សម្តេចតេជោ៖ សញ្ញាបត្របណ្ឌិតកិត្តិយស ជាសក្ខីភាពថារដ្ឋាភិបាលធ្វើកន្លងមកដើរលើមាគ៌ាដ៏ត្រឹមត្រូវ

គិតត្រឹមខែ កញ្ញា ឆ្នាំ ២០២៤ នេះ សម្តេចតេជោ ហ៊ុន​ សែន ប្រធានព្រឹទ្ធសភា និងជាអតីតនាយកជារដ្ឋមន្រ្តីកម្ពុជា ទទួលបានសញ្ញាបត្របណ្ឌិតកិត្តិយសជាង ១០ ដែលផ្តល់ដោយសាកវិទ្យាល័យល្បីៗលំដាប់អន្តរជាតិពីបណ្តាប្រទេសមួយចំនួន។

សញ្ញាបត្រកិត្តិយសជាង១០ ដែលសម្តេចទទួលបានផ្តល់ដោយ សាកលវិទ្យាល័យចំនួនពីរ នៅសហរដ្ឋអាមេរិក គឺ Southern California University និង IOWA ដោយ Southern California University (ផ្តល់ជូន)ខាងវិទ្យាសាស្ត្រនយោបាយ និង IOWA (ផ្តល់ជូន)ខាងច្បាប់។ នៅឯសាធារណរដ្ឋកូរ៉េវិញ សម្តេចទទួលបានសញ្ញាបត្របណ្ឌិតកិត្តិយសចំនួន៣ ពីសាកលវិទ្យាល័យនៅក្នុងប្រទេសអភិវឌ្ឍមួយនេះ។ បន្ថែមពីនេះ សម្តេចតេជោទទួលបានពីប្រទេសថៃចំនួន ២ ម៉ាឡេស៊ី ១ ឥណ្ឌូនេស៊ី ១ ចិន ២ និងនៅមានសញ្ញាបត្រមួយចំនួនទៀតពីសហគមន៍អឺរ៉ុប។

សញ្ញាបត្រដែលសម្តេចទទួលបានទាំងនេះ គឺជាសក្ខីភាពយ៉ាងជាក់ច្បាស់ថា អ្វីៗដែលរាជរដ្ឋាភិបាលកម្ពុជាបានខិតខំធ្វើកន្លងមក គឺជាការដើរលើមាគ៌ាដ៏ត្រឹមត្រូវបំផុតសម្រាប់សន្តិភាពជាតិ និងអន្តរជាតិ។

ក្នុងឱកាសទទួលបានសញ្ញាបត្របណ្ឌិតកិត្តិយសផ្នែក «ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យ ដុងហ្គុកវ៉ាយស៍ ប្រទេសកូរ៉េខាងត្បូង នាថ្ងៃទី១២ ខែកញ្ញា ឆ្នាំ២០២៤ សម្តេចតេជោ ហ៊ុន សែន បានថ្លែងថា​ ដល់ពេលនេះ សម្តេចមានសញ្ញាបត្រកិត្តិយសពីបរទេសជាង ១០ ដោយចាប់ផ្តើមពីសាកលវិទ្យាល័យចំនួនពីរនៅសហរដ្ឋអាមេរិក ហើយ​សម្រាប់នៅកូរ៉េខាងត្បូង នេះគឺជាសញ្ញបត្រកិត្តិយសទី៣។

សម្តេចតេជោ ហ៊ុន សែន បានធ្វើបាឋកថា ដោយគូសបញ្ជាក់ថា៖«សម្រាប់ខ្លួនខ្ញុំផ្ទាល់ សញ្ញាបត្រនេះ គឺជាការទទួលស្គាល់អំពីការលះបង់ បូជាគ្រប់បែបយ៉ាងរួមទាំងការដាក់ទុនអាយុវជីវិតរបស់ខ្ញុំ ដើម្បីរំដោះប្រទេសជាតិពីក្រញាំនៃរបបប្រល័យពូជសាសន៍ និងការខិតខំកសាងជាតិឡើងវិញពីបាតដៃទទេរ។ ទន្ទឹមនឹងការខិតខំកសាងសន្តិភាព ផ្សះផ្សា និងការបង្រួបបង្រួមជាតិទម្រាំប្រទេសកម្ពុជាទទួលបាននូវសុខសន្តិភាពពេញបរិបូរណ៍ មានឯកភាពទឹកដី មានកម្លាំងប្រដាប់អាវុធតែមួយ នៅក្រោមដំបូលរដ្ឋធម្មនុញ្ញតែមួយ»។

សម្តេចតេជោ បន្តថានេះគឺជាសន្តិភាពពេញលេញ និងឯកភាពទឹកដីដែលប្រជាជនខ្មែរពុំដែលបានស្គាល់នៅក្នុងប្រវត្តិសាស្រ្តជាង ៥០០ ឆ្នាំចុងក្រោយនេះ។ សម្រាប់ប្រទេសកម្ពុជា សញ្ញាបត្រកិត្តិយសនេះ គឺជាការទទួលស្គាល់នូវគុណតម្លៃនៃភាពជាអ្នកដឹកនាំ បញ្ញាញាណ ស្មារតីនៃស្នេហាជាតិ ភាពទន់ភ្លន់ អត់ឱន និងភាពជាម្ចាស់របស់ពលរដ្ឋខ្មែរទៅលើសុខសន្តិភាព និងជោគវាសនារបស់ជាតិខ្មែរ។

សម្តេចតេជោ បន្ថែមទៀតថា៖«នេះជាការទទួលស្គាល់ ថាបទពិសោធប្រវត្តិសាស្រ្ត និងគុណតម្លៃដឹកនាំ កសាងសន្តិភាព កសាងជាតិ របស់កម្ពុជាអាចផ្តល់ជាប្រយោជន៍យ៉ាងសំខាន់សម្រាប់ការបណ្តុះបណ្តាលសន្តិភាព បង្រួបបង្រួមជាតិ ការអភិវឌ្ឍ និងកិច្ចសហប្រតិបត្តិការនៅលើមជ្ឈដ្ឋានអន្តរជាតិ។ នេះក៏ជាសក្ខីភាពយ៉ាងជាក់ច្បាស់ផងដែរថា អ្វីៗដែលរាជរដ្ឋាភិបាលបានខិតខំធ្វើកន្លងមក គឺជាការដើរលើមាគ៌ាដ៏ត្រឹមត្រូវបំផុតសម្រាប់សន្តិភាពជាតិ និងអន្តរជាតិ»។

គួរជម្រាបថា ក្នុងពិធីប្រគល់សញ្ញាបត្រជូនសម្តេចតេជោ មានការចូលរួមពីភ្ញៀវកិត្តិយស រួមមានមន្ត្រីរដ្ឋាភិបាលកូរ៉េ អ្នកសិក្សាស្រាវជ្រាវ សាស្រ្តចារ្យ និងសមាជិកនៃអង្គទូតជាច្រើនរូប។

ឆ្លៀតក្នុងឱកាសនោះ សម្តេច ហ៊ុន សែន បានធ្វើបាឋកថាស្តីពី បទពិសោធន៍របស់កម្ពុជាក្នុងរំដោះជាតិ ការកសាងសន្តិភាព ការផ្សះផ្សា និងការកសាងឡើងវិញ​ដោយបាន​ចែករំលែក​ការយល់ដឹងដល់អ្នកចូលរួមអំពី​ដំណើរ​របស់​កម្ពុជា​ពី​ប្រទេស​ដែល​ហែកហួរ​ដោយ​សង្គ្រាម​ទៅកាន់​ប្រទេស​មាន​ស្ថិរភាព និង​សន្តិភាព។

សម្តេចតេជោ ហ៊ុន សែន ដែលជាអតីតនាយករដ្ឋមន្រ្តីកម្ពុជាដ៏ឆ្នើម ក៏បានលើកឡើងពីបញ្ហាប្រឈមដែលកម្ពុជាជួបប្រទះក្នុងដំណើរផ្លាស់ប្តូរពីសង្រ្គាមទៅជាសន្តិភាព រួមមានការកសាងឡើងវិញនូវហេដ្ឋារចនាសម្ព័ន្ធ ការកសាងធនធានមនុស្ស និងការលើកកម្ពស់ការអភិវឌ្ឍសេដ្ឋកិច្ច។

ការថ្លែងរបស់សម្តេចតេជោនាឱកាសនោះ ទទួលបានការគាំទ្រយ៉ាងខ្លាំងពីសំណាក់ទស្សនិកជន ដែលបានសរសើរពីភាពវៃឆ្លាត និងការដឹកនាំរបស់សម្តេច ហ៊ុន សែន ដែលព្រឹត្តិការណ៍នេះត្រូវបានគេមើលឃើញថា ជាឱកាសមួយសម្រាប់អ្នកប្រាជ្ញកូរ៉េ និងអន្តរជាតិ និងអ្នកបង្កើតគោលនយោបាយដើម្បីស្វែងយល់ពីបទពិសោធរបស់កម្ពុជាសម្រាប់អនុវត្តនៅក្នុងប្រទេស និងក្នុងតំបន់ដើម្បីនាំមកនូវសុខសន្តិភាពសម្រាប់ប្រជាជាតិទាំងអស់គ្នា៕