ព័ត៌មានជាតិ

មន្ត្រីជាន់ខ្ពស់ ប.ស.ស ជំរុញមន្ត្រីដោះស្រាយបញ្ហាឱ្យបានឆាប់រហ័ស ដើម្បីផ្ដល់សេវាជូនសមាជិកកាន់តែមានប្រសិទ្ធភាព

បានផុស

៥ ខែ មុន

នៅ

ថ្ងៃអង្គារ ១៧ កញ្ញា ២០២៤

ដោយ

មន្ត្រីជាន់ខ្ពស់ នៃបេឡាជាតិសន្តិសុខសង្គម(ប.ស.ស.) នៃក្រសួងការងារ និងបណ្ដុះបណ្ដាលវិជ្ជាជីវៈ បានជំរុញដល់ថ្នាក់ដឹកនាំអង្គភាពក្រោមឱវាទ ត្រូវដោះស្រាយបញ្ហាសំខាន់ៗ នៅតាមអង្គភាពរៀងៗ ខ្លួន ឱ្យបានឆាប់រហ័ស ដើម្បីផ្តល់សេវាសាធារណៈជូនសមាជិកកាន់តែមានប្រសិទ្ធភាពខ្ពស់បន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំផ្ទៃក្នុងប្រចាំខែ ដើម្បីត្រួតពិនិត្យសកម្មភាពការងារដែលសម្រេចបានក្នុងខែកន្លងទៅកាលពីព្រឹកថ្ងៃទី ១៦ កញ្ញា នេះ នៅសាលប្រជុំសន្ដិភាព ទីស្នាក់ការកណ្ដាល ប.ស.ស. លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា កិច្ចប្រជុំផ្ទៃក្នុងប្រចាំខែនេះ ដើម្បីត្រួតពិនិត្យសកម្មភាពការងារដែលសម្រេចបានក្នុងខែកន្លងទៅ ដើម្បីដោះស្រាយបញ្ហាប្រឈម ចំណុចខ្វះខាតនៅមិនទាន់បានអនុវត្ត និងដោះស្រាយឱ្យបានកាន់តែល្អប្រសើរ ទាន់ពេលវេលា និងអនុវត្តឱ្យបានចំគោលដៅមានប្រសិទ្ធភាព ជាពិសេសពិនិត្យតាមដានសកម្មភាពដែលជាសូចនាកររបស់ ប.ស.ស. ដែលមានក្នុងផែនការយុទ្ធសាស្ត្រអភិវឌ្ឍន៍វិស័យការងារ សន្ដិសុខសង្គម និងបណ្ដុះបណ្ដាលវិជ្ជាជីវៈ ឆ្នាំ ២០២៤-២០២៨។

ក្នុងឱកាសកិច្ចប្រជុំប្រចាំខែនេះ លោកប្រតិភូរាជរដ្ឋាភិបាល បានជំរុញដល់ថ្នាក់ដឹកនាំអង្គភាពក្រោមឱវាទ ត្រូវអនុវត្តការងារឱ្យបានល្អប្រសើរ និងដោះស្រាយបញ្ហាប្រឈមឱ្យបានឆាប់រហ័ស ជាពិសេសការពង្រឹងគោរពវិន័យក្នុងអង្គភាពឱ្យហ្មត់ចត់ តឹងរ៉ឹង និងខិតខំអនុវត្តនូវទិសដៅការងារ រៀបចំផែនការសកម្មភាពការងារបន្ត និងដោះស្រាយការងារក្នុងដែនសមត្ថកិច្ចរបស់ខ្លួន ប្រកបដោយទំនួលខុសត្រូវ និងយកចិត្តទុកដាក់ខ្ពស់ ជាមួយនឹងភាពទន់ភ្លន់ ម៉ឺងម៉ាត់ ដើម្បីជំរុញយន្តការក្នុងការផ្ដល់សេវាសាធារណៈជូនសមាជិក កាន់តែមានប្រសិទ្ធភាព និងទទួលបានលទ្ធផលខ្ពស់។

គួរបញ្ជាក់ថា កិច្ចប្រជុំផ្ទៃក្នុងនេះមានការចូលរួមពីថ្នាក់ដឹកនាំស្នាក់ការកណ្ដាល និងតាមបណ្ដាសាខាខេត្ត-ខណ្ឌ ដោយផ្ទាល់ និងតាមរយៈ Zoom meeting សរុបប្រមាណជា ៤០០ រូប៕

អត្ថបទ ៖ សំអឿន