សណ្ឋាគារ រីសត និង​បឹងហ្គាឡូ ​មានតម្រូវការ​និង​​រូបភាព​ខុសគ្នា​យ៉ាងណាខ្លះ?

នៅក្នុង​​បទ​ប្បញ្ញត្តិគតិយុត្តិ​ពាក់ព័ន្ធ​ទៅ​ឧស្សាហកម្មទេសចរណ៍ បាន​បែងចែក​អាជីវកម្ម​សេវា​ស្នាក់នៅ​ទេសចរណ៍​​មាន​រូបភាព​និង ទៅតាម​គោលដៅ​ផ្សេងៗ​គ្នា ដូចជា​​ប្រភេទ​អាជីវកម្ម​សណ្ឋាគារ អាផាតមិន បឹងហ្គាឡូ និង​សេវា​ស្នាក់នៅ​ទេសចរណ៍​​ផ្សេង​ទៀត។

អាជីវកម្ម​សណ្ឋាគារ គឺជា​ការ​យក​អាគារសម្រាប់​ធ្វើអាជីវកម្ម​ផ្គត់ផ្គង់​បន្ទប់​ស្នាក់នៅ ដែល​មាន​បំពាក់​នូវ​សម្ភារៈ​បរិក្ខារ​ជូន​ភ្ញៀវ និង​មាន​សេវាកម្ម​មួយ​ចំនួន​ដូចជា ភោជនីយដ្ឋាន បានីយដ្ឋាន ហាង​លក់​ទំនិញ វត្ថុ​អនុស្សាវរីយ៍ កន្លែង​ហាត់ប្រាណ លេង​កីឡា សាល​ប្រជុំ ព្រមទាំង​មាន​សេវាកម្ម​ពេញ​លេញ​ទៅតាម​តម្រូវការ​របស់​ភ្ញៀវ។ ទីតាំង​សណ្ឋាគារ​ស្ថិត​នៅ​តាម​ទីប្រជុំជន ជាយក្រុង តំបន់​រមណីយដ្ឋាន​ទេសចរណ៍ និង​តំបន់​ដែល​មាន​ចលនា​ទេសចរណ៍។

អាជីវកម្ម​សេវាកម្មស្នាក់នៅ​ទេសចរណ៍ផ្សេងទៀតដូចជា៖

-សណ្ឋាគារ​អាផាតម៉ិន (Apartment Hotel ) ជា​សណ្ឋាគារ​ដែល​មាន​បន្ទប់ស្នាក់​នៅ និង​បន្ទប់​ស្វ៊ីត​ដោយ​បំពាក់​គ្រឿង​​សង្ហារិម សម្ភារៈ​បរិក្ខារ និង​ផ្តល់​នូវ​សេវាកម្ម​ដូច​សណ្ឋាគារ​ដែរ ហើយ​បម្រើ​ឲ្យ​ការ​ស្នាក់នៅ​រយៈពេល​វែង។ បន្ទប់ស្វ៊ីត មានបន្ទប់ស្នាក់នៅមួយ​ឬច្រើន មានបំពាក់គ្រឿង​សម្ភារៈ​ផ្ទះបាយ និង​មានបន្ទប់សម្រាប់​ទទួលភ្ញៀវ។ .

-សណ្ឋាគារ ស្វ៊ីត (Suite Hotel) ជាសណ្ឋាគារ​ ដែលមាន​បន្ទប់ស្នាក់នៅ​ទាំងអស់សុទ្ធតែជាបន្ទប់ស្ទីត។

-សណ្ឋាគាររីសត (Resort Hotel) គឺជាសណ្ឋាគារ ដែល​មានទីតាំង​ស្ថិតនៅក្នុងតំបន់​រមណីយដ្ឋាន​ទេសចរណ៍​ឆ្ងាយ​ពីទីប្រជុំជន មានកន្លែងលំហែកាយ​សម្រាក​យកខ្យល់អាកាស មាន​ផ្តល់សេវាកម្ម​ម្ហូបអាហារ​ភេសជ្ជៈ និងសេវាកម្មផ្សេងទៀត ដែលធ្វើ​ឲ្យ​ចម្រើន​សុខភាព ដូចជាៈ វាយកូនគោល វាយ​តេនីស ស្ទូចត្រី ជិះសេះ​ជា​ដើម។

-ម៉ូតែល (Motel) អាគារ​មាន​មួយ​ជាន់ ឬ​ពីរជាន់ ដែល​ស្ថិត​នៅ​តាម​តំបន់​ជាយក្រុង ឬ​តំបន់​ដែល​មានចលនា​ទេសចរណ៍ និង​តាម​បណ្ដោយផ្លូវ​សំខាន់ៗ ផ្ដល់នូវ​សម្បទានិង​សេវាកម្ម​មាន​កម្រិត ​សម្រាប់​បម្រើ​ឲ្យ​ការស្ទាក់នៅ​ជាលក្ខណៈ​សំចត​រយៈពេល​ខ្លី។ មាន​ភោជនីយដ្ឋាន​ខ្នាតតូច មាន​ចំណត​រថយន្ត​ធំទូលាយ និង​មានផ្តល់នូវសេវាកម្ម​សម្រាប់​កម្សាន្ត​មួយចំនួន។

-ឡូដ៍ (Lodge) គឺជា​អាគារ ដែល​មានទីតាំង​ស្ថិតនៅតាម​តំបន់​សម្រាក​វិស្សមកាល​ជនបទ តំបន់​ទាក់ទាញ​ទេសចរ សម្រាប់​​បម្រើ​ឲ្យ​ការស្ទាក់នៅដល់ទេសចរ​មានលក្ខណៈជាពួក ឬជាក្រុម​ ដែល​មាន​គោលបំណង​សម្រាក​ លំហែកាយ និង​កម្សាន្ត​ក្នុង​សកម្មភាព​នេសាទ បរបាញ់ កីឡា មាន​បម្រើ​សេវា​ម្ហូប​អាហារ និង​ភេសជ្ជៈ មាន​ចំណត​រថយន្ត ព្រមទាំង​មាន​បំពាក់​គ្រឿង​សម្ភារៈ​ផ្ទះបាយ។

-​បឹងហ្គាឡូ (Bungalow) គឺជា​អគារ​មួយជាន់មានលក្ខណៈជា​ភូមិគ្រឹះ​ដាច់ៗ​ពីគ្នានិង​អាច​មាន​ច្រើន​យូនីត (Units) នៅក្នុងអាគារ​តែមួយ។ យូនីត (Units) នីមួយៗ មាន​បន្ទប់​ដេក​មួយ ឬ​ច្រើន មាន​បន្ទប់ទទួល​ភ្ញៀវ​ដាច់​ដោយឡែក មាន​ផ្ទះ​បាយ មាន​ចំណតរថយន្ត។ បឹងហ្គាឡូ អាច​ជា​អាគារ​សំណង់​រឹង ឬ​ស្រាល​។

-ផ្ទះ​ភ្ញៀវ (Guest House ) គឺជាអាគារ​ដែលមានចំនួន​បន្ទប់ពី ៥ ទៅ ១៥ បន្ទប់ មាន​បំពាក់​ឧបករណ៍​សម្ភារៈ បរិក្ខារ​ដែលមានលក្ខណៈសម្បត្តិគ្រប់គ្រាន់ និងមានសេវា​បម្រើ​ភ្ញៀវមាន​កម្រិត។

-ផ្ទះ​ស្នាក់នៅ ( Homestay ) គឺជា​សេវាកម្ម​ស្នាក់នៅ​ទេសចរណ៍ ដោយ​ការរៀបចំ​លំនៅដ្ឋាន​របស់ខ្លួន​ឲ្យ​ទៅជា​បន្ទប់​មិនលើសពី ០៥ បន្ទប់ ឬ​ជា​គ្រែ​ចល័ត ដូចជា ប៉ៅអ៊ី ឬ​អង្រឹង មាន​បំពាក់​សម្ភារៈបរិក្ខារ សាមញ្ញ និង​សេវា​មាន​កម្រិត សម្រាប់​ទទួល​បំរើការស្នាក់នៅ​របស់ភ្ញៀវ ដែលមាន​បំណង​មកសិក្សា និង​ស្វែង​យល់​ពី​សកម្មភាព​នៃជីវភាពរស់នៅ​របស់ប្រជាជន​ក្នុងសហគមន៍ និង​រមណីយដ្ឋាន​ក្នុង​តំបន់។

-កន្លែងបោះជំរុំទេសចរណ៍ (Tourist Camping) គឺជាមូលដ្ឋានសេវាកម្ម​ស្នាក់នៅទេសចរណ៏ ដោយ​ប្រើប្រាស់​តង់ (Tent) ដែល​មានទីតាំងស្ថិតនៅក្នុងតំបន់រមណីយដ្ឋាន​ទេសចរណ៍​ធម្មជាតិ វប្បធម៌ ប្រវត្តិសាស្ត ឆ្នេរសមុទ្រ មាន​ហេដ្ឋារចនាសម្ព័ន្ធ និងសេវាកម្មចាំបាច់មួយចំនួន​ដើម្បី​បម្រើ​ទេសចរ។

បើតាម​បទ​ប្បញ្ញត្តិគតិយុត្តិ​ពាក់ព័ន្ធ​ឧស្សាហកម្មទេសចរណ៍​ ការផ្តល់អាជ្ញាប័ណ្ណទេសចរណ៍​ឲ្យ​ប្រកប​អាជីវកម្ម​សណ្ឋាគារ និង​សេវាកម្ម​ស្នាក់នៅទេសចរណ៍ ការផាក និង​ការដកហូតឬ​បិទអាជីវកម្ម គឺជា​សមត្ថកិច្ច​របស់​ក្រសួង​​ទេសចរណ៍។

ពាក់ព័ន្ធ​ការសុំអាជ្ញាប័ណ្ណ​​សេវាកម្ម​ស្នាក់នៅទេសចរណ៍ ត្រូវធ្វើឡើងដោយម្ចាស់ឬអ្នកគ្រប់គ្រង​អាជីវកម្មសណ្ឋាគារ និងសេវាកម្ម​ស្នាក់នៅទេសចរណ៍ ដោយ​អនុវត្ត​ទៅ​តាម​បែបបទ​ដែល​បាន​កំណត់ ព្រមទាំងត្រូវភ្ជាប់មកជាមួយនូវឯកសារ ចាំបាច់ដូចខាងក្រោម៖

ក- លិខិតអនុញ្ញាត​ដាក់ទីតាំងធ្វើអាជីវកម្ម ចេញដោយអាជ្ញាធរដែនដី

ខ – លិខិត​អនុញ្ញាត​សាងសង់ ឬជួសជុល ចេញ​ដោយក្រសួង​ឬមន្ទីររៀបចំដែនដី នគរូបនីយកម្ម និងសំណង់

គ- វិញ្ញាបនប័ត្រ ឬ​លិខិត​បញ្ជាក់​ពីការ​ចុះឈ្មោះ​ក្នុងបញ្ជី​ពាណិជ្ជកម្ម

ឃ – លិខិត​បញ្ជាក់​លើ​ប្រព័ន្ធការពារ​សន្តិសុខ សុវត្ថិភាព និង​អគ្គិភ័យ ចេញ​ដោយ​ក្រសួងមហាផ្ទៃ ឬ​ស្ទង​ការដ្ឋាន​នគរបាល​ខេត្ត-ក្រុង

ង – លិខិត​បញ្ជាក់​លើ​អនាម័យ ចេញដោយក្រសួងសុខាភិបាល ឬ មន្ទីរសុខាភិបាល

ច- អត្តសញ្ញាណប័ណ្ណ ឬ លិខិតឆ្លងដែន

ឆ – លិខិត​យល់ព្រម​ជា​លាយលក្ខណ៍​​អក្សរ​របស់​ម្ចាស់ បើ​សិន​ជា​អ្នកគ្រប់គ្រង​មិនមែន​ជា​ម្ចាស់កម្មសិទ្ធិ

ជ – សញ្ញាប័ត្រ ឬ វិញ្ញាបនប័ត្ររបស់​អ្នកគ្រប់គ្រង ដែលបញ្ជាក់ពី​ការសិក្សា​មុខជំនាញ​បដិសណ្ឋារ​កិច្ច ឬ គ្រប់គ្រង​ទេសចរណ៍

បន្តចុចអាន៖ មកដឹងលក្ខខណ្ឌ​បើកផ្ទះសំណាក់ សណ្ឋាគារ ត្រូវ​ស្នើ​ត្រឹម​ខណ្ឌ ក្រុង ឬក្រសួង?
បន្តចុចអាន៖ ច្បាប់​ទេសចរណ៍​បញ្ជាក់​ថា អាជីវកម្ម​គ្មាន​អាជ្ញាប័ណ្ណ​អាច​រង​ពិន័យ​ដល់ ២០ លាន​រៀល