គណៈមេធាវីកម្ពុជា នឹងដឹកនាំមេធាវី ៣០០នាក់ ទៅទស្សនកិច្ចតំបន់ព្រំដែននៅខេត្តត្បូងឃ្មុំ

គណៈមេធាវីនៃព្រះរាជាណាចក្រកម្ពុជា បានចេញសេចក្តីប្រកាស ជ្រើសរើសសហភាតា និងបុគ្គលិកគណៈមេធាវីចំនួន ៣០០នាក់ ទៅទស្សនកិច្ចតំបន់ព្រំដែននៅខេត្តត្បួងឃ្មុំឥតគិតថ្លៃ នៅថ្ងៃទី២៩ ខែកញ្ញា ឆ្នាំ២០២៤ខាងមុខ។

នៅក្នុងសេចក្តីប្រកាសរបស់គណៈមេធាវីបង្ហាញថា ដំណើរទស្សនកិច្ចព្រំដែន ខេត្តត្បូងឃ្មុំនេះ នឹងធ្វើនៅថ្ងៃទី២៩ ខែកញ្ញា ឆ្នាំ២០២៤ រយៈពេលមួយថ្ងៃពេញ ក្នុងគោលបំណងឱ្យសហភាតា និងបុគ្គលិកគណៈមេធាវីទាំងអស់បានឃើញផ្ទាល់នូវការអភិវឌ្ឍជាក់ស្តែងក្នុងខេត្តត្បូងឃ្មុំ ការកសាងហេដ្ឋារចនាសម្ព័ន្ធផ្លូវក្រវាត់ព្រំដែន ការបោះបង្គោលព្រំដែន និងការអភិវឌ្ឍជារួមរបស់ប្រជាជនដែលរស់នៅក្នុងខេត្តត្បូងឃ្មុំផ្ទាល់តែម្តង។

ចំពោះការចំណាយផ្សេងៗអំឡុងពេលធ្វើដំណើរ អ្នកចូលរួមមិនតម្រូវឱ្យបង់ប្រាក់នោះទេ ពោល គឺរាល់ការចំណាយទាំងអស់ អាហារ ភេសជ្ជៈ នឹងត្រូវផ្តល់ជូនដោយឥតគិតថ្លៃ រួមទាំងការចំណាយទាំងអស់ពាក់ព័ន្ធនឹងដំណើរទស្សនកិច្ចនេះ គឺឧបត្ថម្ភដោយនាយករដ្ឋមន្ត្រីកម្ពុជា និងភរិយា។ គណៈមេធាវីកម្ពុជា បញ្ជាក់ថា រាល់ការចំណាយក្នុងដំណើរទស្សនកិច្ចនេះ មិនប៉ះពាល់ដល់កញ្ចប់ថវិការដ្ឋ ឬកញ្ចប់ថវិកាមូលនិធិកសាងហេដ្ឋារចនាសម្ព័ន្ធតាមព្រំដែនឡើយ។

សម្រាបសហភាតា និងបុគ្គលិកគណៈមេធាវី ដែលចង់ចូលរួមក្នុងដំណើរទស្សនកិច្ចនេះ ត្រូវបំពេញឈ្មោះតាម Google Form ឬស្គែន QR Codeដែលគណៈមេធាវីបានប្រកាស ហើយឈប់ទទួលពាក្យនៅថ្ងៃទី២៤ ខែកញ្ញា ម៉ោង១៧៖០០នាទី៕