ប្រមុខការទូតកម្ពុជាលើកឡើងចំណុចគន្លឹះ៥ ក្នុងកិច្ចប្រជុំកំពូលនៅអង្គការសហប្រជាជាតិ

លោកឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស បានអញ្ជើញថ្លែងសុន្ទរកថាក្នុងកិច្ចប្រជុំកំពូលនៅអង្គការសហប្រជាជាតិ នាទីក្រុងញូវយ៉ក ដោយលោក បានលើកឡើងចំណុចគន្លឹះចំនួន៥ ក្នុងកិច្ចប្រជុំកំពូលនេះ។  

លោកឧបនាយករដ្ឋមន្ត្រី បានលើកឡើងនូវចំណុចគន្លឹះចំនួន៥ រួមមាន៖១) ភាពកាន់តែផុយស្រួយនៃសន្តិភាព និងសន្តិសុខអន្តរជាតិ ២) តម្រូវការហិរញ្ញប្បទានសម្រាប់ការអភិវឌ្ឍប្រកបដោយចីរភាព ៣) ដំណោះស្រាយ និងហានិភ័យនៃការរីកចម្រើននៃវិទ្យាសាស្ត្រ បច្ចេកវិទ្យាឌីជីថល និងនវានុវត្តន៍ចំពោះការអភិវឌ្ឍមនុស្សជាតិ ៤) សារៈសំខាន់នៃការចូលរួមរបស់យុវជននៅក្នុងការអភិវឌ្ឍ និង៥) សារៈសំខាន់នៃការផ្លាស់ប្តូរអភិបាលកិច្ចសកលសម្រាប់សន្តិភាព ស្ថិរភាព និងការសម្រេចបាននូវគោលដៅអភិវឌ្ឍន៍ប្រកបដោយចីរភាព។

ប្រមុខការទូតកម្ពុជា លោក សុខ ចិន្តាសោភា បានគូសបញ្ជាក់អំពីសារៈសំខាន់នៃការកសាងឡើងវិញទំនុកចិត្តក្នុងប្រព័ន្ធពហុភាគីនិយម និងសង្កត់ធ្ងន់ថា សន្តិភាព គឺជាលក្ខខណ្ឌចាំបាច់បំផុតសម្រាប់ការអភិវឌ្ឍ និងវឌ្ឍនភាព។ ទន្ទឹមនឹងនេះ លោកប្រមុខការទូត ក៏បានវាយតម្លៃខ្ពស់ចំពោះឯកសារលទ្ធផលនៃកិច្ចប្រជុំកំពូល «Pact for the Future» ហើយ ជឿជាក់ថា ឯកសារនេះនឹងនាំមកនូវកំណែទម្រង់ត្រូវការជាចាំបាច់ ដើម្បីបង្កើតប្រព័ន្ធអន្តរជាតិ ដែលមានអភិបាលកិច្ចប្រកបដោយបរិយាប័ន សមភាពបច្ចេកវិទ្យា និងលទ្ធភាពទទួលបានធនធានហិរញ្ញវត្ថុសម្រាប់ការអភិវឌ្ឍដូចៗគ្នា។

គួរជម្រាបថា ដោយមានការអនុញ្ញាតពីប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានចាត់តាំងលោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស ចូលរួមថ្លែងសុន្ទរកថាក្នុងកិច្ចប្រជុំកំពូលស្តីពីអនាគត នៅថ្ងៃទី២៣ ខែកញ្ញា ឆ្នាំ២០២៤ នៅទីស្នាក់ការអង្គការសហប្រជាជាតិ ទីក្រុងញូវយ៉ក សហរដ្ឋអាមេរិក៕