ប្រមុខក្រសួងមហាផ្ទៃ រម្លឹកកងកម្លាំងឱ្យបង្កើនកិច្ចការពារសន្តិសុខសង្គម ខណៈប្រទេសខ្លះកំពុងប្រឈមអសន្តិសុខ

ប្រមុខក្រសួងមហាផ្ទៃ បានក្រើនរម្លឹកឱ្យកងកម្លាំងបង្កើនកិច្ចការពារសន្តិសុខក្នុងសង្គម ខណៈបណ្ដាប្រទេសកាន់តែច្រើនឡើងៗ បាននិងកំពុងប្រឈមនឹងបញ្ហាអសន្តិសុខ សូម្បីតែនៅសហរដ្ឋអាមេរិក ក៏កំពុងមានការប៉ុនប៉ងធ្វើឃាតទៅលើមេដឹកនាំដែរ។

លោកឧបនាយករដ្ឋមន្ត្រី ស សុខា បានចាត់ទុកការងារសន្តិសុខ ថា ជាតួនាទីស្នូលដ៏សំខាន់ ពីព្រោះបញ្ហានេះពាក់ព័ន្ធដោយផ្ទាល់ទៅនឹងជីវភាពប្រជាពលរដ្ឋ និងស្ថិរភាពសង្គមជាតិ ខណៈបណ្ដាប្រទេសកាន់តែច្រើនឡើងៗ បាននឹងកំពុងប្រឈមនឹងបញ្ហាអសន្តិសុខ ដែលក្នុងនោះ ក៏មានការបង្កឡើងដោយអ្នកនយោបាយប្រឆាំង និងក្រុមឧទ្ទាម។

ជាក់ស្ដែង លោក ស សុខា បានលើកជាឧទាហរណ៍នៅសហរដ្ឋអាមេរិក តែងតែកើតមានអំពើបាញ់ប្រហារឃោរឃៅ រហូតថ្មីៗនេះ​ មានទាំងការប៉ុនប៉ងសម្លាប់អតីតប្រធានាធិបតី និងក៏ជាបេក្ខជនប្រធានាធិបតី ដោយសារតែភាពជ្រុលនិយមខាងផ្នែកនយោបាយ។ លោកឧបនាយករដ្ឋមន្ត្រី បានថ្កោលទោសចំពោះការប៉ុនប៉ងធ្វើឃាតបេក្ខជនប្រធានាធិបតីអាមេរិក លោក ដូណាល់ត្រាំ ម្ដងហើយម្ដងទៀត។

ក្នុងន័យនេះ លោកឧបនាយករដ្ឋមន្ត្រី ស សុខា បានអំពាវនាវឱ្យកងកម្លាំង និងអាជ្ញាធរគ្រប់ថ្នាក់បន្តយកចិត្តទុកដាក់លើតួនាទីធានាការពារសន្តិសុខក្នុងសង្គមកម្ពុជា។ ភ្ជាប់នឹងបញ្ហាសន្តិសុខនេះ ប្រមុខក្រសួងមហាផ្ទៃ បានគូសបញ្ជាក់ថា នៅកម្ពុជា ក្រុមប្រឆាំងជ្រុលនិយម ក៏បានប៉ុនប៉ងផ្ដួលរំលំរាជរដ្ឋាភិបាលស្របច្បាប់ជាច្រើនលើកមកហើយ ប៉ុន្តែត្រូវបានបរាជ័យ ដោយសារកិច្ចប្រតិបត្តិការបង្ការ ទប់ស្កាត់ និងបង្ក្រាបប្រកបដោយការទទួលខុសត្រូវរបស់សមត្ថកិច្ច និងការចូលរួមការពារសុខសន្តិភាពយ៉ាងច្រើនលើសលុបពីប្រជាពលរដ្ឋ ជាពិសេសការទប់ស្កាត់រាល់ការប៉ុនប៉ងបង្កអសន្តិសុខ ដើម្បីធ្វើជាឈ្នាន់ប្រជែងអំណាចតាមវិធីក្រៅច្បាប់របស់ក្រុមជ្រុលនិយម។

ការលើកឡើងរបស់ប្រមុខមហាផ្ទៃខាងលើ បានធ្វើឡើងក្នុងឱកាសអញ្ជើញជាអធិបតីក្នុងពិធីបិទវគ្គបណ្ដុះបណ្ដាល នៅបណ្ឌិតសភានគរបាលកម្ពុជា ឃុំដីឥដ្ឋ ស្រុកកៀនស្វាយ ខេត្តកណ្ដាល នាព្រឹកថ្ងៃទី១៧ ខែកញ្ញា ឆ្នាំ២០២៤នេះ៕