ព័ត៌មានជាតិ

ឆ្នាំនេះ មានបេក្ខជនដាក់ពាក្យប្រឡងបាក់ឌុបជាង ១៣ ម៉ឺននាក់ ថយចុះជាងឆ្នាំមុន

បានផុស

២៤ វិនាទី មុន

នៅ

ថ្ងៃសុក្រ ២០ កញ្ញា ២០២៤

ដោយ

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅព្រឹកថ្ងៃទី ២០ កញ្ញា នេះថា សម្រាប់ឆ្នាំនេះ ក្រសួងអប់រំ នឹងរៀបចំប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបសម័យប្រឡង ៖០៨ តុលា ២០២៤ ដោយមានបេក្ខជនដាក់ពាក្យប្រឡងចំនួន ១៣៧ ០៤០ នាក់ ស្រី ៧៤ ៨៨២ នាក់ ចែកជា ២៣០ មណ្ឌល ត្រូវជា ៥ ៥៣៤ បន្ទប់។

លោកស្រីបានបន្តថា ក្នុងនោះ ថ្នាក់វិទ្យាសាស្ត្រមានចំនួន ៣៩ ៣៥៨ នាក់ ស្រី ២៣ ៧១៥ នាក់ មាន ៧៣ មណ្ឌល ត្រូវជា ១ ៦០៣ បន្ទប់ និងថ្នាក់វិទ្យាសាស្ត្រសង្គមមានចំនួន ៩៧ ៦៨២ នាក់ ស្រី ៥១ ១៦៧ នាក់ មាន ១៥៧ មណ្ឌល ត្រូវជា ៣ ៩៣១ បន្ទប់។

ចំនួននេះបើធៀបទៅនឹងការប្រឡងឆ្នាំ ២០២៣ កន្លងទៅ ឃើញថា មានការថយចុះ ខណៈឆ្នាំមុនបេក្ខជនចុះឈ្មោះប្រឡងសរុបចំនួន ១៣៧ ៤១២ នាក់ ស្រី ៧៣ ២៧៨ នាក់ ចែកជា ២២៧ មណ្ឌល ត្រូវជា ៥ ៥៤៣ បន្ទប់ ក្នុងនោះ មានបេក្ខជនប្រឡងជាប់បាក់ឌុបសរុប ៩៨ ៤៦០ នាក់ ត្រូវជា ៧២,៨៩ ភាគរយ នៃចំនួនបេក្ខជនមកប្រឡងចំនួន ១៣៥ ០៨៤ នាក់ ស្រី ៧២ ៣៤៤ នាក់ ក្នុងនោះ បេក្ខជនជាប់និទ្ទេស A ចំនួន ១ ៦៧៣ នាក់, និទ្ទេស B ចំនួន ៦៩៦៤ នាក់ និទ្ទេស C ចំនួន ១៨ ៣០៨ នាក់, និទ្ទេស D ចំនួន ៣៤ ២៤៦ នាក់ និងនិទ្ទេស E ចំនួន ៣៧ ២៦៩ នាក់៕

អត្ថបទ ៖ សំអឿន