ព័ត៌មានជាតិ

ប.ស.ស តម្រូវឱ្យម្ចាស់សហគ្រាសគ្រឹះស្ថាន ចុះបញ្ជីបុគ្គលិក ឬ កម្មករ ដើម្បីទទួលបានអត្ថប្រយោជន៍ផ្សេងៗ ពីរដ្ឋាភិបាល

បានផុស

៥ ខែ មុន

នៅ

ថ្ងៃសៅរ៍ ២១ កញ្ញា ២០២៤

ដោយ

បេឡាជាតិរបបសន្តិសុខសង្គម (ប.ស.ស) បានតម្រូវឱ្យម្ចាស់សហគ្រាសគ្រឹះស្ថាន ចុះបញ្ជីបុគ្គលិក និងកម្មករ-និយោជិតរបស់ខ្លួនជាមួយ ប.ស.ស ដើម្បីទទួលបានអត្ថប្រយោជន៍ផ្សេងៗ ពីរាជរដ្ឋាភិបាល ពិសេសសេវាថែទាំសុខភាពនៅតាមមន្ទីរពេទ្យជាដៃគូ ប.ស.ស ដោយឥតគិតថ្លៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម ប.ស.ស បានបញ្ជាក់ថា «ដើម្បីអាចឱ្យបុគ្គលិក និងកម្មករ-និយោជិតរបស់លោកអ្នក អាចប្រើប្រាស់សេវា ប.ស.ស នៅតាមមន្ទីរពេទ្យដៃគូ និងទទួលបានអត្ថប្រយោជន៍របបសន្តិសុខសង្គមពី ប.ស.ស លោកអ្នកដែលជាថៅកែ ឬ ម្ចាស់សហគ្រាស គ្រឹះស្ថាន ត្រូវមានកាតព្វកិច្ចចុះបញ្ជីបុគ្គលិក ឬ កម្មករ-និយោជិតរបស់ខ្លួនជាមួយ ប.ស.ស និងបង់ភាគទានជូនពួកគាត់ទៅលើ ផ្នែកថែទាំសុខភាព ផ្នែកហានិភ័យការងារ និងផ្នែកប្រាក់សោធន (មានការចូលរួមរវាងនិយោជក និងសាមីខ្លួនផ្ទាល់)»។

លោក គឹម កែវរស្មី អគ្គនាយករង ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា គិតត្រឹមថ្ងៃទី ៥ ខែកញ្ញា ឆ្នាំ ២០២៤ មានសហគ្រាស គ្រឹះស្ថាន បានចុះបញ្ជីផ្នែកថែទាំសុខភាព សរុបចំនួន ២៨ ៥១០ សហគ្រាស និងមានសមាជិក ប.ស.ស សរុបចំនួន ២ ៤៥៩ ២៣៩ នាក់។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានពង្រីកវិសាលភាពផ្នែកថែទាំសុខភាពជាមួយមូលដ្ឋានសុខាភិបាលដែលជាដៃគូរបស់ខ្លួនបានចំនួន ១ ៥៧៣ នៅទូទាំង ២៥ រាជធានី-ខេត្ត សម្រាប់រង់ចាំបម្រើសេវាថែទាំសុខភាព និងព្យាបាលដល់សមាជិក ប.ស.ស និងដាក់ពង្រាយមន្ត្រី និងបុគ្គលិកសុខាភិបាលសរុបចំនួនជាង ៤៦ ០០០ នាក់ នៅទូទាំងប្រទេស ដើម្បីរង់ចាំបម្រើសេវាកម្មជូនប្រជាពលរដ្ឋប្រកបដោយក្រមសីលធម៌ និងរហ័ស៕

អត្ថបទ ៖ សំអឿន