ព័ត៌មានជាតិ

ខេត្តឧត្តរមានជ័យគ្រោងនឹងបញ្ជូនពលករជាង៣០០០នាក់ទៅធ្វើចត្តាឡីស័កតាមស្រុកកំណើតវិញ

បានផុស

៤ years មុន

នៅ

ថ្ងៃអង្គារ ៩ មីនា ២០២១

ដោយ

លោក ឌី រ៉ាដូ អ្នកនាំពាក្យនិងជាអភិបាលរងខេត្តឧត្តរមានជ័យបានមានប្រសាសន៍នៅរសៀលថ្ងៃទី៩ ខែមីនានេះថា រដ្ឋបាលខេត្តគ្រោងនឹងបញ្ជូនពលករដែលកំពុងធ្វើចត្តាឡីស័កនៅតាមមណ្ឌលចត្តាឡីស័កនានាទូទាំងខេត្តប្រមាណជាង៣០០០នាក់ឲ្យទៅធ្វើចត្តាឡីស័កនៅតាមស្រុកកំណើតរបស់គាត់រៀងៗខ្លួនវិញ បន្ទាប់ពីធ្វើចត្តាឡីស័កបាន១៤ថ្ងៃរួចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា «ក្នុងចំណោមជាង៣០០០នាក់យើងបានបញ្ជូនបានប្រមាណជិត៤០០នាក់ហើយឲ្យទៅធ្វើចត្តាឡីស័កនៅតាមស្រុកកំណើតរបស់គាត់វិញ តាមបទបញ្ជារបស់សម្តេចតេជោ ហើយយើងនឹងបន្តបញ្ជូនទៅជាបន្តបន្ទាប់ទៀតរហូតដល់អស់»។

លោកបានបន្តទៀតថា ក្នុងចំណោមពលករដែលកំពុងធ្វើចត្តាឡីស័កជាង៣០០០នាក់នោះក្នុងនោះក៏មានពលករដែលមានស្រុកកំណើតនៅខេត្តឧត្តរមានជ័យប្រមាណ៤០០នាក់ផងដែរ។

យ៉ាងណាក៏ដោយលោកអភិបាលរងខេត្តបានឲ្យដឹងទៀតថា ដោយសារតែជិតដល់ពិធីបុណ្យចូលឆ្នាំខ្មែរប្រពៃណីជាតិនោះ ចំនួនពលករខ្មែរមកពីប្រទេសថៃចូលតាមច្រកទ្វារអន្តរជាតិអូរស្មាច់ប្រមាណពី៣០០ទៅ៤០០នាក់ក្នុងមួយៗថ្ងៃដែលតម្រូវឲ្យក្រុមការងារត្រូវចាំបាច់ត្រួតពិនិត្យសុខភាពឲ្យបានហ្មត់ចត់តាមបទបញ្ជារបស់សម្តេចតេជោ។ ពលករណាមានសុខភាពល្អធម្មតាគឺត្រូវបញ្ជូនទៅធ្វើចត្តាឡីស័កនៅស្រុកកំណើតរបស់គាត់រៀងៗខ្លួនវិញ។ ប៉ុន្តែបើពលករណាដែលមានអាការៈសង្ស័យថាមានឆ្លងជំងឺកូវីដ១៩ គឺមិនបញ្ជូនទៅទេ គឺត្រូវធ្វើចត្តាឡីស័កនិងយកសំណាកទៅពិនិត្យរកជំងឺកូវីដ១៩។

លោកអភិបាលរងបានបញ្ជាក់ថា នៅពេលលទ្ធផលតេស្តអវិជ្ជមានពីរដងនោះ ត្រូវបញ្ជូនទៅកាន់ស្រុកកំណើតវិញ ដោយធ្វើចត្តាឡីស័កបន្តនៅមូលដ្ឋានរបស់គាត់ដោយឲ្យអាជ្ញាធរខេត្តនោះជាអ្នកទទួលខុសត្រូវ។

តាមរយៈសារសម្លេងរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាកាលពីថ្ងៃទី០៧ ខែមីនាឆ្នាំ២០២១សម្តេចបានអនុញ្ញាតឱ្យពលករដែលវិលត្រឡប់មកពីប្រទេសថៃដែលពិនិត្យថាមានសុខភាពល្អប្រសើរ មិនប្រឈមការកើតកូវីដ១៩នោះអាចផ្លាស់ប្តូរទីតាំងចត្តាឡីស័ក មកខេត្តកំណើតរបស់ខ្លួនបានហើយខេត្តសាម៉ីត្រូវត្រួតពិនិត្យការងារនេះឱ្យបានហ្មត់ចត់ ដែលការធ្វើនេះគឺដើម្បីសម្រាលស្ថានការណ៍នៅតាមខេត្តជាប់ព្រំដែនថៃ៕

អត្ថបទ ៖ សំអឿន

Related Topics:ពលករខ្មែរ