ព័ត៌មានជាតិ

បុគ្គលស្វ័យនិយោជន៍ជាស្ត្រី ពេលមានផ្ទៃពោះ នឹងទទួលបានអត្ថប្រយោជន៍ជាច្រើនពី ប.ស.ស

បានផុស

២២ នាទី មុន

នៅ

ថ្ងៃសុក្រ ១៣ កញ្ញា ២០២៤

ដោយ

បុគ្គលស្វ័យនិយោជន៍ជាស្ត្រី ពេលមានផ្ទៃពោះ នឹងទទួលបានអត្ថប្រយោជន៍ជាច្រើនពី ប.ស.ស ដូចជា ទទួលបានសេវាពិនិត្យផ្ទៃពោះមុន និងក្រោយសម្រាល ,ទទួលបានសេវាថ្លៃសម្រាលកូនដោយឥតគិតថ្លៃ និងទទួលបានប្រាក់បំណាច់មាតុភាពចំនួន ១ ២៦០ ០០០ រៀល ពី ប.ស.ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម ប.ស.ស រាល់ការផ្តល់ជូនខាងលើ ត្រូវធ្វើឡើងតែក្នុងមន្ទីរពេទ្យដៃគូ ប.ស.ស. តែប៉ុណ្ណោះ។ ការទទួលសេវានៅមន្ទីរពេទ្យមិនមែនដៃគូ ប.ស.ស. រាល់ការចំណាយគឺជាបន្ទុករបស់សាមីខ្លួន ប.ស.ស. មិនទូទាត់ជូនឡើយ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ប.ស.ស នៃក្រសួងការងារ និងបណ្តុះបណ្តាលវិជ្ជាជីវៈ បានពង្រីកវិសាលភាពផ្នែកថែទាំសុខភាពជាមួយមូលដ្ឋានសុខាភិបាលដែលជាដៃគូរបស់ខ្លួនបានចំនួន ១៥៧៣ នៅទូទាំង ២៥ រាជធានី-ខេត្ត ជាមួយនឹងការដាក់ពង្រាយមន្ត្រី និងបុគ្គលិកសុខាភិបាលសរុបចំនួនជាង ៤៦ ០០០ នាក់ នៅទូទាំងប្រទេស ដើម្បីរង់ចាំបម្រើថែទាំសុខភាព និងព្យាបាលដល់សមាជិក ប.ស.ស ប្រកបដោយក្រមសីលធម៌ និងរហ័ស។

លោករដ្ឋលេខាធិការ បន្ថែមថា ត្រឹមខែសីហា ឆ្នាំ ២០២៤ ប.ស.ស. ទទួលបានសមាជិករហូតទៅដល់ជាង ២,៤៧ លាននាក់ ក្នុងនោះមានប្រជាពលរដ្ឋដែលជាសមាជិកបានប្រើប្រាស់សេវា ប.ស.ស. នៅតាមមន្ទីរពេទ្យដៃគូបានជាង ៧,១ លានករណី គិតត្រឹមរយៈពេលមួយឆ្នាំ ពីខែកញ្ញា ឆ្នាំ ២០២៣ ដល់ខែសីហា ឆ្នាំ ២០២៤។

គួរបញ្ជាក់ថា គិតត្រឹមបំណាច់ខែកក្កដា ឆ្នាំ ២០២៤ បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ មានសមាជិកសរុបចំនួន ២ ៤៥៣ ៩១៤ នាក់ ក្នុងនោះសមាជិក ប.ស.ស ជាមន្ត្រីសាធារណៈមានចំនួន ៤៤០ ៣៦៥ នាក់ សមាជិក ប.ស.ស. ក្នុងវិស័យឯកជនមានចំនួន ១ ៦៤៣ ៩៨៧ នាក់ សមាជិក ប.ស.ស ជាបុគ្គលស្វ័យនិយោជន៍ចំនួន ២៨៣ ៤២១ នាក់ និងសមាជិក ប.ស.ស ដែលជាអ្នកក្នុងបន្ទុកសមាជិក ប.ស.ស មានចំនួន ៨៧ ៩០៩ នាក់៕

អត្ថបទ ៖ សំអឿន