ព័ត៌មានជាតិ

ខេត្តមណ្ឌលគិរី មានតំបន់ការពារធម្មជាតិ ៥ កន្លែង គ្របដណ្តប់លើផ្ទៃដីជាង ១ លានហិកតា

បានផុស

៦ ខែ មុន

នៅ

ថ្ងៃអង្គារ ១៧ កញ្ញា ២០២៤

ដោយ

តាមឯកសារអគ្គនាយកដ្ឋានតំបន់ការពារធម្មជាតិនៃក្រសួងបរិស្ថានបានបង្ហាញថា គិតត្រឹមខែសីហាឆ្នាំ ២០២៣ នៅក្នុងខេត្តមណ្ឌលគិរីដែលស្ថិតនៅភាគឦសានមានតំបន់ការពារធម្មជាតិចំនួន ៥ កន្លែង គ្របដណ្តប់លើផ្ទៃដីជាង ១ លាន ២ សែនហិកតា។

ខេត្តមណ្ឌលគិរី មិនត្រឹមតែជាខេត្តមានសក្ដានុពលដែលមានរមណីយដ្ឋានវប្បធម៌ ធម្មជាតិ ប្រវត្តិសាស្ត្រប្រមាណ ១០៥ កន្លែង ប៉ុន្តែខេត្តភូមិភាគឦសាននេះក៏នៅមានដែនជម្រកសត្វព្រៃ រួមទាំងរបៀងអភិវឌ្ឍន៍ជីវៈចម្រុះ និងប្រព័ន្ធតំបន់ការពារធម្មជាតិមួយចំនួនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំបន់ការពារធម្មជាតិទាំង ៥ កន្លែង ក្នុងខេត្តមណ្ឌលគិរីមាន៖

-ដែនជម្រកសត្វព្រៃលំផាត់ (ជាប់ខេត្តមណ្ឌលគិរី និងរតនគិរី) គ្របដណ្តប់លើផ្ទៃដីចំនួន ៣៥៦ ០៨៧ ហិកតា
-ដែនជម្រកសត្វព្រៃភ្នំព្រេច (ខេត្តមណ្ឌលគិរី) គ្របដណ្តប់លើផ្ទៃដីចំនួន ២៦២ ៦៤២ ហិកតា
-ដែនជម្រកសត្វព្រៃភ្នំណាមលៀរ (ខេត្តមណ្ឌលគិរី) គ្របដណ្តប់លើផ្ទៃដីចំនួន ៦៤ ៨៣៥ ហិកតា
–ដែនជម្រកសត្វព្រៃកែវសីមា (ជាប់ខេត្តមណ្ឌលគិរី និងក្រចេះ) គ្របដណ្តប់លើផ្ទៃដីចំនួន ៣១៧ ៤៥៦ ហិកតា
-ដែនជម្រកសត្វព្រៃស្រែពក (ខេត្តមណ្ឌលគិរី) គ្របដណ្តប់លើផ្ទៃដីចំនួន ៣៧២ ៧០៧ ហិកតា

សៀវភៅ “កម្ពុជាមាតុភូមិខ្ញុំ” ដែលបោះពុម្ពដោយក្រសួងបរិស្ថាន បានឱ្យនិយមន័យតំបន់ការពារធម្មជាតិសំដៅដល់តំបន់នៃដែនដីសម្បត្តិសាធារណៈរបស់រដ្ឋ។ សម្បត្តិសាធារណៈទាំងនោះរួមមាន ដែនដីគោក ឬ ដែនដីទឹក ឆ្នេរសមុទ្រ និងសមុទ្រ ស្ថិតនៅតំបន់ដែលទទួលស្គាល់ដោយ បញ្ញត្តិនៃច្បាប់ ឬ តំបន់ដែលបង្កើតថ្មី ក្នុងដែនដីសមត្ថកិច្ចរបស់ក្រសួងបរិស្ថាន។ ក្នុងសៀវភៅនោះ បានបែកចែកតំបន់ការពារធម្មជាតិជា ៨ ប្រភេទមាន៖

១/ តំបន់ឧទ្យានជាតិ ២/ តំបន់ដែនជម្រកសត្វព្រៃ ៣/ តំបន់ការពារទេសភាព ៤/ តំបន់ប្រើប្រាស់ច្រើនយ៉ាង ៥/ តំបន់រ៉ាមសារ ៦/ តំបន់ស្នូលនៃឋបនីយជីវមណ្ឌល ៧/ តំបន់បេតិកភណ្ឌធម្មជាតិ ៨/ តំបន់ឧទ្យានជាតិសមុទ្រ។

តំបន់ការពារធម្មជាតិនីមួយៗបែងចែកចេញជា ០៤ តំបន់គ្រប់គ្រង៖

១. តំបន់ស្នូល៖ ជាតំបន់គ្រប់គ្រងដែលមានតម្លៃខ្ពស់សម្រាប់ការអភិរក្សប្រភេទសត្វ រុក្ខជាតិ ដែលកម្រិតជិតពូជ ទទួលរងគ្រោះថ្នាក់ គម្រាមកំហែង និងមានប្រព័ន្ធអេកូឡូស៊ីផុយស្រួល។

២. តំបន់អភិរក្ស៖ ជាតំបន់គ្រប់គ្រងស្ថិតនៅជាប់នឹងតំបន់ស្នូល ដែលមានតម្លៃខាងការអភិរក្សធនធានធម្មជាតិ ប្រព័ន្ធអេឡូស៊ី តំបន់ទីជម្រាល និងតំបន់ដែលមានលក្ខណៈទេសភាពធម្មជាតិ។

៣. តំបន់ប្រើប្រាស់ដោយចីរភាព៖ ជាតំបន់គ្រប់គ្រងដែលមានតម្លៃសេដ្ឋកិច្ចខ្ពស់បម្រើដល់ការអភិវឌ្ឍសេដ្ឋកិច្ចជាតិ ការគ្រប់គ្រង ការអភិរក្សតំបន់ការពារធម្មជាតិផ្ទាល់ និងចូលរួមលើកកម្ពស់ជីវភាពរស់នៅរបស់ប្រជាសហគមន៍មូលដ្ឋាន និងជនជាតិដើមភាគតិច។

៤. តំបន់សហគមន៍៖ ជាតំបន់គ្រប់គ្រងបម្រើឱ្យការអភិវឌ្ឍសេដ្ឋកិច្ច សង្គមកិច្ចរបស់សហគមន៍ និងជនជាតិដើមភាគតិច ដែលមានលំនៅដ្ឋាន ស្រែ និងចំការ។

សៀវភៅ “កម្ពុជាមាតុភូមិខ្ញុំ” បង្ហាញថា ក្រៅពីតំបន់ការពារធម្មជាតិធំៗទាំង ៨ ក៏មានរបៀងអភិរក្ស ៣ ដែរ គឺនៅភូមិភាគឦសាន និងឧត្តរ និងនៅជួរភ្នំក្រវាញ សរុបផ្ទៃដីចំនួន ១៤២.៧៩៤០ ហិកតា ហើយបើសរុបផ្ទៃដីទាំងអស់នៃតំបន់ការពារធម្មជាតិនៅកម្ពុជាគឺមាន ៧.៥១៥.៣៤២,២៧១ ហិកតា។