ព័ត៌មានជាតិ

ពលរដ្ឋជិត១៥០គ្រួសារ បានជម្លៀស មកកាន់ទីទួលសុវត្ថិភាព ក្នុងស្រុកត្បូងឃ្មុំ

បានផុស

៥ ខែ មុន

នៅ

ថ្ងៃអាទិត្យ ២២ កញ្ញា ២០២៤

ដោយ

ខណៈទឹកទន្លេមេគង្គបានជនលិច ភូមិមួយចំនួន ក្នុងឃុំពីរនៃស្រុកត្បូងឃ្មុំ អាជ្ញាធរបានជម្លៀស ពលរដ្ឋ និងសត្វពាហនៈ ទៅកាន់ទីទួលសិវត្ថិភាពចំនួនពីរគឺ១ទួលសុវត្ថិភាពអាន ម៉ាឌី ស្ថិតក្នុងភូមិទន្លេបិទ ឃុំទន្លេបិទ ស្រុក/ខេត្តត្បូងឃ្មុំ ។ និង២.ទួលសុវត្ថិភាពទួលវិហារ ស្ថិតក្នុងភូមិទួលវិហារ ឃុំជីរោទិ៍ទី១ ស្រុក/ខេត្តត្បូងឃ្មុំ ។ ការជម្លៀស នេះធ្វើឡើងនៅថ្ងៃទី២០ ដល់២៣ ខែកញ្ញា ឆ្នាំ២០២៤ ។

លោក សេង សុខខឿន អភិបាល នៃគណៈអភិបាលស្រុកត្បូងឃ្មុំ បានឲ្យដឹងថា ទឹកជំនន់បានជនលិចឃុំចំនួន២ គឺឃុំទន្លេបិទ និងឃុំជីរោទិ៍១ ។ ក្នុងនោះទឹកបានលិចភូមិចំនួន១៩ភូមិ ទាំង២ឃុំ គឺឃុំទន្លេបិទ ចំនួន១០ភូមិ រួមមាន. ភូមិទួលគរ ព្រែកតូច ព្រែកជីក ទួលខ្សាច់ ដូនម៉ៅក្រោម ដូនម៉ៅលើ ទន្លេបិទក្រោម ទន្លេបិទលើ ទន្លេបិទ និងភូមិយាយស ។ និងឃុំជីរោទិ៍ទី១ ចំនួន៩ភូមិ.គឺ ភូមិព្រែកតូច រកាធំ ជីរោទិ៍ទី១ ជីរោទិ៍ទី២ ជីរោទិ៍កណ្តាល ជីរោទិ៍លើ ជួរកណ្តាល កំពង់ឫស្សី និងភូមិទួលកែវ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលបានបន្តឲ្យដឹងទៀតថា យើងបានជម្លៀស ពលរដ្ឋចំនួន ១៤៦គ្រួសារ និង សត្វពាហនៈ គោចំនួន ២៧៦ក្បាល ក្របី២០២ក្បាល និងពពែចំនួន ៣៥១ក្បាល ។ ក្នុងនោះដែរ បើស្ថានភាពទឹកនៅបន្តឡើងទៀត ស្រុកបានត្រៀមកម្លាំងជានិច្ច ចាំអន្តរាគមន៍ជួយដល់ពលរដ្ឋពីបណ្តាភូមិដែលលិចទឹកមកកាន់ ទីទួលសុវត្ថិភាពទាំងពីរខាងលើ យើងបានផ្តល់ទឹកស្អាត និងបង្គន់អនាម័យ សម្រាប់បម្រើសេចក្តីត្រូវការជូនពួកគាត់ ពិសេសជំនាញពេទ្យសត្វខេត្តបានបាញ់ថ្នាំសម្លាប់បាក់តេរី សត្វល្អិត រួចរាល់ផងដែរ រដ្ឋបាលក៏បានណែនាំដល់បងប្អូនយើង សូមឲ្យមានការប្រុងប្រយ័ត្នខ្ពស់ ត្រូវហូបទឹកឆ្អិន ទឹកស្អាត កុមារតូចៗ កុំឲ្យចុះលេងទឹក ជៀសវាងយថាហេតុផ្សេងៗ កើតឡើង ៕

អត្ថបទ៖ សាន វិឡែម