ព័ត៌មានជាតិ

ប.ស.ស ផ្សព្វផ្សាយគោលការណ៍បទប្បញ្ញត្តិច្បាប់ និងអត្ថប្រយោជន៍ដល់ម្ចាស់អាជីវកម្ម

បានផុស

៥ ខែ មុន

នៅ

ថ្ងៃព្រហស្បតិ៍ ១២ កញ្ញា ២០២៤

ដោយ

បេឡាជាតិសន្តិសុខសង្គម(ប.ស.ស.) កាលពីរសៀលថ្ងៃទី ១១ ខែកញ្ញា ឆ្នាំ ២០២៤ បានផ្សព្វផ្សាយស្តីពី “គោលការណ៍បទប្បញ្ញត្តិច្បាប់ និងអត្ថប្រយោជន៍របបសន្តិសុខសង្គម” ជូនដល់បណ្តាម្ចាស់អាជីវកម្ម និងតំណាងក្រុមហ៊ុន សរុបប្រមាណជាង ២០០ នាក់ នៅផ្សារទំនើប អ៊ីអន ម៉ល សែនសុខ ស៊ីធី រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គឹម កែវរស្មី អគ្គនាយករង ប.ស.ស. តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ការរៀបចំឱ្យមានពិធីផ្សព្វផ្សាយនាពេលនេះ ក្នុងគោលបំណងពង្រឹងការអនុវត្តច្បាប់ស្ដីពីរបបសន្តិសុខសង្គមកាន់តែមានប្រសិទ្ធភាព និងមានវិសាលភាពគ្របដណ្ដប់សមាជិកឱ្យកាន់ទូលំទូលាយ ដើម្បីឆ្លើយតបទៅនឹងកំណើន នៃតម្រូវការ និងសេចក្តីប្រាថ្នាចង់ក្លាយទៅជាសមាជិក ប.ស.ស. ពីសំណាក់ប្រជាពលរដ្ឋ ព្រមទាំងពីសំណាក់សមាជិក ប.ស.ស. ដែលចង់បានការធានារ៉ាប់រងលើផ្នែកថែទាំសុខភាពទៅដល់សមាជិកគ្រួសាររបស់ខ្លួនបន្ថែមទៀត ដើម្បីជួយកាត់បន្ថយបន្ទុកចំណាយ ពង្រឹងស្ថិរភាពប្រាក់ចំណូល និងធ្វើឱ្យប្រសើរឡើងនូវសុខភាពរបស់ខ្លួន និងក្រុមគ្រួសារ។

ជាមួយគ្នានេះ លោកអគ្គនាយករង បានអំពាវនាវដល់ម្ចាស់អាជីវកម្មទាំងអស់ដែលមានកម្មករ-និយោជិត ចាប់ពីម្នាក់ឡើងទៅ ត្រូវមកចុះបញ្ជីជាមួយ ប.ស.ស. និងប្រជាពលរដ្ឋដែលពុំទាន់មានប័ណ្ណសមាជិក ប.ស.ស. ជាពិសេសអ្នកដែលប្រកបរបររកស៊ីដោយខ្លួនឯង និងអ្នកក្នុងបន្ទុកសមាជិក ប.ស.ស. សូមអញ្ជើញមកធ្វើប័ណ្ណ ប.ស.ស. ឱ្យបានគ្រប់ៗ គ្នា នៅសាខា ប.ស.ស. អ៊ីអនម៉ល សែនសុខ ស៊ីធី ឬ នៅតាមបណ្តាសាខា ប.ស.ស. ទូទាំងប្រទេស នៅជិតបំផុត៕

អត្ថបទ ៖ សំអឿន