រដ្ឋសភានឹងកោះប្រជុំពេញអង្គនៅថ្ងៃទី២០​ កញ្ញា ដើម្បីបោះឆ្នោតផ្តល់ទំនុកចិត្តលើការកែសម្រួលសមាសភាពរាជរដ្ឋាភិបាល

នៅថ្ងៃទី២០ ខែកញ្ញា ឆ្នាំ២០២៤ រដ្ឋសភា នឹងកោះប្រជុំពេញអង្គ ដើម្បីបោះឆ្នោតផ្តល់សេចក្តីទុកចិត្តលើការកែសម្រួលសមាសភាពរាជរដ្ឋាភិបាល ប្រកាសសុពលភាពអាណត្តិតំណាងរាស្រ្តថ្មីមណ្ឌលខេត្តកំពង់ឆ្នាំង និងរបៀបវារៈមួយចំនួនទៀត តាមសំណើរបស់រាជរដ្ឋាភិបាល។

ការអនុម័តកោះប្រជុំពេញអង្គរដ្ឋសភានេះ ធ្វើឡើងនៅក្នុងកិច្ចប្រជុំគណៈកម្មាធិការអចិន្រ្តៃយ៍រដ្ឋសភា នាព្រឹកថ្ងៃទី១៧ ខែកញ្ញា ឆ្នាំ២០២៤នេះ ក្រោមវត្តមានដឹកនាំរបស់សម្តេចរដ្ឋសភាធិបតី ឃួន សុដារី ប្រធានរដ្ឋសភានៃកម្ពុជា ដើម្បីពិនិត្យអនុម័តលើរបៀបវារៈចំនួន។

បន្ទាប់ពីបានពិភាក្សារួចមក កិច្ចប្រជុំគណៈកម្មាធិការអចិន្រ្តៃយ៍រដ្ឋសភា បានអនុម័តកោះប្រជុំជាវិសាមញ្ញ នីតិកាលទី៧ នៅព្រឹកថ្ងៃសុក្រ ទី២០ ខែកញ្ញា ឆ្នាំ២០២៤ ខាងមុខនេះ ដើម្បីពិនិត្យសំណើសុំបោះឆ្នោតផ្តល់សេចក្តីទុកចិត្តលើការ កែសម្រួលសមាសភាពរាជរដ្ឋាភិបាលកម្ពុជាចំនួន២រូប និងការប្រកាសសុពលភាពអាណត្តិតំណាងរាស្រ្តថ្មីមណ្ឌលខេត្តកំពង់ឆ្នាំងជូនលោក ហ៊ឺ វីរៈ ជំនួសសម្តេច គង់ សំអុល ដែលបានទទួលមរណភាព។

ចំណែករបៀបវារៈពីរទៀត គឺការបោះឆ្នោតជ្រើសតំាងលោក អ៊ិត រ៉ាឌី ជាបេក្ខជនសមាជិកឧត្តមក្រុមប្រឹក្សានៃអង្គចៅក្រម សម្រាប់អាណត្តិទី៣ និងការពិភាក្សា និងអនុម័តលើសេចក្តីស្នើវិសោធនកម្មបទបញ្ជាផ្ទៃក្នុងនៃរដ្ឋសភាកម្ពុជា៕