ព័ត៌មានជាតិ
តើបុគ្គលិកអប់រំត្រូវហាមឃាត់ទង្វើអ្វីខ្លះ និងកំណត់វិន័យបែបណាពេលធ្វើខុសអំឡុងពេលប្រឡងបាក់ឌុប?
សាធារណជនតែងដឹងច្រើនមកហើយ អំឡុងពេលប្រឡងបាក់ឌុប ក្រសួងអប់រំបានហាមឃាត់មិនឱ្យបេក្ខជនប្រឡងប្រព្រឹត្តទង្វើមួយចំនួនអំឡុងពេលប្រឡង មិនដូច្នេះទេ នឹងធ្លាក់ស្វ័យប្រវត្តិ ឬដកឈ្មោះចេញពីការប្រឡង។ ចុះចំណែកបុគ្គលិកអប់រំវិញ អំឡុងពេលប្រឡងបាក់ឌុប តើក្រសួងបានហាមប្រាម និងណែនាំមិនឱ្យប្រព្រឹត្តទង្វើបែបណាខ្លះ? ប្រសិនជាល្មើសនឹងការណែនាំ តើត្រូវទទួលវិន័យដូចម្តេចទៅ?
![](https://www.kampucheathmey.com/wp-content/uploads/2024/09/image-1344.png)
ក្រសួងអប់រំ យុវជន និងកីឡា នៅថ្ងៃទី១៨ ខែកញ្ញា ឆ្នាំ២០២៤ បានចេញការណែនាំដល់បុគ្គលិកអប់រំ ៣ចំណុច លើទំព័រហ្វេសប៊ុក ចំពោះសកម្មភាពដែលមិនគួរប្រព្រឹត្តអំឡុងពេលប្រឡងបាក់ឌុប ថ្ងៃទី៨ ខែតុលា ឆ្នាំ២០២៤ខាងមុខ។ បុគ្គលិកអប់រំដែលប្រព្រឹត្តសកម្មភាពមិនត្រឹមត្រូវក្នុងការប្រឡងដូចខាងក្រោម ត្រូវទទួលទណ្ឌកម្មខាងវិន័យថ្នាក់ទី១ ដោយមិនគិតពីទោសតាមក្រមព្រហ្មទណ្ឌនោះទេ។ សកម្មភាពទាំងនោះមានដូចជា៖
១.ការប្រព្រឹត្តសកម្មភាពមិនត្រឹមត្រូវក្នុងដំណើរការទូទៅនៃការប្រឡង
បុគ្គលិកអប់រំ បង្កើតបណ្តាញស្វែងរកផលកម្រៃពីការប្រឡងនោះទេ។ យកទូរសព្ទ ឬឧបករណ៍អេឡិចត្រូនិកគ្រប់ប្រភេទចូលមណ្ឌលប្រឡងខុសពីគោលការណ៍ណែនាំរបស់ក្រសួង។ ផ្តល់ ឬទទួលប្រាក់ដើម្បីរៀបចំបែងចែកតួនាទីក្នុងគណៈកម្មការប្រឡង។ ចូលរួម ឬឱ្យអ្នកផ្សេងធ្វើមេប្រយោគជំនួស។ ជួយលាក់បាំងទង្វើខុសឆ្គងរបស់របស់គណៈមេប្រយោគ ឬគណៈកម្មការប្រឡង។ មិនចូលរួមប្រជុំដោយគ្មានមូលហេតុ ឬមិនអនុវត្តតាមការណែនាំបច្ចេកទេសប្រឡង។ មិនអនុវត្តពេញលេញតាមភារកិច្ចគណៈមេប្រយោគ ឬ គណៈកម្មការដូចមានចែងក្នុងកម្រងភារកិច្ចរបស់គណៈមេប្រយោគតាមការកំណត់របស់ក្រសួង។
២.ការប្រព្រឹត្តសកម្មភាពមិនត្រឹមត្រូវក្នុងដំណើរការតាមមណ្ឌលសំណេរ
អនុញ្ញាតឱ្យបេក្ខជនចម្លងកិច្ចការគ្នា ឬការពារបេក្ខជនឱ្យចម្លងសំណៅឯកសារ។ គម្រាម ឬសម្លុតបេក្ខជនក្នុងពេលប្រឡង។ ធ្វើ ឬយកចម្លើយវិញ្ញាសារឱ្យបេក្ខជន។ បង្គាប់បញ្ជាឱ្យអ្នកដទៃធ្វើចម្លើយវិញ្ញាសា។ អនុញ្ញាតឱ្យបេក្ខជនយកសំណៅឯកសារ និងគ្រឿងអេឡិចត្រូនិកគ្រប់ប្រភេទចូលចូលបន្ទប់ប្រឡង។ អនុញ្ញាតឱ្យបេក្ខជននិយាយឆ្លើយឆ្លងគ្នា ឬដើរពីតុមួយទៅតុមួយ។ យកសំណៅឯកសារពីអ្នកដទៃ ឬពីបេក្ខជនម្នាក់ទៅឱ្យបេក្ខជនម្នាក់ទៀតចម្លង។ ធ្វើឱ្យរំខានដល់បេក្ខជនក្នុងពេលប្រឡង។ ប្តូរប្លង់តុឱ្យបេក្ខជនខុសពីការកំណត់របស់គណៈមេប្រយោគ។
![](https://www.kampucheathmey.com/wp-content/uploads/2024/09/image-1340-1024x768.png)
៣.ការប្រព្រឹត្តមិនត្រឹមត្រូវក្នុងដំណើរការមណ្ឌលកំណែ
មិនកែតាមអត្រាកំណែដែលបានសម្រេច។ ដើរចេញពីក្រុមកំណែផ្សេងខុសពីក្រុមខ្លួនឯង។ រំខានអ្នកដទៃក្នុងដំណើរការកំណែ។ ដាក់ពិន្ទុខុសប្រក្រតីក្នុងកិច្ចការរបស់បេក្ខជន។ បញ្ចូល ឬបង្ហោះអត្រាកំណែ កិច្ចការបេក្ខជន ឯកសារប្រឡងផ្សេងៗតាមបណ្តាញសង្គមនានាក្នុងអំឡុងពេលប្រឡង។
![](https://www.kampucheathmey.com/wp-content/uploads/2024/09/image-1343-1024x576.png)
ជុំវិញនឹងការណែនាំពីសកម្មភាពដែលមិនគួរធ្វើអំឡុងពេលប្រឡងបាក់ឌុប សម្រាប់បុគ្គលិកអប់រំនេះ ក្រសួងអប់រំក៏បានចេញនៅថ្ងៃទី១៨ ដដែលតាមប្រព័ន្ធតេឡេក្រាម ចំពោះការកំណត់ទណ្ឌកម្មខាងវិន័យ (ដោយមិនគិតទោសព្រហ្មទណ្ឌ) លើគណៈមេប្រយោគ គណៈកម្មការ និងអនុគណៈកម្មការទាំងឡាយណាដែលប្រព្រឹត្តកំហុសក្នុងអំឡុងពេលប្រឡងដូចខាងក្រោម៖
១.ទណ្ឌកម្មខាងវិន័យថ្នាក់ទី១
ក្រសួងនឹងធ្វើការស្តីបន្ទោស ដល់បុគ្គលិកអប់រំដែលធ្វើខុស។ ផ្អាកជាបណ្តោះអាសន្នមិនឱ្យបន្តបំពេញការងារក្នុងដំណើរការប្រឡង។ ស្តីបន្ទោសដោយមានចំណារក្នុងសំណុំលិចិតផ្ទាល់ខ្លួន។ ផ្អាកមិនឱ្យចូលរួមជាគណៈមេប្រយោគពី១ឆ្នាំ ទៅ២ឆ្នាំ តាមការសម្រេចរបស់ក្រុមប្រឹក្សាវិន័យ។ ផ្លាស់ដោយបង្ខំតាមវិធានការខាងវិន័យ លុបឈ្មោះចេញពីតារាងឡើងឋានន្តរស័ក្តិ ឬថ្នាក់។
២.ទណ្ឌកម្មខាងវិន័យថ្នាក់ទី២
ក្រសួងនឹងស្តីបន្ទោសជាទម្ងន់ បណ្តាលឱ្យលុបឈ្មោះចេញពីតារាងឡើងឋានន្តរស័ក្តិ ឬថ្នាក់ ប្រសិនបើមានឈ្មោះហើយ ឬធ្វើឱ្យយឺតក្នុងការដំឡើងឋានន្តរស័ក្តិ ឬថ្នាក់តាមវេនជ្រើសរើស ឬតាមអតីតភាព។ ដាក់ឱ្យនៅទំនេរគ្មានបៀវត្សរ៍មិនឱ្យលើសពី១ឆ្នាំ។ បន្ថយឋានន្តរស័ក្តិ ឬថ្នាក់មួយថ្នាក់ ឬច្រើនថ្នាក់។ ដាក់ឱ្យចូលនិវត្តន៍មុនកំណត់ ឬបញ្ឈប់ពីការងារដោយបង្ខំ ឬឈានដល់ការបណ្តេញចេញពីមុខតំណែងមន្ត្រីរាជការតែម្តង៕
![](https://kampucheathmey.com/wp-content/uploads/2020/12/1-01-2-01-1.png)
-
សន្តិសុខសង្គម៣ ថ្ងៃ ago
«ចែមុំបុកល្ហុង» សង្ស័យបង្កប់សេវាកម្មផ្លូវភេទ នគរបាលចុះបង្ក្រាបឃាត់ខ្លួនមនុស្ស១១នាក់
-
សន្តិសុខសង្គម៥ ថ្ងៃ ago
អ្នកកាសែតម្នាក់ត្រូវឃាត់ខ្លួនក្រោយដោះមីនតោនដឹកយកទៅឱ្យប៉ូលិស
-
ជីវិតកម្សាន្ដ៦ ថ្ងៃ ago
ផ្ទុះការចាប់អារម្មណ៍នឹងយុវតីម្នាក់ សំឡេងពីរោះ ច្រៀងស្រដៀងនឹងរាជិនីសំឡេងសារិកាមាស ប៉ែន រ៉ន
-
ព័ត៌មានអន្ដរជាតិ៥ ថ្ងៃ ago
ធ្លាក់យន្តហោះនៅ អាឡាស្កា អ្នកជិះក្នុងនោះ ស្លាប់ទាំងអស់
-
សន្តិសុខសង្គម១ សប្តាហ៍ ago
Breaking News៖ អគ្គិភ័យកំពុងឆេះក្លឹបមួយកន្លែងនៅជិតវត្តឬស្សីសាញ់(មានវីដេអូ)
-
ព័ត៌មានជាតិ៣ ថ្ងៃ ago
ករណីលូ១តម្លៃ៤០ដុល្លា៖ អាជ្ញាធរ ថាមិនបានយកលុយពីពលរដ្ឋឡើយ គឺពលរដ្ឋជួលភាគីឯកជនឱ្យដាក់ខ្លួនឯង
-
ជីវិតកម្សាន្ដ២ ថ្ងៃ ago
G-Devith ដាក់បណ្តឹងទៅ UNICEF នៅកម្ពុជា ដើម្បីលុបជាអចិន្ត្រៃយ៍គ្រប់គណនីហ្វេសប៊ុក ដែលប៉ះពាល់សិទ្ធិកុមារ តាមគ្រប់រូបភាព
-
ចរាចរណ៍៣ ថ្ងៃ ago
ផ្លូវ៦០ម៉ែត្រទៀត! រថយន្ដពាក់ស្លាកលេខរដ្ឋ បុករះរថយន្ដ២គ្រឿងកំពុងឈប់ចាំភ្លើងស្តុបរងការខូចខាត