ព័ត៌មានជាតិ

ឃាត់ខ្លួនជនជាតិចិន៩នាក់ បញ្ជូនមកធ្វើចត្តាឡីស័ក

បានផុស

៤ years មុន

នៅ

ថ្ងៃអង្គារ ៩ មីនា ២០២១

ដោយ

តាកែវ ៖ បន្ទាប់ពីអាជ្ញាធរខេត្តកណ្ដាល បានបិទការស៊ីណូ និងបិទការធ្វើដំណើរចេញចូលតំបន់ទីប្រជុំជនកោះធំ ដោយសារតែរកឃើញជនបរទេស ចំនួន៥នាក់បានឆ្លងជំងឺកូវីដ១៩ នៅព្រឹកថ្ងៃ ទី០៩ ខែមីនា ឆ្នាំ២០២១នេះ សមត្ថកិច្ចស្រុកព្រៃកប្បាស បានធ្វើការឃាត់ខ្លួនជនជាតិចិនដែលព្យាយាមគេចចេញពីតំបន់ប្រជុំជនកោះធំចំនួន៩នាក់ ដែលកំពុងតែស្ពាយកាបូបដើរនៅលើផ្លូវលេខ ១២៩ ស្ថិតនៅភូមិជំនីក ឃុំកំពង់រាប ស្រុកព្រៃកប្បាស ខេត្តតាកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបញ្ជាក់ពីលោកវរសេនីយ៍ឯក ឡេង ប៊ុនឡុង អធិការស្រុកព្រៃកប្បាស បានថ្លែងឲ្យដឹងថា ការឃាត់ខ្លួនជនជាតិចិនទាំង៩នាក់នេះ គឺបន្ទាប់ពីមានការរាយការពីប្រជាពលរដ្ឋថា ឃើញជនជាតិចិនមួយក្រុមមានស្ពាយកាបូបបានដើរ លើផ្លូវលេខ ១២៩ ដែលនាំឲ្យប្រជាពលរដ្ឋមានការភ័យខ្លាចពីការឆ្លងរីករាលដាលជំងឺកូវីដ១៩។

លោកអធិការស្រុកព្រៃកប្បាស បានថ្លែងបន្តថា ក្រោយការឃាត់ខ្លួនជនជាតិចិនទាំង៩នាក់ កម្លាំងសមត្ថកិច្ចនគរបាលស្រុកព្រៃកប្បាស បានធ្វើការជូនដំណឹងដល់មន្ត្រីសុខាភិបាល និងថ្នាក់ដឹកនាំខេត្ត ដើម្បីឃាត់ខ្លួន និងបញ្ជូនជនជាតិចិនទាំង៩នាក់នោះ មកដាក់នៅមណ្ឌលចត្តាឡីស័កនៅសាលាគរុកោសល្យភូមិភាគតាកែវ ដែលស្ថិតនៅក្នុងក្រុងដូនកែវ៕

ដោយ ៖ វីរៈ