ព័ត៌មានជាតិ

ផ្ទះពលរដ្ឋ៣ខ្នងហើយក្នុងឃុំកោះសូទិន ត្រូវរុះរើដោយរងការគំរាមគំហែងពីជំនន់ទឹកទន្លេមេគង្គ

បានផុស

៤ ខែ មុន

នៅ

ថ្ងៃព្រហស្បតិ៍ ១៩ កញ្ញា ២០២៤

ដោយ

កំពង់ចាម ៖ អាជ្ញាធរស្រុកកោះសូទិន បន្តចុះជួយសង្គ្រោះ និងអន្តរាគមន៍ផ្ទះសម្បែងរបស់ប្រជាពលរដ្ឋចំនួនពីរខ្នងទៀត នៅឃុំកោះសូទិន ដោយមានផ្ទះប្រមាណជាង៤គ្រួសារទៀតត្រូវប្រឈមការបាក់ស្រុតច្រាំងទន្លេ ខណៈទឹកទន្លេមេគង្គបន្តហក់ឡើងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យី វណ្ណៈ អភិបាលនៃគណៈអភិបាលស្រុកកោះសូទិន បានឲ្យដឹងថា រយៈពេលប៉ុន្មានថ្ងៃនេះ ទឹកទន្លេមេគង្គបានហក់ឡើងជាគំហុក បណ្តាលឲ្យផ្លូវបេតុងមួយចំនួន ត្រូវជន់លិចហើយប្រជាពលរដ្ឋធ្វើដំណើរតាមទូកចម្លង ឬសាឡាងជំនួសវិញ និងដោយឡែកនៅឃុំកោះសូទន មានផ្ទះសម្បែងរបស់ប្រជាពលរដ្ឋត្រូវប្រឈមការបាក់ស្រុតច្រាំងទន្លេ។ លោកអភិបាលស្រុកកោះសូទិន បន្តទៀតថា ក្រោយពីមានស្នើសុំនិងដូចមានការរាយការណ៍ពីអាជ្ញាធរមូលដ្ឋានមកគណៈបញ្ជាឯកភាពស្រុកបានសហការជាមួយកងកម្លាំងនគរបាលស្រុក ប្រជាការពារ និងប្រជាពលរដ្ឋ បានធ្វើជួយរុះរើផ្ទះដែលប្រឈមរងការបាក់ស្រុតត្រូវជំលៀសទៅរកទីសុវត្ថិភាពជំនួសវិញ។

ទន្ទឹមនឹងនេះដែរ លោក យី វណ្ណៈ អភិបាលនៃគណៈអភិបាលស្រុកកោះសូទិន បានបញ្ជាក់ទៀតថា ផ្ទះសម្បែងរបស់ប្រជាពលរដ្ឋដែលត្រូវបានអាជ្ញាធរក៍កងកម្លាំងសមត្ថកិច្ចជួយអន្តរាគមន៍និងរុះរើនោះ គិតមកដល់ថ្ងៃទី១៩ ខែកញ្ញា ឆ្នាំ២០២៤នេះ មានបីខ្នងផ្ទះហើយ ត្រូវបន្តរៀបចំត្រៀមរុះរើបន្ថែមទៀត ក្នុងភូមិទី៩ ភូមិទី១២ នៃឃុំកោះសូទិន។

ជាមួយគ្នានេះដែរ លោក អ៊ុន ចាន់ដា អភិបាលខេត្តកំពង់ចាមនិងជាគណៈបញ្ជាឯកភាពខេត្ត ក៏ណែនាំឲ្យអាជ្ញាធរមូលដ្ឋានទាំងអស់ឲ្យយកចិត្តទុកដាក់តាមដានពីស្ថានភាពទឹកជំនន់ ដែលអាចបង្កឲ្យជន់លិចលំនៅឋានរបស់ពលរដ្ឋ និងត្រៀមរៀបចំទីទួលសុវត្ថិភាពជូនពួកគាត់ ជាពិសេសនោះរដ្ឋបាលខេត្ត ក៏បានឱ្យក្រុមគ្រូពេទ្យត្រៀមថ្នាំសង្កូវ ក៏ដូចផ្សព្វផ្សាយ ណែនាំបន្ថែមឲ្យបងប្អូនប្រជាពលរដ្ឋដែលប្រឈមរងគ្រោះដោយទឹកជំនន់ជន់ត្រូវបង្កើនការយកចិត្តទុកដាក់មើលថែរទាំកូនចៅតូចៗប្រយ័ត្នលង់ទឹក និងថែរទាំសុខភាព អនាម័យខ្លួនប្រាណជាប្រចាំ ដើម្បីជៀសឆ្ងាយពីការឆ្លងទាំងឡាយ៕

អត្ថបទនិងរូបភាព ៖ ឡេក ចាន់ពេជ្រ