេត្តបាត់ដំបងបានគូសបញ្ជាក់ថា ប្រជាពលរដ្ឋនៅក្នុងភូមិគាស់ក្រឡ ភាគច្រើនប្រកបរបរកសិកម្ម មានរហូតដល់ ៨៥% ដែលក្នុងនោះឃុំធិបតីឈានមុខគេក្នុងចំណោមឃុំទាំង ៦ នៃស្រុកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្រុកគាស់ក្រឡមានផ្ទៃដីសរុប ១០៥ ០០០ហិតា ចែកចេញជា ០៦ឃុំ ស្មើនឹង ៥១ភូមិ និងមានប្រជាពលរដ្ឋរស់នៅចំនួន ៩,៤៥៥ គ្រួសារ មនុស្សរាយចំនួន ៣៤,១៤៥នាក់ ស្រី ១៦,៨៤៥នាក់ អាយុ ១៨ឆ្នាំឡើង ចំនួន ២៧,៣៣៩នាក់ ស្រី១៣,៨២ ៣នាក់។

បើតាមមន្រ្តីកសិកម្មស្រុក ពលរដ្ឋប្រកបរបរកសិកម្មចំនួន ៨៥% ខណៈជាអាជីវករមានចំនួន ១០% និងវិស័យផ្សេង ទៀតចំនួន ៥% ។

បើតាមមទិន្នន័យកសិកម្មក្នុងឆ្នាំ២០២៣ ឃុំទាំង ០៦ នៃស្រុកគាស់ក្រឡ ដែលពលរដ្ឋដាំដំណាំស្រូវវស្សាមានសរុប ២៤,៧៥៨ ហិតា ដំណាំពោតសរុបមានចំនួន ៨០៥ហិតា ដំណាំដំឡូងមី សរុប ២,៨៣៧ហិតា និងដំណាំស្វាយសរុប ២៣៣ហិតា ។

ផ្ទៃដីដាំដុះស្រូវវស្សាក្នុងឃុំទាំង ០៦ ក្នុងនោះឃុំធិបតី មានចំនួន ៨,០៩១ហិតា ឃុំគាស់ក្រឡ ចំនួន ៦០១ ហិតា ឃុំហប់ ចំនួន ២,២៣៥ហិតា ឃុំដូនបា ចំនួន ២,៧៤២ហិតា ឃុំព្រះផុស ចំនួន ៧,៣៩៥ហិតា ឃុំឆ្នាលមាន់ ចំនួន ៣,៦៩៤ហិតា សរុបលើផ្ទៃដីកសិកម្មដែលធ្វើដំណាំកសិកម្មក្នុងស្រុកគាស់ក្រឡចំនួន ២៤,៧៥៨ហិតា។

ស្រុកគាស់ក្រឡ គឺជាស្រុកទី ១៣ ក្នុងចំណោមក្រុង-ស្រុកទាំង១៤ នៃខេត្តបាត់ដំបង មានចម្ងាយប្រមាណ ៦៣គីឡូម៉ែត្រពីទីរួមខេត្តបាត់ដំបង មានព្រំប្រទល់ខាងកើតទល់នឹង ស្រុកមោងឬស្សី ស្រុករុក្ខគិរី ,ខាងលិចទល់នឹង ស្រុកសំឡូត ស្រុករតនមណ្ឌល ស្រុកបាណន់ ,ខាងជើងទល់នឹង ស្រុកមោងឫស្សី ស្រុកសង្កែ ,ខាងត្បូងទល់នឹង ស្រុកសំឡូត ស្រុករុក្ខគិរី និង ស្រុកវាលវែង ខេត្តពោធិ៍សាត់៕

អត្ថបទ៖ សៅ សារិទ្ធ