មន្ត្រី៖ ឥទ្ធិពលព្យុះ​ទីហ្វុង យ៉ាកជី មិនប៉ះពាល់ធ្ងន់ធ្ងរដល់កម្ពុជា

ព្យុះទីហ្វុងយ៉ាកជីបានអស់ឥទ្ធិពលទៅវិញហើយ បន្ទាប់ពីបានវាយប្រហារទៅលើកោះហៃណាន ប្រទេស​​ចិន មីយ៉ាន់​ម៉ា ថៃ ឡាវ និងប្រទេសវៀត​ណាម។

លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយមប្រាប់​កម្ពុជា​​​ថ្មី នៅថ្ងៃទី ១២ ខែកញ្ញា ឆ្នាំ ២០២៤ នេះថា ដំណើរគន្លងរបស់ព្យុះយ៉ាកជី​នៅឆ្ងាយ​ពី​កម្ពុជា​ គឺវាដើរនៅភាគខាងជើង។

កន្លងមកកម្ពុជាមានភ្លៀងធ្លាក់ខ្លះ ប៉ុន្តែក្នុងបរិមាណមិនច្រើនទេ ខណៈរលកសមុទ្រខ្ពស់ និងមាន​ភ្លៀង​​នៅតំបន់ឆ្នេរ។

លោក ចាន់ យុត្ថា ប្រាប់ថា៖ «ទឹកទន្លេមេគង្គនៅប្រទេស​ឡាវបានកើន​ឡើងលើសពីចំណុច​ប្រកាស​​​ឱ្យប្រុងប្រយ័ត្ន ប៉ុន្តែទម្រាំមកដល់យើងត្រូវការពេល ១០-១៥ ថ្ងៃ មិនមែនមានន័យថា យើងមិនប៉ះពាល់​សោះ​ទេ យើងប៉ះពាល់តិចតូច ហើយ​ដោយប្រយោល»។

លោក ចាន់ យុត្ថា  បន្ថែមថា ឥទ្ធិពលរបស់​វាគ្រាន់​តែធ្វើឱ្យទឹកទន្លេងើបឡើងតិចតូច ប៉ុន្តែឥឡូវ​ទឹក​​​ទន្លេយើង​ក៏នៅទាប ឧទាហរណ៍ នៅទន្លេបាសាក់-ចតុមុខ កម្ពស់ទឹកក្នុងរង្វង់ ៧ ម៉ែត្រ ខណៈ​កម្រិត​ប្រកាស​ឱ្យប្រុងប្រយ័ត្ន ១០,៥០ ម៉ែត្រ។

ទោះជាយ៉ាងណា លោក ចាន់ យុត្ថា បានបញ្ជាក់ថា កម្ពុជាក៏បានត្រៀមខ្លួនដែរ ដោយសារ​តែ​ប្រទេ​ស​នៅក្នុងតំបន់រួមទាំងកម្ពុជា នឹងបន្តទទួលរងនូវបាតុភូត​ឡានីញ៉ា។

លោក ចាន់ យុត្ថា បន្ថែម៖ «ឆ្នាំនេះ កម្ពុជា ក៏ដូចជាប្រទេសក្នុងតំបន់ ទទួលរងនូវឥទ្ធិពល​បាតុភូត​ឡានីញ៉ា យើងឃើញ​ជុំវិញយើង មានច្រើនលើកមកហើយ ចាប់តាំងពីហ្វីលីពីន បន្ទាប់មកថៃ និង​វៀត​ណាម ហើយយើងក៏មានការត្រៀមលក្ខ​ណៈ​ដែរ ទោះបីថា ពេលនេះ យើងមិនទាន់អី ប៉ុន្តែ​ស្ថាន​​ភាព​អាកាសធាតុមានការប្រែប្រួលពីមួយថ្ងៃទៅមួយថ្ងៃ ក្រសួងក៏ត្រូវ​ត្រៀមលក្ខណៈ ទាំង​ស្ថាន​​ភាព​ទឹកទន្លេ និងជំនន់ទឹកភ្លៀង»៕

អត្ថបទ៖ ឡេង ដេត