លោក ពុយ គា៖ អ្នកសារព័ត៌មានដើរតួនាទីយ៉ាងសំខាន់ ក្នុងការចូលរួមផ្សព្វផ្សាយអប់រំពីផលប៉ះពាល់ជំងឺរបេង

ក្នុងវេទិកាសារព័ត៌មានលើប្រធានបទ «តួនាទីសារព័ត៌មានសម្រាប់យុទ្ធនាការ ប្រយុទ្ធប្រឆាំងជំងឺរបេង» នាព្រឹកថ្ងៃទី១៦ ខែកញ្ញា ឆ្នា២០២៤ នៅសណ្ឋាគារពូលូវ៉ៃ លោក ពុយ គា ប្រធានក្លឹបអ្នកកាសែតកម្ពុជា​​ ថា អ្នកសារព័ត៌មានដើរតួនាទីយ៉ាងសំខាន់ ក្នុងការចូលរួមផ្សព្វផ្សាយអប់រំពីផលប៉ះពាល់ជំងឺរបេង ដើម្បីជួយទប់ស្កាត់អំពីផលប៉ះពាល់ និងការរីករាលដានកាន់តែច្រើនឡើងនៃជំងឺមួយនេះ។

វេទិកាខាងលើ រៀបចំឡើងដោយ ក្លិបអ្នកកាសែតកម្ពុជា (ក.អ.ក) សហការជាមួយអង្គការខាណាកម្ពុជា ដើម្បីឱ្យអ្នកសារព័ត៌មាន បានស្វែងយល់អំពីទំហំនៃបញ្ហាប្រឈម និងផលវិបាកនៃជំងឺរបេង រួមទាំងស្ថានភាពនៃជំងឺរបេងនៅកម្ពុជា និងពិភពលោក សំដៅលើកទឹកចិត្តដល់អ្នកសារព័ត៌មានចូលរួមចំណែកផ្សព្វ ផ្សាយបន្តនូវសារអំពីជំងឺរបេង ការលុបបំបាត់ការរើសអើងឱ្យកាន់តែទូលាយ និងបានជ្រួតជ្រាបដល់ប្រជាជនដើម្បីពួកគាត់បានយល់ដឹង និងស្ម័គ្រចិត្តចូលរួមចំណែកក្នុងដំណើរការបញ្ចប់ជំងឺរបេងនៅកម្ពុជា នាឆ្នាំ២០៣០។

លោក ពុយ គា បានបញ្ជាក់ថា វេទិកានេះ មានសារសំខាន់ណាស់ក្នុងការចូលរួមកាត់បន្ថយអ្នកកើតជំងឺរបេង បានកាន់តែច្រើន ដើម្បីសម្រេចបានគោលដៅបញ្ចប់ជំងឺរបេងនៅកម្ពុជានាឆ្នាំ២០៣០ ក្រោមគំនិតផ្តួចផ្តើម ដែលមានឈ្មោះថា «យន្តការបញ្ចប់របេងកម្ពុជា» អង្គការខាណាកម្ពុជា (KHANA CAMBODIA ) សហការជាមួយកម្មវិធីជាតិកំចាត់រោគរបេង បានប្រើប្រាស់គ្រប់មធ្យោបាយក្នុងការកៀរគរការចូល រួមពីភាគីពាក់ព័ន្ធផ្សេងៗទាំងរាជរដ្ឋាភិបាល, ម្ចាស់ជំនួយ, សហគមន៍, វិស័យឯកជន, អង្គការ មហាជន សំខាន់ស្ថាប័នសារព័ត៌មាន។

សូមជម្រាបថា វេទិកាខាងលើ មានការចូលរួមពីមន្ត្រីជំនាញនៃមជ្ឈមណ្ឌលជាតិកំចាត់ រោគរបេង និងហង់សិននៃក្រសួងសុខាភិបាល អង្គការខាណាកម្ពុជា ព្រមទាំងអ្នកសារព័ត៌មានជាតិ និងអន្តរជាតិប្រមាណ៧០នាក់៕