អាជ្ញាធរស្រុកគិរីសាគរ កំពុងតភ្ជាប់ផ្លូវស្ពានលូភ្លោះប្រវែង២០ម៉ែត្រ ក្រោយបាក់ទំនប់ទឹកហូរបុកផ្តាច់

អាជ្ញាធរស្រុកគិរីសាគរ កំពុងពិនិត្យតភ្ជាប់ផ្លូវស្ពានភ្លោះ១កន្លែងប្រវែង២០ម៉ែត្រ ទទឹង១០ម៉ែត្រ ដើម្បីសម្រួលការចរាចរណ៍ទៅមករបស់ប្រជាពលរដ្ឋ បន្ទាប់ពីចរន្តទឹកហូរខ្លាំងហូរបុកបាក់ កាលពីថ្ងៃទី១៨ ខែកញ្ញា កន្លងទៅ។

លោក ទួន ឪទី អភិបាលរងស្រុកគិរីសាគរ បានគូសបញ្ជាក់នៅថ្ងៃទី២២ ខែកញ្ញា ឆ្នាំ២០២៤នេះថា ក្រុមការងារពាក់ព័ន្ធទាំងអស់ប្រើប្រាស់ថវិកាស្រុក ព្រមទាំងកៀរគរសប្បុរសជនមួយចំនួនជួលគ្រឿងចក្រដឹកដីទៅចាក់បំពេញជាបណ្តោះអាសន្នផ្លូវស្ពានភ្លោះ១កន្លែងស្ថិតនៅឃុំភ្ញីមាស សំដៅដល់ការជួយសម្រួលធ្វើដំណើររបស់ប្រជាពលរដ្ឋឡើងវិញ។

បើតាមលោកអភិបាលរងស្រុក គិតមកទល់ម៉ោងបានក្រុមការងារសម្រេចការចាក់អាចម៍ដីបំពេញនៅទីតាំងដែលរងផល ប៉ះពាល់៨០ភាគរយហើយដោយនឹងបញ្ចប់សកម្មភាពនៅម៉ោង២រសៀលនេះ។ សម្រាប់ស្ថានភាពធាតុអាកាស គឺមានភាពល្អប្រសើរច្រើនជាងពេលជាង២ទៅ៣ថ្ងៃមុន ដោយកម្រិតទឹកភ្លៀងហាក់ថមថយចុះ។

គួររម្លឹកថា កាលពីថ្ងៃទី១៨ ខែកញ្ញា កន្លងទៅ មានការបាក់ទំនប់អាងទឹកស្អាតរបស់ក្រុមហ៊ុន ANCO Water Supply  របស់អ្នកឧកញ៉ា កុក អាន បង្កផលប៉ះពាលដល់ការរស់នៅរបស់ពលរដ្ឋ១១គ្រួសារ និងលិចផលដំណាំមួយចំនួននៅភូមិក្រៀនក្រឡាញ់ ឃុំភ្ញីមាស។ ទោះយ៉ាងណាអាជ្ញាធរអះអាងថា គ្រោះមហន្តរាយនេះមិនបង្កគ្រោះថ្នាក់ធ្ងន់ធ្ងរអ្វីឡើយ ខណៈបន្តចុះពិនិត្យគ្រប់ភូមិសាស្រ្តដែលប្រឈម និងផ្សព្វផ្សាយអប់រំដល់ប្រជាពលរដ្ឋអំពីប្រុងប្រយ័ត្នខ្ពស់ ដើម្បីជម្លៀសប្រជាពលរដ្ឋទៅទីទួលសុវត្ថិភាពបានទាន់ពេលវេលា៕ អត្តបទៈសិរិវឌ្ឍនៈ