ព័ត៌មានជាតិ

អាជ្ញាធរណែនាំពលរដ្ឋប្រុងប្រយ័ត្នចំពោះកូនចៅតូចៗ កុំឲ្យចុះហែលទឹក ខណៈទឹកឡើងខ្លាំង

បានផុស

៤ ខែ មុន

នៅ

ថ្ងៃព្រហស្បតិ៍ ១៩ កញ្ញា ២០២៤

ដោយ

អាជ្ញាធរសង្កាត់ទាំង ៨ ក្នុងមូលដ្ឋានខណ្ឌច្បារអំពៅ រាជធានីភ្នំពេញ បានធ្វើការណែនាំប្រជាពលរដ្ឋដែលរស់នៅជួរមាត់ទន្លេបាសាក់ និងមេគង្គក្រោម ឲ្យប្រុងប្រយ័ត្នទៅលើកូនចៅ កុំឲ្យចុះហែលទឹកលេង ខណៈទឹកទន្លេកំពុងហក់ឡើងលឿន ហើយពិសេសជាងនេះគឺកម្លាំងទឹកកំពុងហូរលឿន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពៅ ហួត ចៅសង្កាត់ច្បារអំពៅទី ១ បានឲ្យដឹងថា ក្នុងរយៈពេល ៣ ថ្ងៃនេះ ទឹកបានហក់ឡើងជាង ១ ម៉ែត្រ ហើយកម្លាំងទឹកហូរលឿនទៀតផង។ ដូច្នេះហើយទើបលោកបានឲ្យលោកមេភូមិចុះណែនាំដល់ប្រជាពលរដ្ឋដែលមានលំនៅឋានជាប់ដងទន្លេបាសាក់ ត្រូវហាមប្រាមមិនឲ្យកូនចៅចុះហែលទឹក ព្រោះទឹកហូរលឿនពេក។

លោក ពៅ ហួត បានបញ្ជាក់ថា កម្ពស់ទឹកនៅសល់ ១ ម៉ែត្រ ទើបឡើងលិចដល់ផ្ទះប្រជាពលរដ្ឋដូចអំឡុងឆ្នាំ ២០១៥។

ដោយឡែក លោក យ៉ិន វុធ ចៅសង្កាត់ច្បារអំពៅទី ២ វិញ ក៏បានបញ្ជាក់ដែរថា មកដល់រសៀលថ្ងៃទី ១៩ ខែកញ្ញា នេះ កម្ពស់ទឹកបានហក់ឡើង ហើយទឹកហូរលឿនចុះក្រោម ឆ្ពោះទៅខេត្តកណ្ដាល និងបន្តទៅប្រទេសវៀតណាម។ ឆ្នាំនេះ កម្ពស់ទឹក អាចហក់ឡើងជាងឆ្នាំ ២០២៣ បើសិនជាទឹកទន្លេមេគង្គក្រោម បន្តហក់ឡើងខ្លាំងដូចថ្ងៃទី ១៨ និង ១៩ ខែកញ្ញា នេះ៕

អត្ថបទ ៖ នរា