ព័ត៌មានជាតិ

មន្ត្រីជាន់ខ្ពស់សុខាភិបាល អំពាវនាវទន្តពេទ្យមិនទាន់មានអាជ្ញាបណ្ណវិជ្ជាជីវៈ រួសរាន់ចុះបញ្ជី ចៀសវាងប្រឈមផ្លូវច្បាប់

បានផុស

៣ ខែ មុន

នៅ

ថ្ងៃព្រហស្បតិ៍ ១២ កញ្ញា ២០២៤

ដោយ

មន្ត្រីជាន់ខ្ពស់ នៃក្រសួងសុខាភិបាល បានអំពាវនាវដល់ទន្តពេទ្យប្រកបវិជ្ជាជីវៈទន្តសាស្ត្រទាំងអស់ដែលមិនទាន់មានអាជ្ញាបណ្ណវិជ្ជាជីវៈ រួសរាន់ចុះបញ្ជីកាស្នើអាជ្ញាបណ្ណឲ្យបានគ្រប់គ្នា ដើម្បីមាននីតិសម្បទាគ្រប់គ្រាន់អាចប្រកបវិជ្ជាជីវៈទន្តសាស្ត្រស្របច្បាប់ ចៀសវាងការទទួលទោសទណ្ឌផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទទន្តសាស្ត្រអន្តរជាតិលើកទី ១២ នៅសណ្ឋាគារសុខា កាលពីព្រឹកថ្ងៃទី ១២ កញ្ញា នេះ លោក អឿន បូរ៉ារ័ត្ន រដ្ឋលេខាធិការក្រសួងសុខាភិបាល បានកោតសរសើរដល់គណៈទន្តពេទ្យកម្ពុជា ដែលបានខិតខំបំពេញបេសកកម្មយ៉ាងសកម្ម ដើម្បីលើកកម្ពស់ស្តង់ដារ នៃការប្រតិបត្តិ វិជ្ជាជីវៈទន្តសាស្ត្រ នៅកម្ពុជា និងបម្រើសេវាប្រកបដោយគុណភាព និងសុវត្ថិភាព ស្របតាមគរុកោសល្យ និងក្រមសីលធម៌ ដោយតម្កល់ផលប្រយោជន៍អ្នកជំងឺ និងអតិថិជនជាអាទិភាព។

លោកបានណែនាំដល់គណៈទន្តពេទ្យ ត្រូវអនុវត្តច្បាប់ឱ្យបានហ្មត់ចត់ចំពោះសមាជិកដែលអនុវត្តខុសឆ្គង ដើម្បីធានាផ្តល់សេវាជូនប្រជាពលរដ្ឋប្រកបដោយវិជ្ជាជីវៈ និងត្រួតពិនិត្យរាល់ការផ្សព្វផ្សាយមានចរិតពាណិជ្ជកម្ម ភូតកុហក បំភ្លៃហួសពីការពិត ធ្វើឱ្យអាប់អោនតម្លៃវិជ្ជាជីវៈ និងរំលោភលើលិខិតបទដ្ឋានគតិយុត្តិជាធរមាន។

លោកសាស្ត្រាចារ្យជំនួយ ប៉ូច សុភារ័ត្ន ប្រធានគណៈទន្តពេទ្យកម្ពុជា បានសន្យាថា នឹងខិតខំអនុវត្តតាមការណែនាំរបស់ក្រសួងសុខាភិបាល ដើម្បីលើកកម្ពស់វិស័យទន្តពេទ្យឱ្យកាន់តែប្រសើរឡើងបន្ថែមទៀត ឱ្យស័ក្ដិសមទៅនឹងការកោតសរសើរពីថ្នាក់ដឹកនាំក្រសួងសុខាភិបាល។

លោកសាស្ត្រាចារ្យជំនួយ សង្ឃឹមថា សិក្ខាកាមទាំងអស់ នឹងប្រឹងប្រែងយកចិត្តទុកដាក់ត្រងត្រាប់ស្តាប់ការធ្វើបទបង្ហាញ និងធ្វើការសាកសួរឱ្យបានច្រើន ដើម្បីផ្លាស់ប្ដូរបទពិសោធជាមួយនឹងវាគ្មិនជាតិ និងអន្តរជាតិ នៅក្នុងសិក្ខាសាលារយៈពេលពីរថ្ងៃនេះ ដើម្បីបំពេញបន្ថែមសមត្ថភាពវិជ្ជាជីវៈ ទាំងចំណេះដឹង ជំនាញអនុវត្ត។

លោកសាស្ត្រាចារ្យជំនួយ បានបន្ថែមថា គិតត្រឹមថ្ងៃទី ៣១ ខែសីហា ឆ្នាំ ២០២៤ គណៈទន្តពេទ្យកម្ពុជា បានចុះបញ្ជីកាជូនទន្តពេទ្យចំនួន ១ ៥៤៧ នាក់។ ក្នុងចំណោមនោះ ទន្តពេទ្យដែលមានអាជ្ញាបណ្ណប្រកបវិជ្ជាជីវៈទន្តសាស្ត្រមានសុពលភាពមានចំនួន ១ ២៧៧ នាក់៕

អត្ថបទ ៖ សំអឿន