ព័ត៌មានជាតិ

ក្រមបរិស្ថាន-ធនធានធម្មជាតិ ជាអាវក្រោះការពារខ្លួនចំពោះមន្រ្តីអនុវត្តច្បាប់

បានផុស

២១ វិនាទី មុន

នៅ

ថ្ងៃសុក្រ ២០ កញ្ញា ២០២៤

ដោយ

លោក អ៊ាង សុផ្លែត រដ្ឋមន្ត្រីក្រសួងបរិស្ថាន បានលើកឡើងថា ក្រមបរិស្ថាន និងធនធានធម្មជាតិ ជាផែនទីចង្អុលផ្លូវ និងជាអាវក្រោះការពារខ្លួនចំពោះមន្រ្តីអនុវត្តច្បាប់ ដើម្បីគ្រប់គ្រងបរិស្ថាន និងធនធានធម្មជាតិ ឱ្យកាន់តែប្រសិទ្ធភាពថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅរសៀលថ្ងៃទី ១៩ ខែកញ្ញា ឆ្នាំ២០២៤ ក្នុងពិធីផ្សព្វផ្សាយ និងបញ្រ្ជាបចំណេះដឹងពាក់ព័ន្ធនឹងក្រមបរិស្ថាន លោក អ៊ាង សុផល្លែត មានប្រសាសន៍ថា ប្រសិនបើគ្មានច្បាប់ទេ ក៏មិនអាចមានបរិស្ថាន ប្រសិនជាគ្មានច្បាប់ទេ ក៏គ្មានធនធានធម្មជាតិដែរ ហើយបើគ្មានច្បាប់ទេ ក៏មិនអាចអនុវត្តការងារឱ្យសម្រេចតាមគោលនយោបាយរបស់រាជរដ្ឋាភិបាល ដែលបានដាក់ចេញបានដែរ។

ជាក់ស្តែង ចំពោះក្រមបរិស្ថាន និងធនធានធម្មជាតិ ដែលបានដាក់ចេញកន្លងនេះ ជាផែនទីចង្អុលផ្លូវ និងជាអាវក្រោះការពារខ្លួនចំពោះមន្រ្តីអនុវត្តច្បាប់ក្នុងការគ្រប់គ្រងធនធានធម្មជាតិ និងបរិស្ថានកាន់តែប្រសើរ។

លោករដ្ឋមន្ត្រី ក៏បានជំរុញដល់មន្រ្តីទាំងអស់ត្រូវយល់ដឹងអំពី ក្រមបរិស្ថាន និងធនធានធម្មជាតិ និងយកទៅប្រើប្រាស់ក្នុងបុព្វហេតុការពារបរិស្ថាន និងធនធានធម្មជាតិ ការអភិវឌ្ឍសេដ្ឋកិច្ចជាតិ និងសង្គម និងការឆ្លើយតបកាន់តែមានប្រសិទ្ធភាពចំពោះការប្រែប្រួលអាកាសធាតុ។

ក្រមបរិស្ថាន និងធនធានធម្មជាតិ បានប្រកាសដាក់ឱ្យប្រើប្រាស់ជាផ្លូវការ កាលពីថ្ងៃទី២៨ ខែមិថុនា ឆ្នាំ២០២៤ កន្លងទៅ ដែលក្រមនេះ ត្រូវបានក្រសួងចំណាយពេលវេលាជាង ៨ ឆ្នាំ ដើម្បីចងក្រង និងឆ្លងកាត់ការពិនិត្យ សម្រេច និងអនុម័ត្រតាមដំណាក់កាលច្បាប់ជាបន្តបន្ទាប់។ ក្រមនេះចែកចេញជា ១២កន្ថី និងមានមាត្រាសរុប៨៦៥៕