ខុសពី​រាល់ឆ្នាំ ផ្សារបឹងព្រលិតរដូវកាន់បិណ្ឌឆ្នាំនេះគេចផុតពីការលិចលង់

ប្រជាពលរដ្ឋរស់នៅតំបន់ផ្សារបឹងព្រលឹតរាប់ពាន់គ្រួសារបាននិយាយថា រដូវបុណ្យកាន់បិណ្ឌឆ្នាំនេះលែងព្រួយបារម្មពី​ជំនន់ទឹកភ្លៀងលិចលង់ផ្ទះសម្បែងទៀតហើយ។

អ្នកស្រី ជា ថារ៉េត ពលរដ្ឋ​រស់នៅក្រុម ១ (តំបន់ផ្សារបឹងព្រលឹត) ភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅរាជធានីភ្នំពេញបានឲ្យដឹងថា ជារៀងរាល់ឆ្នាំជាពិសេសក្នុងអំឡុងពេល ៣ ទៅ ៤ ឆ្នាំនេះ ផ្ទះសម្បែងរបស់ពួកគាត់តែង​រងការលិចលង់ជាច្រើនថ្ងៃ ដោយសារតែបុរីដែលស្ថិតនៅជុំវិញតែងបង្ហូទឹកចូលតំបន់ផ្សារបឹងព្រលឹត ធ្វើឲ្យលិចលង់រហូតដល់ប្រជាពលរដ្ឋខ្លះសម្រេចចិត្តរកផ្ទះជួលស្នាក់នៅបណ្តោះអាសន្នទំរាំទឹករីងស្ងួតទើបមករស់នៅផ្ទះសម្បែងវិញ

ពលរដ្ឋ​រូបនេះបន្ត​ថា លុះមកដល់ចុងឆ្នាំ ២០២៣ អាជ្ញាធររាជធានីភ្នំពេញសហការជាមួយអាជ្ញាធរខណ្ឌច្បារអំពៅ បានសម្រេចធ្វើការសម្របសម្រួលជាមួយប្រជាពលរដ្ឋប្រមាណជាង ២០០ គ្រួសារ ដែលសង់លំនៅដ្ឋានលើព្រែកព្រំប្រទល់សង្កាត់ព្រែកប្រា និងសង្កាត់ព្រែកថ្មីក្នុងខណ្ឌច្បារអំពៅ ដោយរកទីតាំងដីលើព្រែកឲ្យទៅរស់នៅលើដី ដែលអាជ្ញាធរដោះស្រាយជូន ព្រមទាំងមានទឹកភ្លើងរដ្ឋព្រមទាំងធ្វើប័ណ្ណកម្មសិទ្ធិផ្តល់ជូនទៀតផង។

លុះដល់ពេលដែលបងប្អូនទាំងជាង ២០០ គ្រួសារ ស្ម័គ្រ​ចិត្តទៅរស់នៅដីថ្មី ដែលមានចម្ងាយ​ពីព្រែកដែលធ្លាប់រស់នៅប្រមាណជិត ១ គីឡូម៉ែត្រស្ថិតក្នុងសង្កាត់ព្រែកថ្មី ហើយអាជ្ញាធរចាប់ផ្តើមស្តាប្រឡាយបង្ហូរទឹកចូលទៅក្នុងទន្លេបាសាក់ទើបតំបន់ផ្សារបឹងព្រលឹតលែងព្រួយបារម្មណ៍ការលិចលង់ដូចរាល់ឆ្នាំ។

ប្រជាពលរដ្ឋសំដែងការដឹងគុណដល់អាជ្ញាធរ ដែលខិតខំប្រឹងប្រែងរកដំណោះស្រាយដល់ប្រជាពលរដ្ឋធ្លាប់រងការលំបាកដោយសារជំនន់ទឹកភ្លៀងបានរស់នៅយ៉ាងសុខសាន្ត ដោយពុំភ័យខ្លាចនៅពេលមានភ្លៀងធ្លាក់ម្តងៗ៕

អត្ថបទ៖ នរា